ސިޔާސީ ޕާޓީތަކުގެ ބަލަދުވެރި ފަރާތަކީ އިލެކްޝަންސް ކޮމިޝަން ކަމަށްވާއިރު، ޕާޓީތަކަށް ކަމެއް ދިމާވާއިރަށް، ދަފްތަރުން އުނިކޮށް، ޕާޓީ އުވާލުމަކީ އިންސާފުވެރި ގޮތަކަށް ނުވާނެކަމަށް ނިޝާން ޢިއްޒުއްދީނުގެ ޢިއްޒަތުގެ ވެރިޔާ އަނީސާ އަޙްމަދު ވިދާޅުވެއްޖެއެވެ.

އަނީސާ މިހެން ވިދާޅުވީ، އެކަމަނާ ނިސްބަތްވާ އެމްއާރުއެމް ކުއްލިގޮތަކަށް އުވާލުމުގައި އިލެކްޝަންސް ކޮމިޝަނުން އަމަލު ކުރައްވާފައިވާ ގޮތާއި ގުޅޭ ގޮތުން ކުރެއްވި ޓުވީޓެއްގައެވެ. އެމްއާރުއެމް އުވާލަން އީސީން ނިންމީ ސިޔާސީ ޕާޓީތަކުގެ ގާނޫނުގައި ބުނާ 3000 މެމްބަރުން ހަމަނުވެގެން ދެ ވަނަ ނޯޓިސްއެއް ދިނުމަށްފަހުއެވެ.

އަނީސާ ވިދާޅުވީ އިލެކްޝަންސް ކޮމިޝަނަކީ ސިޔާސީ ޕާޓީތަކުގެ ބެލެނެވެރި ފަރާތް ކަމުގައިވާއިރު، އަބަދުވެސް އިލެކްޝަނުން އަމަލު ކުރަންޖެހޭނީ ޕާޓީތަކުގެ މެމްބަރުންގެ މަސްލަހަތު އިސްކޮށް އިންސާފުވެރި ގޮތަކަށް ކަމަށެވެ. ކަމެއް ދިމާވާއިރަށް ޕާޓީތައް އުވާލުމަކީ ހައްލެއް ނޫންކަން ފާހަގަ ކުރައްވައި އަނީސާ ވިދާޅުވީ ޤާނޫނު އަސާސީގެ 43 ވަނަ މާއްދާގެ ރޫހަކީވެސް މެމްބަރުންގެ ހައްގުތައް ވީހާވެސް ބޮޑަށް ފަހިކުރެވޭނެ ޖާގަ ދިނުންކަމަށެވެ.

އިލެކްޝަންސސް ކޮމިޝަނަކީ ސިޔާސީ ޕާޓީ ތަކުގެ ބެލެނެވެރި ފަރާތައް ވާއިރު، ކަމެއް ދިމާވުމުން، ވީހާ އަވަހަކަށް ޕާޓީ އުވާލުމުގެ ބަދަލުގަ ޤާނޫނު އަސާސީގެ 43 ވަނަ މާއްދާގެ ރޫހާ އެއްގޮތަށް ޕާޓީގެ މެމްބަރުންގެ ހައްގުގަ ކަންކަން ފަހިކޮށް ދިނުމުން ނޫންތޯ އިންސާފުވެރި ގޮތަކީ.

– އަނީސާ ވިދާޅުވިއެވެ.

ޤާނޫނު އަސާސީގެ 43 ވަނަ މާއްދާގައި ބުނެފައިވަނީ އިދާރީ ހިންގުމުގެ ދާއިރާއިން މީހަކާއިމެދު އެއްވެސް ޤާނޫނާއި އެއްގޮތްވާ ގޮތުގެ މަތީން ޢަދުލު އިންސާފުގެ ހަމަތަކާއި އެއްގޮތަށް އެކަށީގެންވާ އަވަސް މިނެއްގައި ކަންކަން ކުރުމަކީ އެމީހަކަށް ލިބިގެންވާ ހައްގެއް ކަމަށެވެ. އަދި އިދާރީ ގޮތުން އަޅާ ފިޔަވަޅެއްގެ ސަބަބުން އެއްވެސް މީހެއްގެ ހައްގަކަށް އުނިކަމެއް ލިބިއްޖެކަމަށް ފެނިއްޖެ ނަމަ، އެފިޔަވަޅެއް އެޅި ސަބަބު ލިޔުމުން ލިބުމުގެ ހައްގު އެމީހަކަށް ލިބިގެންވާކަމަށެވެ.

ހަމަ އެހެންމެ އިދާރީ ގޮތުން އަޅާ ފިޔަވަޅެއްގެ ސަބަބުން އެއްވެސް މީހެއްގެ ހައްގަކަށް ނުވަތަ އެއްވެސް ބައެއްގެ ހައްގަކަށް އުނިކަމެއް ލިބިއްޖެކަމަށް ފެނިއްޖެނަމަ، އެކަމެއް ކޯޓަށް ހުށަހެޅުމުގެ ހައްޤު އެމީހަކަށް ނުވަތަ އެބަޔަކަށް ނުވަތަ އެކަމުން ސީދާގޮތުގައި އަސަރު ފޯރައިފާނޭ ކޮންމެ މީހަކަށް ލިބިގެންވާކަމަށެވެ.

އިލެކްޝަނުން އެމްއާރުއެމް އުވާލައި އެއްވެސް ސިޔާސީ ހަރަކާތެއް ނުހިންގުމަށް ވަނީ އަންގާފައެވެ. އެއެންގުމާއި އެއްގޮތަށް ޢަމަލު ކުރުމަށް އެޕާޓީން ވަނީ އާންމު މެމްބަރުންގެ ކިބައިން އެދިފައެވެ. އެމްއާރުއެމްއިން ދަނީ މިމައްސަލަ ކޯޓަށް ހުށަހެޅުމަށް ތައްޔާރު ވަމުންނެވެ.