އިލެކްޝަންސް ކޮމިޝަނުން މިއަދު އުވާލުމަށް ނިންމާފައިވާ އެމްއާރުއެމްގެ އެއްވެސް ދަރަންޏެއް ވާނަމަ އެކަން އެކޮމިޝަނަށް އެންގުމަށް އިލެކްޝަންސް ކޮމިޝަނުން އިއުލާން ކޮށްފިއެވެ.

އިލެކްޝަންސް ކޮމިޝަނުން މިއަދު ކުރި އިއުލާނުގައި ބުނެފައިވަނީ ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) ގެ 30 ވަނަ މާއްދާގެ (ހ)ގެ 1 ވަނަ ނަންބަރުގައިވާ ގޮތުގެމަތިން މޯލްޑިވްސް ރިފޯމް މޫވްމަންޓް (އެމް.އާރު.އެމް) އުވާލުމަށް އެ ކޮމިޝަނުން މިއަދު ނިންމާފައިވާކަމުގައެވެ.

އެހެންކަމުން، އެޕާޓީގެ ދަރަންޏެއްވާނަމަ އެކަން އެ ކޮމިޝަނަށް އެންގުމަށްޓަކައި ޢާންމުކޮށް އަންގާ އިޢުލާނު ކުރާކަމަށް މި އިއުލާންގައި ބުނެފައިވެއެވެ. އަދި އެ އިޢުލާނާ ގުޅިގެން އެކޮމިޝަންގެ 3322241 ނަންބަރު ފޯނަށް ގުޅުމަށް ނުވަތަ [email protected] އަށް އީމެއިލް ކުރުމަށް އިއުލާނުގައި އެދިފައި ވެއެވެ.

ކުރީގެ ރައީސް މައުމޫން އުފައްދަވާ އެމަނިކްފާނުގެ ދަރިކަލުން ރައީސްކަން ކުރައްވަމުން ގެންދަވާ އެމްއާރުއެމް އުވާލުމަށް މިއަދު އީސީން ނިންމާފައިވަނީ އެޕާޓީއަށް 3،000 މެމްބަރުން ހަމަކުރަން ދިން ދެވަނަ ފުރުސަތުގައިވެސް އެއަދަދަށް މެމްބަރުން ހަމަ ކުރެވިފައި ނުވާތީއެވެ.

އެމްއާރުއެމްގެ މެމްބަރުންގެ އަދަދު 3،000 އަށްވުރެ އަނެއްކާވެސް ދަށަށް ދިއުމާއި ގުޅިގެން އިލެކްޝަންސް ކޮމިޝަން އެޕާޓީއަށް 3،000 މެމްބަރުން ހަމަކުރުމުގެ ދެވަނަ ނޯޓިސް ފޮނުވާފައިވަނީ ފާއިތުވި ފެބްރުއަރީމަހުއެވެ.

އެމްއާރުއެމްގެ މެމްބަރުންގެ އަދަދު 3،000 އަށްވުރެ ދަށަށް ދިއުމާއެކު އެޕާޓީއަށް 3،000 މެމްބަރުން ހަމަކުރުމަށް އީސީން 2022 ވަނަ އަހަރުވެސް ނޯޓިސް ފޮނުވާފައި ވެއެވެ. އެފަހަރު ދިން 3 މަހުގެ މުއްދަތު ހަމަވުމުގެ ކުރިން، ފާއިތުވި އަހަރުގެ ޖޫން މަހުގެ ތެރޭގައި އެޕާޓީން ގާނޫނުގައި ބުނާ އަދަދަށް މެމްބަރުން ހަމަކޮށްފައި ވެއެވެ.

އެހެންނަމަވެސް އަނެއްކާވެސް ގާނޫނުގައި ބުނާ އަދަދަށްވުރެ ޕާޓީގެ މެމްބަރުންގެ އަދަދު ދަށަށް ދިއުމާއި ގުޅިގެން އީސީން މެމްބަރުން ހަމަކުރުމަށް އެމްއާރުއެމްއަށް ނޯޓިސް ފޮނުވާފައިވަނީ މިއަހަރުގެ ފެބުރުއަރީމަހުގެ 22 ވަނަ ދުވަހުއެވެ.

ޕާޓީތަކާބެހޭ ގާނޫނުގައި ބުނާގޮތުން އިލެކްޝަންސް ކޮމިޝަނުން ދޭ މުއްދަތުގައި ސިޔާސީ ޕާޓީއަކަށް ގާނޫނުގައި ބުނާ މުއްދަތަށް މެމްބަރުން ހަމަ ނުކުރެވިއްޖެނަމަ އެޕާޓީއެއް އުވާލުމަށް ނިންމުމުގެ ބާރު އީސީއަށް ލިބިގެން ވެއެވެ.

މިގޮތުން ދާދިފަހުން އިލެކްޝަންސް ކޮމިޝަނުންންވަނީ ގާނޫނުގައި ބުނާ އަދަދަށް މީހުން ހަމަނުކުރެވިގެން ދެޕާޓީއެއް އުވާވެސްލާފައެވެ. އެއީ ރައީސް މައުމޫން އެންމެ ފުރަތަމަ އުފެއްދެވި ޑީއާރުޕީއާއި ދާދިފަހުން އުފެއްދި ލިބަރަލް ޕާޓީއެވެ.

އިލެކްޝަން ކޮމިޝަންގެ ވެބްސައިޓުގައި ވާގޮތުން 21 ފެބުރުވަރީ 2023ގެ ނިޔަލަށް އެމްއާރުއެމްގައި ތިބި މެމްބަރުންގެ އަދަދަކީ 2،981 މެމްބަރުންނެވެ.

އިލެކްޝަންސް ކޮމިޝަނުން އެމްއާރުއެމް އުވާލަން ނިންމިއިރު ކުރިޔަށް އޮތް ރިޔާސީ އިންތިޚާބުގައި ކޯލިޝަން ހަދާނެ ޕާޓީތަކެއް ނިންމުމަށް ބައެއް ސިޔާސީ ޕާޓީތަކާއި އެޕާޓީން ދަނީ ވާހަކަވެސް ދައްކަމުންނެވެ.

މޯލްޑިވްސް ރީފޯމް މޫވްމަންޓް (އެމްއާރުއެމް) އުވާލުމަށް އީސީން ނިންމުމާއި ގުޅިގެން އެޕާޓީގެ ރައީސް ފާރިސް މައުމޫން ވިދާޅުވެފައިވަނީ، އެނިންމުން އީސީން ބަދަލު ނުކޮށްފިނަމަ ކޯޓަށް ދިއުމަކީ އޮތް ގޮތެއް ކަމަށާއި އެހެންނަމަވެސް ފުރަތަމަ އެޕާޓީން އެދެނީ އިލެކްޝަން ކޮމިޝަނުގެ ނިންމުން އެ ކޮމިޝަނުން އަލުން މުރާޖައާ ކޮށްދިނުންކަމުގައެވެ.