ރައްޔިތުން ދޭ ތާއީދަކީ ދެތިން މީހެއްގެ މާލީ މަންފާއަށްޓަކައި މިލިޔަނުން ފައިސާ ހޯދަން ދޭ ތާއީދެއް ނޫންކަމަށް ރައްޔިތުންގެ މަޖިލީހުގެ ރައީސް އަދި ޑިމޮކްރެޓްސްގެ އެންމެ އިސް މޭސްތިރިޔާ ރައީސް މުހައްމަދު ނަޝީދު ވިދާޅުވެއްޖެއެވެ.

ދަ ޑިމޮކްރެޓްސްއާ އެކުގައި މަސައްކަތް ކުރެއްވި ރައްޔިތުންގެ މަޖިލިހުގެ ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުއްލަތީފް އާއި ކުޅުދުއްފުށީގެ މޭޔަރު މުހައްމަދު އާތިފާއި އެ ކައުންސިލްގެ މެންބަރުން ވަނީ އަލުން އެމްޑީޕީއާ ގުޅިވަޑައިގެންފައެވެ. މެންބަރު ޔާސިރާއި، މޭޔަރު އާތިފްގެ އިތުރުން ކައުންސިލްރުން އަލުން އެމްޑީޕީއާއި ގުޅިވަޑައިގަތީ، އެމްޑީޕީގެ ރިޔާސީ ކެންޑިޑޭޓް އަދި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއެކު ސޯލްޓް ކެފޭގައި އޮތް ބައްދަލުވުމެއްގައެވެ.

ޑިމޮކްރެޓްސްގައި ތިއްބެވުމަށްފަހު މިބޭފުޅުން އެމްޑީޕީއާއި ގުޅިވަޑައިގެންތާ 24 ގަޑިއިރު ނުވަނީސް ރައީސް ނަޝީދު ވަނީ ޑިމޮކްރެޓްސްގެ ކެންޑިޑޭޓް އިލްޔާސް ލަބީބާއިއެކު މިއަދު ކުޅުދުއްފުއްޓަށް ވަޑައިގެންފައެވެ. ކުޅުދުއްފުއްޓަށް ރައީސް ނަޝީދު ވަޑައިގެންނެވުމުން އެރަށުްނ ވަނީ ހޫނު މަރުހަބާއެއްވެސް ދަންނަވާފައެވެ.

ކުޅުދުއްފުށީގެ ރައްޔިތުންނާއި ބައްދަލު ކުރައްވާ ރައީސް ނަޝީދު ވިދާޅުވީ އެ ރަށުގެ ރައްޔިތުންގެ ތަރައްގީގެ ތަސައްވުރެއް އޮންނާނެ ކަމަށެވެ. ނަމަވެސް، ރައްޔިތުން ދޭ ތާއީދު، ވިޔަފާރި މުއާމަލާތަކަށް ހަދައި އޭގެ ތެރެއިން ދެތިން މީހަކަށް މިލިއަނުން ފައިސާ ލިބޭކަށް ރައްޔިތުން ނޭދޭނެ ނަޝީދު ވިދާޅުވިއެވެ.

ނަޝީދު ވިދާޅުވީ، ޒުވާން ކުދިންނަށް ފުރުސަތުތައް ދީ އަދި އެ ކުދިންނަށް ސިޔާސީ މާހައުލަށް، ސިޔާސީ މަސައްކަތަށް ނެރުމަށް އިންތިހާއަށް މަސައްކަތް ކުރަމުންދާ ކަމަށެވެ. އަދި މިދިޔަ ރައްޔިތުންގެ މަޖިލީހުގެ އިންތިހާބަށް ފަހުގައި ކުޅުދުއްފުށިން ދެ ބޭފުޅައެކު އެމަނިކުފާނާއެކު މަސައްކަތް ކުރެއްވުމަށް ފުރުސަތު ލިބިވަޑައިގެންނެވި ކަަމަށް ނަޝީދު ވިދާޅުވިއެވެ.

އޭގެ ތެރެއިން އެއް ކުއްޖަކު މަޖިލީހުގެ ދާއިމީ ކޮމެޓިއެއްގެ މުގައްރިރްއަކަށް ހަދާ، އަދި މަޖިލީހުން ލިބެން ހުރި ހުރިހާ ފުރުސަތެއްވެސް އަންގަވަމުން ގެންދިޔައިން، އަދި އަޅުގަނޑު އެބޭފުޅާއާ އެކުގައި ހުސް ވަގުތާއި ވީހާވެސް ގިނައިކޮށް މަޝްވަރާކޮށް ވާހަކަދައްކާ ހަދަން ގެންދިޔައިން.

– ޔާސިރުގެ ނަން ފާހަގަ ނުކުރައްވާ ނަޝީދު ވިދާޅުވިއެވެ.

އެމްޑީޕީގެ ރިޔާސީ ޕްރައިމަރީއަށްފަހު އުފެދުނު ޚިޔާލުތަފާތުވުންތަކެއްގައި ރައްޔިތުންގެ މަޖިލީހުގެ އެމްޑީޕީގެ ބައެއް މެންބަރުން އެޕާޓީ ދޫކުރައްވާ ދަ ޑިމޮކްރެޓްސްއާއި ގުޅިވަޑައިގަތެވެ. އެމްޑީޕީ ރިޔާސީ ޕްރައިމަރީގައި ޔާސިރު ތާޢީދުކުރެއްވީވެސް ރައީސް މުޙައްމަދު ނަޝީދަށެވެ. ދަ ޑިމޮކްރެޓްސްއަކީ ރައީސް ނަޝީދު އިސްވެ އުފެއްދެވި ޕާޓީއެކެވެ. ދަ ޑިމޮކްރެޓްސްއަށް އެންމެ ފުރަތަމަ ސޮއިކުރި ކައުންސިލަރުންގެ ތެރޭގައި ކުޅުދުއްފުށީ ސިޓީގެ މޭޔަރާއި ކައުންސިލަރުން ހިމެނެއެވެ. ނަމަވެސް ދަ ޑިމޮކްރެޓްސްގެ ހަރަކާތްތަކުގައި ދުރުގައި ހުންނެވުމަށްފަހު މިރޭ އެމްޑީޕީއާއި އެބޭފުޅުން ގުޅިވަޑައިގަތުމުން ކުޅުދުއްފުށި ސިޓީގެ ކައުންސިލްގެ މެޖޯރިޓީ ވަނީ އަލުން އެމްޑީޕީއަށް ލިބިފައެވެ.