ސަރުކާރުގެ ވިޔަފާރި ކުންފުނި ސްޓޭޓް ޓްރޭޑިންގ އޯގަނައިޒޭޝަން، އެސް.ޓީ.އޯއިން ވިއްކާ ޕެޓްރޯލާއި ޑީސަލްގެ އަގު ހެޔޮ ކުރަން ނިންމައިފިއެވެ.
އެސްޓީއޯ އިން ބުނީ ކުންފުނީގެ ސަބްސިޑިއާރީ ކުންފުނި،ފިއުލް ސަޕްލައި މޯލްޑިވްސް (އެފްއެސްއެމް)ގެ ޝެޑްތަކުން މިއަދު (މެއި 1) އިން ފެށިގެން ޕެޓްރޯލް ލީޓަރެއް ވިއްކާނީ 15.14ރ. ކަމަށާއި ޑީސަލް ލީޓަރެއް ވިއްކާނީ 15.70ރ. ކަމަށެވެ.
ކުރިން ޕެޓްރޯލް ލީޓަރެއް ވިއްކީ 15.97ރ. އަށެވެ. ޑީސަލް ލީޓަރެއް 16.32ރ. އަށެވެ. އެހެންވެ މިއީ، ޕެޓްރޯލް ލީޓަރަކުން 83 ލާރި އަދި ޑީސަލު ލީޓަރަކުން 62 މާރީގެ ހެޔޮވުމެކެވެ.
ކޯވިޑް-19 އާއި ގުޅިގެން ދުނިޔޭގެ އިގުތިސޯދަށް ކުރިމަތިވި ހީނަރުކަމުން އަރައި ނުގަނެވިގެން އުޅެނިކޮށް ރަޝިއާ އިން ޔޫކްރޭނާއި ދެކޮޅަށް ހަނގުރާމަ ފެށުމުން ދުނިޔޭގެ ބާޒާރުގައި ތެލުގެ އަގު ވަރަށް ބޮޑަށް އުފުލެން ފެށިއެވެ. ދުނިޔޭގެ ބާޒާރުގައި ތެލުގެ އަގު އުފުލެން ފެށުމުން ރާއްޖޭގައި ވެސް ފަސް ފަހަރެއްގެ މަތިން ތެލުގެ އަގު ބޮޑުކޮށްފައިވެ އެވެ.
ނަމަވެސް ތެލުގެ އަގު ދަށަށް ދާން ފެށުމުން މިދިޔަ އޮގަސްޓް މަހު ތެލުގެ އަގު ހެޔޮ ކުރިއެވެ. އޭޕެކް އިން ތެޔޮ އުފައްދާ މިންވަރު އިތުރު ކުރުމާއި އަދި އެމެރިކާގެ ފެޑްރަލް ރިޒާވް އިތުރުވެފައިވާ ކަމަށް މިދިޔަ ހަފްތާގައި އިއުލާން ކުރުމުން މިހާރު ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް ހެޔޮ ވެފައެވެ.
