އިޞްލާޙަކީ ފިކުރެއް ނައްތައި ނުލެވޭނެކަމަށް ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމް ވިދާޅުވެއްޖެއެވެ.
ކުރީގެ ރައީސް މައުމޫން އަބްދުލް ގައްޔޫމް އިސްވެ ހުންނަވައި އުފެއްދެވި މޯލްޑިވްސް ރިފޯމް މޫވްމަންޓް (އެމްއާރުއެމް) އުވާލީ ގަވައިދާ ހިލާފަށް ކަމަށް ރައީސް މައުމޫން ވަނީ ވިދާޅުވެފައެވެ. ގާނޫނު ބުނާ ގޮތުން ސިޔާސީ ޕާޓީއެއްގެ ގޮތުގައި ހަރަކާތްތެރިވެވޭނީ 3000 މެންބަރުން ހަމަވާ ޕާޓީތަކަށް އެކަންޏެވެ.
މީގެ ކުރިން ދެ ފަހަރެއްގެ މަތިން އެ ޕާޓީއަށް އީސީން ނޯޓިސްވެސް ދިނެވެ. އީސީން 2022ގެ މާރިޗް މަސް ތެރޭގައި އެ ޕާޓީއަށް ނޯޓިސް ދިންއިރު، އީސީން އެންމެ ފަހުން ނޯޓިސް ދީފައި ވަނީ މިދިޔަ ފެބްރުވަރީ މަސް ތެރޭގައެވެ. ފަހުން ނޯޓިސް ދީފައި ވަނިކޮށް އެމްއާރްއެމްއިން 3000 މެމްބަރުން ހަމަކޮށް ފޯމްތައް ފެބްރުވަރީ މަސް ތެރޭގައި ހުށަހެޅިއެވެ. ނަމަވެސްމިފޯމުތަކަށް ވީގޮތެއް ނާންގައި ކުއްލިއަކަށް ޕާޓީ އުވާލި މައްސަލާގައި އެޕާޓީން ވަނީ އެކަން ކުށްވެރި ކޮށްފައެވެ.
ރައީސް މައުމޫން ވިދާޅުވީ އެމްއާރުއެމްއަކީ ފިކުރެއް ކަމަށެވެ. އެފިކުރު ނައްތާ ނުލެވޭނެކަމަށެވެ.
އިޞްލާޙަކީ ފިކުރެއް. ފިކުރެއް ނައްތައެއް ނުލެވޭނެ.
— Maumoon Abdul Gayoom (@maumoonagayoom) May 25, 2023
އެމްއާރުއެމް އުވާލުމުން އެ ޕާޓީގެ އިސް ބޭފުޅުން އެކަން ގަބޫލުނުކޮށް ވިދާޅުވެފައި ވަނީ ޕާޓީ އުވާލާފައި ވަނީ ގަވައިދާ ހިލާފަށް ކަމަށެވެ. އަދި އިލެކްޝަންގެ ނިންމުމާ ދެކޮޅަށް މަސައްކަތް ކުރައްވާނެ ކަމަށާއި އަދި އާހިރުގައި ކާމިޔާބު ހޯއްދަވާނެ ކަމަށް އެ ބޭފުޅުން ވަނީ ވިދާޅުވެފައެވެ.
އެމްއާރުއެމްއިން ސިޔާސީ އެއްވެސް ހަރަކާތެއް ނުހިންގުމަށް އިލެކްޝަނުން ވަނީ މިއަދު އަންގައި އެޕާޓީގެ ދަރަންޏެއް ވާނަމަ، އެކަން އެންގުމަށްވެސް ވަނީ ދަންނަވާފައެވެ.
ކޮމެންޓު ފޮނުވާ