އެމްޑީޕީގެ ރިޔާސީ ކެނޑިޑޭޓް، ރައިސް ސާލިހު މިއަދު ހުވަދޫ އަތޮޅަށް ކުރައްވަން ހަމަޖެހިފައި އޮތް ދަތުރުގައި ގދ. މަޑަވެއްޔަށް ވަޑައިގެން އެރަށުގައި އެމްޑީޕީގެ ކެމްޕޭން ޖަލްސާ ބާއްވަން ތައްޔާރު ކޮށްފައި އޮތް ތަނުގައި ރޭ ފަތިހު ބަޔަކު ހުޅުޖަހާ އަންދާލައިފިއެވެ.

ބަޔަކު މީހުން ހުޅުޖަހާ އަންދާލާފައިވަނީ، ކެމްޕޭން ޖަލްސާ ބޭއްވުމަށް އެރަށު ސްކޫލް ކައިރީގެ މަގެއްގައި ހަދާފައިވާ ތަނުގައެވެ. މި ހާދިސާގައި ޖަލްސާ ބޭއްވުމަށް ހަދާފައިވާ ތަން އެކީ ވަނީ އަނދާފައެވެ. އޭގެ ތެރޭގައި ތަނުގައި ހުރި ޕޯޑިއަމާއި އަދި ޖަހާފައި ހުރި ގޮނޑިތައްވެސް ހިމެނެއެވެ. އެހެންމަވެސް މިހާދިސާގައި އެއްވެސް މީހަކަށް އަނިޔާވެފައެއް ނުވެއެވެ.

އެރަށުން މައުލޫމާތި ދިން މީހަކު ކިޔައިދިން ގޮތުގައި، އެ ތަނުގައި ރޯކޮށްލިކަމަށް ބެލެވެނީ ފަތިހުގެ ވަގުތެއްގައެވެ. އެއީ ތަން ތައްޔާރު ކުރުމަށްފަހު މީހުން ތަން ދޫކޮށް ގޮސްފައިވަނީ ވަރަށް ދަންވީ ފަހުން ކަމަށްވާތީ ކަމަށްވެސް އޭނާ ކިޔައިދީފައި ވެއެވެ.

ތަނުގައި ރޯވި އަލިފާން ނިއްވާލާފައިވަނީ ފަތިހު 5:30 ހާރިއުއެވެ.

ރައީސް ސާލިހު އިއްޔެ ދަތުރު ކުރައްވާފައިވަނީ ދ. އަތޮޅުގައެވެ. ގދ. ދަތުރު ފައްޓަވަން ހެމަޖެހިފައިވަނީ މިއަދު ހެނދުނުއެވެ. އެމަނިކުފާނު ގދ. އަށް ވަޑައިގަތުމަށް ހަމެޖެހިފައި އޮތީ މިއަދު ދ. ކުޑަހުވަދޫއިންނެވެ.

މަޑަވެލީގައި ރައީސް ސާލިހު ކެމްޕޭން ޖަލްސާ ބާއްވަން ހަމަޖެހިފައި އޮތް ތަނުގައި ބަޔަކު ހުޅުޖަހާ އަންދާފައިވާއިރު، މަޑަވެއްޔަކީ މިއަދު ރައީސް ވަޑައިގެންނެވުމަށް ހަމަޖެހިފައިވާ ފުރަތަމަ މަންޒިލެވެ.

މި ދަތުރުފުޅުގައި ގދ. ތިނަދޫ ފިޔަވާ އެހެން ހުރިހާ ރަށަކަށް ރައީސް ސާލިހު ވަޑައިގަންނަވާ ގޮތަށް ވަނީ ހަމަޖެހިފައެވެ.