އެމްޑީޕީގެ ކުރީގެ ރައީސް މުހައްމަދު ނަޝީދު އިސްވެ ހުންނަވާ އުފެއްދި ދަ ޑިމޮކްރެޓްސް ޕާޓީގެ ރިޔާސީ ޕްރައިމަރީގައި ވާދަކުރުމަށް ކުރިމަތި ލެއްވި، ރައްޔިތުންގެ މަޖިލިހުގެ ހުޅުދޫ ދާއިރާގެ މެމްބަރު އިލްޔާސް ލަބީބު އޭނާގެ ރިޔާސީ ކެމްޕޭން ލޯންޗު ކޮށްފިއެވެ.
ދަ ޑިމޮކްރެޓްސްއިން އެޕާޓީގެ ރިޔާސީ ޕްރައިމަރީއަށް ހުޅުވާލުމުން ކުރިމަތިލެއްވި ހަމައެކަނި ކެނޑިޑޭޓް ކަމަށްވާ އިލްޔާސްގެ ރިޔާސީ ޕްރައިމަރީ ކެމްޕޭން ލޯންޗު ކޮށްފައިވަނީ ހެންވޭރު ކޮޅުގައި ހުންނަ އެޕާޓީގެ މައި ޖަގަހައިގައެވެ.
މިގޮތުން މައިޖަގަހާގަައި ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން އިލްޔާސް ވިދާޅުވީ، އޭނާއަށް ރާއްޖޭގެ އިގްތިސާދި ހަމަޔަކަށް އެޅުވޭނެ ކަމަށާއި، އެހައްލު ހޯދާނެގޮތްވެސް އޭނާއަށް އެނގޭ ކަމުގަައެވެ. އަދި އޭނާ ވިދާޅުވީ އޭނާގެ މުދައްރިޔަސީ އެމްޑީޕީގެ ކުރީގެ ރައީސް މުހައްމަދު ނަޝީދު ކަމަށާއި އޭނާއަށް އިންތިޚާބު ކާމިޔާބު ކުރެވުނު ނަމަވެސް އޭނާ ކުރިޔަށް ދާނީ ނަޝީދުގެ އިރުޝާދާއެކު ކަމަށެވެ.
އަޅުގަޑުގެ މުދައްރިސަކީ ރައީސް ނަޝީދު. އެބޭފުޅާގެ ފަހަތުގައި އަޅުގަޑުމެން ކުރިޔަށް މިދަނީ. ދެންވެސް ދާން އޮތީ އެބޭފުޅާގެ ފަހަތުގަ. އަޅުގަޑަކަށް އެބޭފުޅާގެ މައްޗަށް އެރޭނެ ގޮތެއް ނޯންނާނެ،
ރިޔާސީ ޕްރައިމަރީ ކެމްޕޭން ލޯންޗު ކުރުމުގެ ގޮތުން ބޭއްވި ޕެނަލް ޑިސްކަޝަންގައި ވާހަކަ ދައްކަމުން އިލްޔާސް ލަބީބު ވިދާޅުވިއެވެ.
ދަ ޑިމޮކްރެޓްސްގެ ރިޔާސީ ޕްރައިމަރީއަށް ކުރިމަތި ލުމަށް ފޯމު ހުށަހެޅުއްވުމަށްފަހު އިލްޔާސް ވިދާޅުވެފައިވަނީ ކުރިޔަށް އޮތް ރިޔާސީ އިންތިޚާބު ކާމިޔާބުކޮށް މި ސަރުުކާރު އޭނާ ބަދަލު ކުރައްވާނެ ކަމުގައެވެ. އަދި އޭނާވަނީ ރައްޔިތުން އޭނާއަށް ތާއީދު ކުރުމަށް ގޮވާލައްވާފައެވެ.
