ދައުލަތުން އެތައް މިލިޔަން ރުފިޔާ ޚަރަދުކޮށްގެން ހިއްކާފައިވާ ބިންތައް ހިލޭ ދިނުމަކީ ރޯމާއި ދުވާލު ދައުލަތް ލޫޓުވުން ކަމުގައި ރައްޔިތުންގެ މަޖިލީހުގެ ނިލަންދޫ ދާއިރާގެ ކުރީގެ މެމްބަރު ޑރ.ޚަލީލް ވިދާޅުވެއްޖެއެވެ.

ޚަލީލް މިހެން ވިދާޅުވީ ރައީސް ޞާލިހު މާލޭގެ ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް ވެފައިވާ ވައުދު ފުއްދުމަށް މިދިޔަ ހަފްތާގައި ގޯތި ދިނުމަށް ނިންމައި ލިސްޓު ޢާންމު ކުރުމާއި ގުޅިގެން ކުރެއްވި ޓުވީޓުގައެވެ.

ޚަލީލް ވިދާޅުވީ ދައުލަތުގެ ބަޖެޓުން ޚަރަދު ކޮށްގެން ހިއްކާފައިވާ ބިންތަކުން 12 މިލިޔަން ރުފިޔާއަށް އަގުކުރެވޭވަރުގެ ބިންތައް އެއްވެސް އަގަކާއި ނުލައި ހިލޭ ސާބަހަށް ދިނުމަކީ އިންސާފެއް ނޫންކަމަށެވެ.

ހިޔާ ފްލެޓާއި، ވިނަރެސް ފްލެޓް ލިބޭ މީހުންނަށް އަގު ދައްކައިގެން އެތަން ތަނުގައި އުޅޭއިރު އެމީހުންނަށްވެސް މިއުސޫލުން ހިލޭ ދިރިއުޅެވޭނެ ގޮތް ފަހިވާންޖެހޭ ކަމަށެވެ. އެނޫން ގޮތަކަށް މިކަން ކުރާނަމަ މިއީ ސަރުކާރުން ހިންގާ ބޮޑު ޖަރީމާއެއް ކަމަށް ޚަލީލް ވިދާޅުވިއެވެ.

12 މިލިޔަން ރުފިޔާގެ އަގުހުރި ބިން ހިލޭ. 2.2 މިލިޔަން ރުފިޔާގެ ހިޔާ ފްލެޓާއި، 2.7 މިލިޔަން ރުފިޔާގެ ވިނަރެސް ފްލެޓް އަގުދައްކާ ގޮތަށް. މިއީ ރޯމާއި ދުވާލު ދައުލަތް ލޫޓުވުން. މިއީ ބޮޑު ސްކޭމެއް އަދި ޚިޔާނާތެއް.

– ޑރ.ޚަލީލް ވިދާޅުވިއެވެ.

ފްލެޓާއި ގޯތި ލިބޭ މީހުންގެ ވަގުތީ ލިސްޓު އިޢުލާންކުރެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ބައްދަލުވުމުގައި އެ މަސައްކަތްކުރިއަށްގެންދެވި ކޮމިޓީން ވިދާޅުވީ، ގޯއްޗަށް އެދި ހުޅުވާލި ފުރުޞަތުގައި 15164 ފޯމް ހުށަހެޅިކަމަށާއި އެއީ 23088 މީހުންކަމަށެވެ. އޭގެތެރެއިން 12794 ފޯމު ޝަރުތު ހަމަވާކަމަށާއި، އޭގެ ތެރޭގައި ޝަރުތު ހަމަވާ 19857 މީހުން ހިމެނޭކަމަށް އެ ކޮމިޓީން ވިދާޅުވިއެވެ. އޭގެތެރެއިން މިފަހަރު ދޫކުރައްވާ 5000 ގޯތި 10314 މީހަކަށް ލިބޭކަމަށްވެސް އެ ކޮމިޓީން ވިދާޅުވެއެވެ.

ކޮމިޓީން ވިދާޅުވީ، ޝަރުތު ހަމަވާ 19857 މީހުންގެ ތެރެއިން މިފަހަރު ގޯތި ނުލިބުނަސް، 9544 މީހަކު ގޯއްޗަށް ޝަރުތު ހަމަވާކަމަށެވެ. އަދި އެ ފަރާތްތަކުން އިތުރު މީހަކާއި ނުވަތަ ބަޔަކާއި ގުޅިގެން ފޯމް ހުށަހެޅުއްވުމުން ގޯތި ލިބުމުގެ ފުރުޞަތު ބޮޑުވާނެކަމަށްވެސް ކޮމިޓީން ވިދާޅުވެއެވެ. ކޮމެޓީން ހިއްސާކުރެއްވި މަޢުލޫމާތައް ބަލާއިރު ބިންވެރިޔާ ސްކީމަށް ހުށަހެޅި ފަރާތްތަކުގެ ތެރެއިން ޝަރުތު ހަމަނުވަނީ 2370 ފޯމެކެވެ. އެއީ ޖުމްލަ 3231 މީހެކެވެ.

މިފަހަރު ދޫކުރައްވާ 5000 ގޯއްޗަކީ ހުޅުމާލެއާއި ގުޅީފަޅުން ދޫކުރެއްވުމަށް ހަމަޖެހިފައިވާ ގޯއްޗެވެ. އޭގެތެރެއިން 1500 އަށްވުރެ ގިނަ ގޯތި ހުޅުމާލެއިން އަދި ބާކީހުރި ގޯތިތައް ދޫކުރުމަށް ހަމަޖެހިފައިވަނީ ގުޅީފަޅާއި ގިރާވަރު ފަޅު ހިއްކައިގެނެވެ.