ދީނާއި ޤައުމާއިމެދު އެއް ވިސްނުމެއް ނެތިއްޔާ، އެބައެއްގެ ކިބައިން ޖެހޭނީ ބަރީޢަވާން ކަމުގައި ސަލަފް ޖަމިއްޔާގެ ޗީފް މާކެޓިންގ އޮފިސަރ އަދި ސަލަފް ޖަމިއްޔާ އިން ހިންގާ ހަރަކާތްތަކުގައި އިސް ދައުރެއް އަދާކުރާ އަލީ ރަމީޒު ވިދާޅުވެއްޖެއެވެ.
ޢަލީ ރަމީޒު މިހެން ވިދާޅުވީ ކުރިއަށް އޮތް ރިޔާސީ އިންތިޚާބާއި ގުޅިގެން ސިޔާސީ އެކި ފަރާތްތަކުން ކުރަމުންދާ މަޝްވަރާތަކާއި ގުޅިގެން ކަމަށް ބެލެވެއެވެ. ޚާއްސަކޮށް މިދުވަސްވަރު އެންމެ ބޮޑަށް މަޝްވަރާގެ މޭޒުގައި ބައްދަލުވުންތައް ކުރިއަށް ދަނީ ދަ ޑިމޮކްރެޓްސް އާއި އިދިކޮޅު ޕީޕީއެމްއާއި ދެމެދުއެވެ.
ޢަލީ ރަމީޒު ވިދާޅުވީ މަޝްވަރާގެ މޭޒަކަށް ދާއިރުވެސް އަބަދުވެސް އިސްކަން ދޭންޖެހޭނީ އިސްލާމީ ދީނާއި، ދިވެހި ޤައުމާއިމެދު އޮންނަ ވިސްނުން އެއްގޮތަށް ކުރަން ކަމަށެވެ. އެވިސްނުން އެއްގޮތް ނުވާނަމަ ދެން އެބަޔަކާއިއެކު ކުރެވޭނެ އިތުރު މަޝްވަރާތަކެއް ނޯންނާކެމަަށް ޢަލީ ރަމީޒު ވިދާޅުވިއެވެ.
އިސްލާމް ދީނާއި ޤައުމާއިމެދު އެއް ވިސްނުމެއް ނެތިއްޔާ، އެއް މޭޒުދޮށުގަ ދައްކާނެ އެއްވެސް ވާހަކައެއް ނުހުންނާނެ. އެބައެއްގެ ކިބައިން ޖެހޭނީ ބަރީޢަވާން.
– ޢަލީ ރަމީޒު ވިދާޅުވިއެވެ.
އިދިކޮޅު ޕީޕީއެމްއާއި، ދަ ޑިމޮކްރެޓްސްގެ މަޝްވަރާ ތިން ވަނަ ބައްދަލުވުން ބޭއްވިފައިވާއިރު، އެދެ ޕާޓީގެ ދެމެދުގައި ސިޔާސީ ގޮތުން ވެފައިވާ އެއްކަމަކީ ރައީސް ޞާލިހުގެ ވެރިކަން ބަދަކު ކުރުމެވެ. މިނޫން ކަންކަމުގައި މަސައްކަތް ކުރަން ކޮމިޓީތަކެއް އެކުލަވާލުމަށް ވަނީ ނިންމާފައެވެ. ނަމަވެސް ދަ ޑިމޮކްރެޓުން ވަނީ އިދިކޮޅު ޕީޕީއެމްއިން ހިންގާ އިންޑިއާ އައުޓް ހަރަކާތް ހުއްޓާ ނުލާކަމަށް ވާނަމަ، އެކީގައި ކުރިއަށް ދާން އުދަނގޫވާނެކަމަށް ބުނެފައެވެ.
