ފުރިހަމަ މިނިވަން ނޫސްވެރިކަމަކީ ސަރުކާރުގެ ތެރޭގައި ހިނގާ ކޮރަޕްޝަނާއި އަދި ނޭދެވޭ ހުރިހާކަމެއްވެސް ހުއްޓުވުމަށް އޮތް އެންމެ ބޮޑު އެއް ބާރުކަމަށާއި، އެހެންކަމުން ދާދިފަހުން ބޭއްވުނު ނޫސް ކޮންފަރެންސެއްގައި ނޫސްވެރިންނާއި ގުޅުވައިގެން އޭނާއަށް ވާހަކަ ދެއްކިފައިވަނީ ރަގަޅަށް ނޫންކަމަ ބުނެ، އެސްޓީއޯގެ ކުރީގެ އެމްޑީ ހުސެއިން އަމުރު މާފަށް އެދިއްޖެއެވެ.
ދަ ޑިމޮކްރެޓްސްއާއި އިދިކޮޅު ޕީޕީއެމްއާ ދެމެދު އެންމެ ފަހުން ކުރިޔަށްދިޔަ ސިޔާސީ މަޝްވަރާތަކަށްފަހު އޮތް ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ނުރުހުން ފާޅުކޮށް އަމްރު ވިދާޅުވެފައިވަނީ ނޫސްތައް ހިންގަނީ ސަރުކާރުން ސްޕޮންސަރ ހޯދައިގެން ކަމަށާއި، އަދި އެނޫސްތަކުގައި ލިޔަމުންދަނީ ހަމައެކަނި ސަރުކާރުން ބޭނުންވާ ވާހަކައެއް ކަމުގައެވެ.
އަދި ސަރުކާރަށް އެގޮތަށް ނޫސްތަކަށް ސްޕޮންސަރ ނުދެވޭނެ ކަމަށް ވިދާޅުވެ އޭނާވަނީ ނޫސްވެރިން އޭނާއާއި އަމާޒު ކުރި ސުވާލުތަކަށް ނުރުހުން ފާޅުކޮށް، ސާބިތު ނުހިފޭ އެތަކެއް ތުހުމަތުތަކެއްވެސް ނޫސްވެރިންނަށް އަމާޒުކޮށްފައެވެ.
އެހެންނަމަވެސް އެއަށްފަހު އޭނާއަށް ނޫސްވެރިންނާއި އަދި އެނޫންވެސް އެތައް ބައެއްގެ ފާޑުކިޔުން އަމާޒުވުމުން، އޭނާއަށް ދެއްކުނު ވާހަކަތަކަށް މާފަށް އެދެމުން އަމްރު ވިދާޅުވެފައިވަނީ، މިނިވަން ނޫސްވެރިކަމެއް ކުރެވޭނީ ސިޔާސީ ޕާޓީތަކަށް ދައުލަތުން އެހީތެރިކަން ފޯރުކޮށްދޭ އުސޫލުން ނޫސްތަކަށް ސަބްސިޑީ ފޯރުކޮށް ދީގެންކަމަށާއި، އެބީދައިން ނޫސްތަކަށް އެހީތެރިކަން ފޯރުކޮށްދިނުމަށް މެނިފެސްޓޯގައި ހިމެނުމަށް އޭނާ މަސައްކަތް ކުރައްވާނެ ކަމަށެވެ.
އަދި އޭނާ ވިދާޅުވެފައިވަނީ، މިނިވަން ނޫސްވެރިކަމެއް ރާއްޖޭގައި ގާއިމް ވުމަކީ ކޮންމެހެންވެސް މުހިންމުކަމެއް ކަމުގައެވެ.
މިސަރުކާރުން ނޫސްތަކަށް ސްޕޮންސަރ ދޭކަމަށާއި، އެހެންނަމަވެސް އެގޮތަށް ރައްޔިތުންގެ ޓެކްސް ފައިސާ ނޫސްތަކަށް ނުދެވޭނެކަމަށް އަމްރު ވިދާޅުވިނަމަވެސް، ބައެއް ފަރާތަކުން ފާހަގަ ކޮށްފައިވާ ގޮތުގައި، އޭނާ އެސްޓީއޯގެ އެމްޑީކަން ކުރެއްވި ޚުދު އޭނާވެސް ވަނީ ބޭނުންވާ ނޫސްތަކަށް ބޮޑެތި އަދަދުތަކުން ސްޕޮންސަރގެ ގޮތުގައި ފައިސާ ދީފައި ކަމުގައެވެ.
ކޮމެންޓު ފޮނުވާ