"ކްރިއޭޓް ޔޯ ޑްރީމްސް ވިތް އެސްޓީއޯ"ގެ ނަމުގައި ކުޑަކުދިންގެ ދުވަހާއި ގުޅުވައިގެން ކުޑަކުދިންނަށް ޚާއްސަކޮށްގެން ކުރެހުމުގެ މުބާރާތެއް ބާއްވަން އެސްޓީއޯއިން ނިންމައިފިއެވެ.
އެސްޓީއޯއިން މަޢޫލޫމާތުދޭ ގޮތުގައި މި މުބާރާތުގައި ބައިވެރިވާން ހުޅުވާލާފައިވަނީ ތިން އުމުރުފުރާއަކަށެވެ. މުބާރާތުގައި ބައިވެރިވެވޭ އުމުރުފުރާތަކަކީ 6 އަހަރުން ދަށް، 7 އަހާރާއި 11 އަހާރާއި ދެމެދުގެ އުމުރުފުރާ އަދި 12 އަހަރާއި 16 އަހަރާއި ދެމެދުގެ އުމުރު ފުރާއެވެ. މިއިން ކޮންމެ އުމުރުފުރާއަކުންވެސް އެއްވަނަ ދެވަނަ އަދި ތިން ވަނަ ހޮވައި އަގު ހުރި އިނާމުތަކެއް ލިބިގެންދާނެ ކަމަށް އެސްޓީއޯއިން ބުނެފައިވެއެވެ.
މުބާރާތުގައި 3 ތީމެއް ވަނީ ކަނޑައެޅިފައެވެ. އެއީ "ޔޯ ޑްރީމް ބްރެކްފާސްޓް މޮމެންޓް" ، "ޑިޒައިން ޔޯރ ޑްރީމް ހައުސް" އަދި "ހެލްތީ ލައިފް ސްޓައިލް" އެވެ. ކުރެހުންތަކުގައި އެސްޓީއޯގެ ޕްރޮޑަކްޓެއް ހިމަނަން ވާނެއެވެ.
މުބާރާތުގައި ބައިވެރި ކުރާ ކުރެހުންތައް މިމަހުގެ 10 ވަނަ ދުވަހުގެ ކުރިން މެއިލް ކުރަން ޖެހެއެވެ. މެއިލް ކުރާނީ ކުރެހުމުގެ ނަމާއި، ކުރެހި ދަރިވަރުގެ މައުލޫމާތާއި ގުޅޭނެ ނަންބަރު ހިމަނާފައި [email protected] އަށެވެ. މުބާރާތުގެ އުސޫލު އެސްޓީއޯ ވެބްސައިޓުގެ ވަނީ ޝާއިއު ކުރެވިފައެވެ.
