އިދިކޮޅު ރިޔާސީ ކެނޑިޑޭޓް ރައީސް ޔާމީން މިނިވަން ކުރުމަށް ގޮވާލާ އިދިކޮޅު ކޯލިޝަނުން ކުރަމުންދާ އިހުތިޖާޖުތައް މި ރަމަޟާން މަހު ވެސް ކުރިއަށް ގެންދަން އެ ކޯލިޝަނުން ނިންމައިފިއެވެ.
އިދިކޮޅު ހަރަކާތްތަކުގައި އިސްކޮށް އުޅުއްވާ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލް ވިދާޅުވީ، ޔާމީން މިނިވަން ކުރުމަށް ގޮވާލާ ކުރިއަށް ގެންދާ ސުލްހަވެރި މަގުމަތީ ހަރަކާތްތައް ރޯދަ މަހުގެ ފުރަތަމަ ދުވަހަށް މެދުކަނޑާލުމަށް ފަހު ރޭ ފެށިފައިވާ ކަމަށެވެ.
އެގޮތުން ކޮންމެ ރެއަކު ވެސް ރޭގަނޑު 21:30 އިން 23:30 އަށް ޕީޕީއެމް އޮފީސް ކުރިމަތީ އިހުތިޖާޖު ކުރިއަށްދާނެ ކަމަށް އޭނާ ވިދާޅުވިއެވެ. މުހައްމަދު އިސްމާއީލް ވިދާޅުވީ، ރޯދައަށް އިހުތިޖާޖު ހުއްޓާ ނުލަން ނިންމީ އެއްވެސް ރޯދަމަހެއްގައި ސަރުކާރުން އިދިކޮޅު ލީޑަރަށް ލުޔެއް ނުދޭތީކަމަށާއި ކޮންމެ ރޯދަ މަހެއްގައި އެމަނިކުފާނު ހުންނަވަން ޖެހެނީ ކޮންމެ ވެސް ބަންދެއްގައި ކަމަށެވެ.
ވ. އާރަށު މައްސަލައާއި ރައީސް ޔާމީންގެ މައްޗަށް އުފުލާފައިވާ މަނީ ލޯންޑްރިންގެ ދަޢުވާ އާއި، ރިޝްވަތު ޤަބޫލުކުރުމުގެ ކުށުގެ ދައުވާ ސާބިތުވުމުން އެމަނިކުފާނު 11 އަހަރަށް ޖަލަށްލާން ހުކުމް ކޮށްފައިވަނީ މިދިޔަ ޑިސެމްބަރު މަހުގެ 25 ވަނަ ދުވަހުއެވެ. އެއާއި އެކީ ޔާމީންގެ ސަޕޯޓަރުން އަންނަނީ އެމަނިކުފާނު މިނިވަން ކުރުމަށް ގޮވާލާ މާލޭގައި އިހުތިޖާޖު ކުރަން ފަށާފައެވެ.
މިއަހަރު ބާއްވާ ރިޔާސީ އިންތިޚާބުގައި އިދިކޮޅު ކެނޑިޑޭޓަކީ ރައީސް ޔާމީންކަމަށް އިދިކޮޅުން ދަނީ ބުނަމުންނެވެ. އަދި އެމަނިކުފާނުގެ ނަން ވޯޓު ކަރުދާހުގައި އޮންނާނެކަމަށް ދަނީ ތަކުރާރުކޮށް ބުނަމުންނެވެ.
