ސްޓޭޓް ޓްރޭޑިންގް އޯގަނައިޒޭޝަން، އެސްޓީއޯއިން މިއަދު އާންމުކުރި މާލީ ރިޕޯޓުން ދައްކާ ގޮތުގައި އަހަރުގެ ފުރަތަމަ ކުއާޓަރުގައި އެ ކުންފުންޏަށް 4.4 ބިލިއަން ރުފިޔާގެ އާމްދަނީއެއް ލިބިފައިވެއެވެ. އެއީ މިދިޔަ އަހަރު ފުރަތަމަ ކުއާޓާއާ އަޅާބަލާއިރު 10 ޕަސެންޓުގެ ކުރިއެރުމެކެވެ.

ކުންފުނީގެ ޖުމުލަ އާމްދަނީ އިތުރުކުރެވުމާއި އެކު ޖުމްލަ ފައިދާގެ ގޮތުގައި އެކުންފުންޏަށް ވަނީ 809 މިލިއަން ރުފިޔާ ލިބިފައެވެ. އެއީ އޭގެ ކުރީ ކުއާޓާރއާއި އަޅާބަލާއިރު 19 އިންސައްތައިގެ ކުރިއެރުމެކެވެ.

މާލީ ރިޕޯޓް ދައްކާ ގޮތުން ޓެކްސްއަށް ކެނޑުމުގެ ކުރިން ފުރަތަމަ ކުއާޓާގައި އެސްޓީއޯއަށް ލިބުނު ސާފު ފައިދާއަކީ 436 މިލިއަން ރުފިޔާއެވެ. އަދި ޓެކުހަށް ކެނޑުމަށްފަހު، ސާފު ފައިދާގެ ގޮތުގައި 368 މިލިއަން ރުފިޔާ ލިބިފައެވެ. އެއީ އޭގެ ކުރީ ކުއާޓާއާ އަޅައިބަލާއިރު 37 ޕަސެންޓުގެ ކުރިއެރުމެކެވެ.

އެސްޓީއޯގެ ފައިދާ އިތުރުވީ އެ ކުންފުނިން ބުނާ ގޮތުން، ކުންފުނިން ކުރަމުން ގެންދާ ވިޔަފާރީތައް ރަގަޅުކުރެވި ޖުމުލަ ފައިދާ އިތުރުވުމާއެކު ހިންގުމުގެ ހަރަދު އޭގެ ކުރީ ކުއާޓާއަށްވުރެ ކުޑަކުރުމުންނެވެ.

އެސްޓީއޯ އަށް މިދިޔަ އަހަރު ވަނީ ޖުމްލަ އާމްދަނީގެ ގޮތުގައި 18.2 ބިލިއަން ރުފިޔާ ލިބި، ސާފު ފައިދާގެ ގޮތުގައި 742 މިލިއަން ރުފިޔާ ލިބިފަ އެވެ. މިއީ 2021 ވަނަ އަހަރުގެ އާމްދަނީ އަށް ވުރެ 80 ޕަސެންޓް އިތުރު އަދަދެކެވެ.