ކުރީގެ ރައީސް އަލް އުޘްތާޒު މައުމޫން އަބްދުލް ޤައްޔޫމް އިސްކޮށް ހުންވައިގެން އުފެއްދެވި މޯލްޑިވްސް ރިފޯމް މޫވްމަންޓް (އެމްއާރްއެމް) އުވާލުމަށް އިލެކްޝަންސް ކޮމިޝަނުން ނިންމެވި ނިންމެވުމާއިއެކު ރައީސް މައުމުނާއި، ފާރިސް މައުމޫންގެ ހޫނު ރައްދެއް ސަރުކާރަށް ދެއްވައިފިއެވެ.
މިދިޔަ ފެބުރުއަރީ މަހުގެ ތެރޭގައި ދިން ދެވަނަ ނޯޓިސްގެ މުއްދަތު ހަމަވީ މިދިޔަ ބުދަ ދުވަހަށެވެ. އެމްއާރުއެމަށް ފުރަތަމަ ނޯޓިސްދިނީ 2022 ގައެވެ. ގާނޫނުގައި ބުނާ އަދަދަށް މެމްބަރުން ހަމަނުވެގެން ތިން މަސް ދިން ޕާޓީތަކުގެ ތެރޭގައި އޭރު އެމްއާރުއެމް ހިމެނުނަސް މިދިޔަ އަހަރުގެ ޖޫން މަހުގެ ތެރޭގައި މެމްބަރުން ހަމަކުރިއެވެ. އެހެންވެ ޕާޓީ އުވުމުގެ ބިރު ފިލީއެވެ.
އިލެކްޝަންސް ކޮމިޝަނުން ބުނި ގޮތުގައި އެމްއާރުއެމަށް ދެ ވަނަ ފަހަރަށް ނޯޓިސް ފޮނުވީ ފެބުރުއަރީ 22 ގައެވެ. އަދަދު ހަމަކުރަން ދިން މުއްދަތުގައި އެކަން ނުވެއްޖެ ނަމަ އޮންނާނީ ޕާޓީ އުވާލުން ކަމަށް އީސީން ބުނެފައިވެއެވެ.
އިލެކްޝަންގެ މިނިންމެވުމާއިއެކު އެމްއާރުއެމްގެ ޒައީމް ރައީސް މައުމޫން ކުރެއްވި ޓުވީޓުގައި ވިދާޅުވީ މިއީ ޤާނޫނާއި ޚިލާފް ކޮރަޕްޓް ޢަމަލެއްގެ ގޮތުގައި ސިފަ ކުރައްވާފައެވެ. ރައީސް މައުމޫން ވިދާޅުވީ މި ޤާނޫނާއި ޚިލާފް ޢަމަލާއި ދެކޮޅަށް ކާމިޔާބީ ހޯދާނެކަމަށެވެ.
އަހަރެމެން މި ގާނޫނާއި ހިލާފް ކޮރަޕްޓް އަމަލާއި ދެކޮޅަށް މަސައްކަތް ކުރާނަން. އަދި އިރާދަ ކުރެއްވިއްޔާ މި ގާނޫނާއި ހިލާފް އަމަލާއި ދެކޮޅަށް ކާމިޔާބު ހޯދާނަން.
– މައުމޫން ކުރެއްވި ޓްވީޓްގައި ވިދާޅުވެފައިވެއެވެ.
We will fight this illegal and corrupt procedure and win Insha Allah.
— Maumoon Abdul Gayoom (@maumoonagayoom) May 24, 2023
ރައީސް މައުމޫންގެ އިތުރުން އެމްއާރުއެމްގެ ރައީސް ފާރިސް މައުމޫން ވިދާޅުވީ މިއީ ހިންގާފައިވާ ޤާނޫނާއި ޚިލާފް ބޮޑު ޖަރީމާއެއް ކަމަށެވެ. ފާރިސް ވަނީ ކޮރަޕްޝަނާއި ދެކޮޅަށް ހުރިހާ ރައްޔިތުން ތެދުވުމަށް ގޮވާލާފައެވެ. ސިޔާސީ ނުފޫޒުން ފާޅުގައި ހިންގަމުންދާ ކޮރަޕްޝަންގެ ޢަމަލުތަކަކީ ހުއްޓުވަންޖެހޭ ކަންތައްތަކެއް ކަމަށް ފާރިސް ވަނީ ވިދާޅުވެފައެވެ.
އަހަރެމެން މި ނިންމުމާ އަދި މިކަމުގައި ހިންގި ގާނޫނާއި ހިލާފް ކަންކަމާ ދެކޮޅަށް މަސައްކަތް ކުރާނަން. އަދި އިރާދަކުރެއްވިއްޔާ މިކަމުގައި ކާމިޔާބު ހޯދާނަން. އަޅުގަނޑު ހުރިހާ ސަޕޯޓަރުންނަށް އަދި ހެޔޮއެދޭ ފަރާތްތަކަށް ގޮވާލަން ފާޅުގައި ކޮރަޕްޝަނާއި ފަސާދައާއި ފައިސާގެ ސިޔާސީ ނުފޫޒާ ދެކޮޅަށް ތެދުވަން.
– ފާރިސް ވިދާޅުވެފައިވެއެވެ.
ފާރިސް ވިދާޅުވީ އިލެކްޝަންސް ކޮމިޝަނުން ނިންމަވާފައިވާ މި ނިންމެވުމަކީ، ކޮރަޕްޝަންގެ ނާޖާއިޒު ނުފޫޒު އެކުލެވިގެން، ޤާނޫނީ ތަރަހައިން ބޭރުން ނިންމަވާފައިވާ، ޒިންމާދުރުކަން ކުޑަ ނިންމުމެއް ކަމުގައެވެ. މިކަމުން އަންގައިދެނީ، ޤައުމުގައި ފަސާދައާއި ކޮރަޕްޝަންގެ ވަކި ހިތްޕާލާފައިވާ މިންވަރުކަމަށެވެ. ހަމައެހެންމެ، ޤައުމުގައި ޤާނޫނު ހިންގުމަށް ނުކުޅެދިފައިވާ މިންވަރު ކަމަށެވެ.
އިރާދަކުރެއްވިއްޔާ، ޙައްޤުގެ މަގުގައި އަޅުގަނޑުމެން ސާބިވެ ތިބެ، ޤާނޫނީ އިމުން ބޭރުން ނިންމަވާފައިވާ މި ނިންމެވުމުގެ މައްޗަށް އަޅުގަނޑުމެން ކުރި ހޯދާނަން.
– ފާރިސް ވިދާޅުވިއެވެ.
ފަސާދައާއި، ނާޖާއިޒު މަންފާ ހޯދުމަށް ހިންގޭ ސިޔާސީ މިފަދަ ހުތުރު ޢަމަލުތަކުން ސަލާމަތްކުރުމަށް، އެމްއާރުއެމްގެ މެންބަރުންނާއި، އަދި ޕާޓީއަށް ހެޔޮ އެދިވަޑައިގަންނަވާ އެންމެހާ ފަރާތްތަކުން، ސާބިތުކަމާއެކު ދެމި ތިއްބަވައި، މި މުހިއްމު މަސައްކަތުގައި ބައިވެރިވެވަޑައިގެން ދެއްވުމަށް ފާރިސް ވަނީ ދަޢުވަތު ދެއްވާފައެވެ.
