ރަށު އިންޖީނުގޭގެ ކުރިމަތީގައި ރޯނުގައި ހެދުން ހިއްކަން އަޅައިގެން ދުން އެރުވި ޒަމާން ފާއިތުވެގެންގޮސްފިކަމަށާއި، ރައީސް ޞަލިހް ގެނެސްދެއްވި ތަރައްޤީ ރައްޔިތުން ބަލައިގެންފިކަމަށް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވިދާޅުވެއްޖެއެވެ.
މީދޫގައި އިމާރާތް ކުރާ 700 މީހުންގެ ޖާގައިގެ މިސްކިތުގެ ބިންގާ އެޅުމުގެ ރަސްމިއްޔާތުގައި ވާހަކަދައްކަމުން ރޮޒެއިނާ ވިދާޅުވީ ރާއްޖޭގެ ހުރިހާ ރަށަކަށް ފެނާއި ނަރުދަމާގެ ޙިދުމަތް ލިބިގެން މިދިޔައީ ރައީސް އިބްރާހިމް މުހައްމަދު ޞާލިހްގެ ފަސް އަަހަރުގެ ވެރިކަމުގައިކަމަށެވެ. އަދި އައްޑޫ ސިޓީއަށް ބަލާއިރުވެސް، މީދޫއަށް އައު އިންޖީނުގެއެއްގެ ޙިދުމަތް ވަރަށް އަވަހަށް ލިބިގެންދާނެކަން ރޮޒައިނާ ފާހަގަކުރައްވާފައިވެއެވެ.
މިދޫ އިންޖީނުގެއަށް އައު ޖެނެރޭޓަރުވެސް ގެނެވިފައިވާކަމަށާއި މިއީ މީދޫއަށް އައި ރަން ފަސް އަަހަރުކަމަށް ވިދާޅުވިއެވެ.
ރައީސް އިބްރާހިމް މުހައްމަދު ޞާލިހްގެ ރިޔާސީ ކެމްޕޭން ސްލޯގަންގައި ހިމެނޭ "އުފާވެރި އަމާން ދިވެހިރާއްޖެ" ޝިޔާރަކީ ތޯތޯ ވާހަކަ އެއް ނޫންކަމަށާއި، ރާއްޖޭގެ ކޮންމެ ދިމާލަކަށް ބަލާލުމުންވެސް އުފާވެރި އަމާން ރާއްޖޭގެ މަންޒަރުތައް ފެންނަމުން ދާކަމަށް ވިދާޅުވިއެވެ.
"ބަލާލި ކޮންމެ ދިމާލަކުންވެސް ފެންނަމުން ދަނީ ތަރައްގީގެ މަންޒަރުތައް" ރޮޒައިނާ ވިދާޅުވިއެވެ.
