"ކަނޑު ވިއްކުމާ ދެކޮޅު" ކޯލިޝަންގެ ނަމުގައި، އިޓްލޮސްގެ ހުކުމާއި ދެކޮޅަށް ވަލާކާތު ކުރަމުންދާ އިދިކޮޅު ފަރާތްތަކުން އުފައްދާފައިވާ ކޯލިޝަންގެ ފުރަތަމަ ނޫސްވެރިންގެ ބައްދަލުވުމުގައި އެމްއާރުއެމްއިން ބައިވެރިއެއް ނުވެއެވެ.
ޗާގޮސްގެ މައްސަލާގައި ސަރުކާރާ ޚިޔާލުތަފާތު ސިޔާސީ ފަރާތްތަކާއި ޕާޓީތަކުން އެކުވެގެން ފުރަތަމަ ބޭއްވި ނޫސްވެރިންގެ ބައްދަލުވުމުގައި އެމްއާރުއެމްއިން ބައިވެރިވެފައިވި ނަމަވެސް، މި ސިޔާސީ ފަރާތްތަކުން އުފެއްދި ކޯލިޝަނަށް ނަން ދިނުމަށްފަހު މިރޭ ކުރިޔަށްދިޔަ ފުރަތަމަ ނޫސްވެރިންގެ ބައްދަލުވުމުގައި އެމްއާރުއެމްއިން ބައިވެރިވެފައި ނުވަނީ ކޮންސަބަބަކާހެދި ކަމެއް ސާފުވެފައެއް ނުވެއެވެ.
އެހެންނަމަވެސް، ސަރުކާރު ހިންގާ ކޯލިޝަންގައި މިހާރުވެސް އޮތް އެމްއާރުއެމްއިން، ޗާގޮސްއާއި ގުޅިގެން ބޭއްވުނު ފުރަތަމަ ނޫސްވެރިންގެ ބައްދަލުވުމުގައި ބައިވެރިވިފަހުން އެޕާޓީގެ އިސްބައެއް ފަރާތްތަކުންވަނީ ކުއްލިގޮތަކަށް ޕާޓީގެ އިސް މަގާމްތަކުން އިސްތިއުފާ ދީފައެވެ.
"ކަނޑު ވިއްކުމާ ދެކޮޅު" ކޯލިޝަންއިން ބޭއްވި ފުރަތަމަ ނޫސްވެރިންގެ ބައްދަލުވުމުގައި އޭގެ ކުރީގެ ނޫސްވެރިންގެ ބައްދަލުވުމުގައި ބައިވެރިވި ބައެއް ފަރާތްތަކުން ބައިވެރިވެފައި ނުވަނީ، ޗާގޮސްގެ މައްސަލައާއި ގުޅޭގޮތުން ޚިޔާލުތަފާތުވެގެން ކަމެއްވެސް އަދި ސާފުވެފައެއް ނުވެއެވެ.
އެހެންނަމަވެސް، މިރޭގެ ނޫސްވެރިންގެ ބައްދަލުވުމުގައި ބައިވެރި ޕާޓީތަކާއި ސިޔާސީ ފަރާތްތަކާ އެއްފަދައިން އެމްއާރުއެމްއަކީވެސް ޗާގޮސްގެ މައްސަލާގައި ސަރުކާރާ ޚިޔާލު ތަފާތު ޕާޓީއެއްކަން ފާހަގަ ކޮށްލެވެއެވެ.
