މަތިންދާ ބޯޓަށް އަޅާ ތެޔޮ (ޖެޓް ފިއުލް) އުފުލުމަށް ޚާއްސަ ބާޖެއް އެސްޓީއޯ އިން ރާއްޖެއަށް ގެނެސްފި އެވެ.
އެސްޓީއޯއިން މަޢުލޫމާތުދޭ ގޮތުގައި "ލަގަނާ"ގެ ނަން ދީފައިވާ މި ބާޖުގެ މައިގަނޑު މަސައްކަތަކަށް ވާނީ ނ. މާފަރު އިންޓަނޭޝަނަލް އެއާޕޯޓަށް ބޭނުންވާ ޖެޓް އޭ-1 ތެޔޮ ސަޕްލައި ކޮށްދިނުމެވެ.
ހަންސާކޮންސަލްޓް ޕްރޮޖެކްޓްސްގެ ކޮންސަލްޓެންސީ ލިބިގެން ބަނދެފައިވާ މި ބާޖަކީ ޒަމާނީ މިނެކިރުމުގެ ވަސީލަތްއް ގާއިމުކޮށްފައިވާ 200 ކިއުބިކް މީޓަރުގެ ޖާގައިގެ އުޅަނދެކެވެ.
މިބާޖަކީ ފިއުލް ކޮލިޓީގެ ޝަރުތުތައް ފުރިހަމަކޮށް، ކޮލިޓީ އެޝުއަރެންސް ކޯޑްތަކާ އެއްގޮތަށް އޭވިއޭޝަނަށް އިންޑަސްޓްރީ ސްޓޭންޑާޑް ފިލްޓަރުތަކާ އެކު ކޮމިޝަން ކޮށްގެން ރާއްޖެ ގެނައި އުޅަނދެކެވެ.ބާޖުގައި މަސައްކަތް ކުރާ މުވައްޒަފުންނަށް އޭވިއޭޝަން ފިއުލް ހެންޑްލިންގެ ފީލްޑް ތަމްރީންތަކާއި ކަމާގުޅޭ އޮޕަރޭޝަން މެނުއަލްތަކާއި ލިޔެކިޔުންތައް ފޯރުކޮށްދީފައިވާ ކަމަށްވެސް އެސްޓީއޯ އިން މައުލޫމާތު ދީފައިވެ އެވެ.
ލަގަނާ ބާޖަކީ އިންޑަސްޓްރީގެ ބެސްޓް ޕެރެކްޓިސްއާއި އެއްގޮތަށް ޖެޓް އޭ-1 ތެޔޮ ރިފައިނަރީން ފެށިގެން ފްލައިޓާ ހަމައަށް ޓްރޭސް ކުރެވޭނެ ކޮލިޓީ އެޝުއަރެންސް ނިޒާމެއް ގާއިމުކޮށްފައިވާ ބާޖެއްކަމަށް އެސްޓީއޯއިން ހާމަކޮށްފައިއެވެ. އަދި ކޮންމެ ޓްރާންސްފާ ޕޮއިންޓަކުން ތެލުގެ ސާމްޕަލް ނަގައި މާލޭގައި ގާއިމުކޮށްފައިވާ އެސްޓީއޯގެ ލެބޯޓްރީގައި ޓެސްޓްކުރެވޭނެ އިންތިޒާމުވެސް ވަނީ ހަމަޖައްސާފަ އެވެ.
އެސްޓީއޯ އިން ތެޔޮ ރައްކާ ކުރާ ލ. ފުނަދޫގައި މި ބާޖު ވަނީ ނޫސްވެރިންނަށް ދައްކާލާފަ އެވެ.
