ރާއްޖޭގައި އެއްވެސް އަމާން ކަމެއްނެތް ކަމަށާއި، އަންހެން ކުއްޖަކު ކަތިލައި، ރައީސް ނަޝީދު މަރާލަން ބޮއްގޮއްވީ މަޖިދީ މަގުގެ މެދުގައި މިވެރިކަމުގައި ކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބް ވިދާޅުވެއްޖެއެވެ.
ރިޔާސީ ބަހުސްގައި ސިޔާސީ މަސްރަހާއި، ރާއްޖޭގެ އަމާންކަމާއި ގުޅޭގޮތުން ކުރެވުނު ސުވާލުގައި އިލްޔާސް ވިދާޅުވީ ރާއްޖޭގައި އޮތް ނާމާންކަން ބަދަލލު ކުރެވޭނީ މިސަރުކާރު ބަދަލު ކުރެވިގެންކަމަށެވެ. މާލޭގެ ގެއެއްގެ ތެރޭގައި އަންހެން ކުއްޖަކު ކޮށާ ކަތިލި ހަނދާން އަދި ދާހާ ދުވަހެއް ނުވާކަމަށް އިލްޔާސް ވިދާޅުވިއެވެ. އަދި އެމަރަށް އިންސާފުވެސް ގާއިމް ނުވާކަަމަށް އިލްޔާސް ވިދާޅުވިއެވެ. މީގެ އިތުރުންވެސް އެތައް މަރެއް އެތައް ބަޔަކަށް ވީނުވީއެއް ނޭގި ގެއްލިފައިވާއިރު އެކަންކަން ހިނގައިދިޔަ ގޮތެއްވެސް އެގެން ނެތްކަމަށް އިލްޔާސް ވިދާޅުވިއެވެ.
އިލްޔާސް ވިދާޅުވީ މިވެރިކަމުގައި ސިޔާސީ ގޮތުން އަމާންކަން ނެތްކަން އެންމެ ބޮޑަށް އެނގުނީ ރައްޔިތުންގެ މަޖިލީހުގެ ރައީސަށް މަޖިލީދީ މަގުގެ މެދުގައި ބޮމެއް ގޮއްވާލައިގެން މަރާލަން އުޅުނު ހާދިސާއިން ކަމަށެވެ. މިހާދިސާއަކީ ސިޔާސީ ގޮތުން މިނިވަންކަން އަދި އަމާންކަން ނެތްކަން ހާމަވާ ވަރަށް ބޮޑު ހެއްކެއް ކަމަށް އިލްޔާސް ވިދާޅުވިއެވެ.
ރައީސް ނަޝީދު މަރާލަން ބޮން ގޮއްވާލީ މަޖީދީ މަގު މެދުގަ. އިންސާފެއް ނުލިބޭ. އަންހެން ކުއްޖަކު ކޮށާ ކަތިލައިފި. އެތައް ބަޔަކު ވީނުވީއެއް ނޭގި ގެއްލިއްޖެ. އެއްވެސް އަމާންކަމެއް ނެތް.
– އިލްޔާސް ވިދާޅުވިއެވެ.
އޭނާ ވިދާޅުވީ އަމާންކަން ގާއިމް ކުރަން ވައުދުވި ނަމަވެސް އެއްކަމެއްވެސް ނުވިކަމަށެވެ. އަދި ރައީސް ނަޝީދުގެ މައްސަލާގައި އިންސާފު އަދާއި ހަމައަށްވެސް މިސަރުކާރަށް ހޯދިފައި ނުވާކަމަށެވެ. އިލްޔާސް ވިދާޅުވީ މިނާމާން ދުވަސްތައް ބަދަލު ކުރެވޭނީ އިންސާފުން ކަންކަން ކުރެވޭނެ ގޮތްތަކެއް ހޯދައިގެން ކަމަށެވެ. އެކަން ކޮށްދެއްވާނެކަމަށް އިލްޔާސް ވިދާޅުވިއެވެ.
