ވެރިކަން ކުރާ ކޯލިޝަންގައި ހިމެނޭ އެމްއާރުއެމްގެ ކައުންސިލް މެމްބަރުންގެ ތެރެއިން ސަރުކާރުގެ އެކިމަޤާމުތަކުގައި ތިއްބެވި ބޭފުޅުންގެ މެދުގައި ޚިޔާލްތަފާތުވެ ބަހުގެ ހަމަލާތަކެއް ބަދަލުކޮށްފިއެވެ.
ސަރުކާރު ކޯލިޝަންގައި ހިމެނޭ އެމްއާރުއެމްއަށް ރައީސް އިބްރާހިމް މުހައްމަދު ޞާލިހާއިއެކު ރިޔާސީ އިންތިޚާބުގައި ކުރިއަށް ދިއުމަށް ދައުވަތު ދީފައިވާއިރު، އެޕާޓީން ވަނީ ރައީސް ޞާލިހާއިއެކު ބައްދަލުވުމެއްވެސް ބާއްވާފައެވެ. ނަމަވެސް ކޯލިޝަން ހެދުމާއިމެދު މިހާތަނަށްވެސް ވަކި ގޮތެއް ނިންމާފައި ނުވެއެވެ. އެމްއާރުއެމްއަށް ކޯލިޝަންގެ ދައުވަތު ޖުމްހޫރީ ޕާޓީއާއި، ޕީޕީއެމްއެމުންވެސް ވަނީ ދީފައެވެ. ނަމަވެސް އެޕާޓީން އަދި އެއްވެސް ބަޔަކާއި ކޯލިޝަން ހެދުމާއި ގުޅޭގޮތުންވެސް އަދި އިންތިޚާބުގައި ކުރިއަށްދާނެ ގޮތަކާއި ގުޅޭގޮތުންވެސް ވަކި ގޮތެއް ނުނިންމައެވެ.
އެމްއާރުއެމްގެ ކައުންސިލްގައި ހިމެނޭ މެމްބަރުންގެ ތެރެއިން ސަރުކާރުގެ އެކި މަޤާމުތަކުގައި ތިއްބެވި ބޭފުޅުންގެ މެދުގައި ވަނީ ރިޔާސީ އިންތިޚާބުގައި ކުރިއަށްދާނެ ގޮަތަކާއިމެދު ޚިލާޔް ތަފާތުވެ، ބަހުގެ ހަމަލާތަކެއް ބަދަލުކޮށްފައެވެ. ބައެއް ބޭފުޅުން ރައީސް ޞާލިހަށް ރިޔާސީ އިންތިޚާބުގައި ތާއީދުކޮށް ވާހަކަދެއްކިއިރު، ބައެއް ބޭފުޅުން ވަނީ ސަރުކާރަށާއި ރައީސް ޞާލިހަށް ވަރަށް ބޮޑަށް ފާޑު ކިޔާފައެވެ.
ރައީސް ޞާލިހަށާއި ސަރުކާރަށް ފާޑުކީ ބޭފުޅުންގެ ތެރޭގައި، ހަޔަ އެޑިއުކޭޝަން މިނިސްޓްރީގެ ޑެޕުއުޓީ މިނިސްޓަރ ޒަބީހުއާއި، ޔޫތު މިނިސްޓްރީގެ ޑެޕިއުޓީ މިނިސްޓަރ އަނީސްއާއި، އެންވާރުމަންޓް މިނިސްޓްރީގެ ޑެޕިއުޓީ މިނިސްޓަރ ޒިޔާންއާއި، އެންވާރުމަންޓް މިނިސްޓްރީގެ ޑެޕިއުޓީ މިނިސްޓަރ ޝަހީދާއާއި، ހޯމް މިނިސްޓްރީގެ އެގްޒެކެޓިވް ނިޝާނާއާއި، ހެރިޓޭޖްގެ ކޯޑިނޭޓަރ ތޯއިފް ހިމެނެއެވެ.
މިބޭފުޅުން މައިގަނޑު ގޮތެއްގައި ވިދާޅުވީ އަދާކުރަމުންދާ ސިޔާސީ މަޤާމަކީ ރައީސް ޞާލިހު ދެއްވި މަޤާމެއް ނޫންކަމަށެވެ. އެއީ ރައީސް ޞާލިހު ވެރިކަމަށް ގެނައުމަށް އެމްއާރުއެމްއިން ކުރި މަސައްކަތުގައި ޕާޓީން ދިން މަޤާމެއްކަމަށެވެ. ސިޔާސީ މަޤާމެއްގައި ހުރުމަކީ ރިޔާސީ ރޭހުގައި ރައީސް ޞާލިހަށް ތާއީދުކުރަންޖެހޭ ސަބަބެއް ނޫންކަަމަމަށް އެބޭފުން ވަނީ ވިދާޅުވެފައެވެ.
އަދި ވެރިކަމުގެ ތެރޭގައި އެމްއާރުއެމްއިން ރައީސް ޞާލިހާއި މަޝްވަރާ ކުރަން އުޅުނު ކޮންމެ ފަހަރެއްގައި ރައީސް ޞާލިހު އެފުރުސަތު ދެއްވާފައި ނުވާކަމަށާއި، މިހާރު ކުއްލިއަކަށް ކޯލިޝަން ހެދުމަށް މަޝްވަރާ ކުރަން ފުރުސަތު އޮންނަންވީ ސަބަބެއް ނެތްކަމަށް ފާޑުކީ މެމްބަރުން ވަނީ ވިދާޅުވެފައެވެ. މިބޭފުޅުން ވިދާޅުވީ ރައީސް މައުމޫންގެ އިޝާރާތެއް މިވަގުތު ލިބުނު ނަމަވެސް މަޤާމު ދޫކޮށްލަން ތައްޔާރަށް ތިބިކަމަށެވެ.
އެމްއާރުއެމްގެ ވަޒީފާތަކުގައި ތިއްބި ބޭފުޅުންގެ ތެެރެއިން ރައީސް ޞާލިހަށް ތާއީދުކޮށް ވާހަކަ ދެެއްކީ އެމްޓީޑީސީގެ މެނޭޖިން ޑިރެކްޓަރ ތަޒްމީލްއާއި، އެމްއައިޓީޑީސީގެ މެނޭޖިން ޑިރެކްޓަރ ރާއިދު އާއި، ޔޫއޭއީގެ ޑިޕިއުޓީ އެމްބަސަޑަރ ފައިސަލްއާއި، އެޗްޑީސީގެ ބޯޑު މެމްބަރު އަފްރާތުގެ އިތުރުން ހެރިޓޭޖް މިނިސްޓްރީގެ އިންފޮމޭޝަން އިފިސާ ނާއިލް ހިމެނެއެވެ.
މިބޭފުޅުންގެ ތެރެއިން ޔޫއޭއީގެ ޑިޕިއުޓީ އެމްބަސަޑަރ ފައިސަލް ވިދާޅުވީ ޖުމްހޫރީ ޕާޓީން ރައީސް ނަޝީދާއިއެކު ކުރާ މަސައްކަތުގައި ބައިވެރިވުމަކީ އެމްއާރުއެމްއިން ކުރުން އެހާ ރަނގަޅުކަމެއް ނޫންކަމަށެވެ. ނަޝީދަކީ އަބަދުވެސް މައުމޫނުގެ ލެގަސީ ދުއްވާލަން އުޅުއްވާ ބޭފުޅެއްކަމަށާއި، އެވަރުގެ މީހަކާއިއެކު މަސައްކަތް ކުރަން ރަނގަޅު ނޫންކަމަށް ވަނީ ބުނެފައެވެ.
އެމްއައިޓީޑީސީގެ މެނޭޖިން ޑިރެކްޓަރ ރާއިދު ވިދާޅުވީ ސިޔާސީ މަޤާމަކީ ރައީސް ޞާލިހު ދެއްވާ އެއްޗެއްކަމަށެވެ. ރައީސްގެ ސިޔާސަތު ކަމު ނުދާނަމަ ފާޑު ނުކިޔައި އެންމެ ރީތި ގޮތަކީ މަޤާމުތަކުން އިސްތިއުފާ ދިނުންކަމަށް އޭނާ ވިދާޅުވިއެވެ. އޭނާ ވިދާޅުވި މި ފަސްއަހަރުގެ ތެރޭގައި ރައީސް ޞާލިހުގެ ސަރުކާރުން އެމްއާރުއެމްއަށް ކުޑައިމީސްކޮށް އެއްވެސް ކަމެއް ކޮށްފައި ނުވާކަމަށެވެ. އަދި ރައީސް މައުމޫންވެސް ޕާޓީގެ އެހެން މީހަކުވެސް ޖަލަށް ލައި އަނިޔާކޮށްފައި ނުވާކަމަށެވެ.
ރައީސަަށް ތާއީދުކޮށް ވާހަކަ ދެއްކެވި މެމްބަރުން ވަނީ އަދިވެސް އެންމެ ރަނގަޅުގޮތަކީ ރައީސް ޞާލިހާއިއެކު ކުރިއަށް ދިއުންކަމަށް ބުނެފައެވެ. އެމްއާރުއެމްގެ ކައުންސިލްގައި ހިމެނޭ ސިޔާސީ މަޤާމުތަކުގައި ތިއްބެވި ބޭފުޅުންގެ މެދުގައި ބަހުގެ ހަމަލާތަކެއް ބަދަލުކޮށްފައިވާއިރު، އެޕާޓީގެ ލީޑަރޝިޕްގެ ވިސްނުން މިހާތަނަށް ހާމަކޮށްފައިވާ ގޮތުން ރައީސް ޞާލިހާއިއެކު އެޕާޓީން ރިޔާސީ އިންތިޚާބުގައި ކުރިއަށް ނުދާނެކަން ވަނީ ޔަގީންވެފައެވެ.
