މިހާރު ކުރިޔަށްދަނީ ފަރެސްމާތޮޑާ އެއަރޕޯޓު ހުޅުވުމުގެ އެންމެ ފަހުގެ ތައްޔާރީތައް

ފަރެސްމާތޮޑާ އެއަރޕޯޓު އުމްރާނީ ހުރިހާ މަސައްކަތަތަކެއް ނިމި، އެއަރޕޯޓު ހުޅުވުމަށް ވާންޖެހޭ އެންމެ ފަހުގެ ތައްޔާރީތައް ވާން ފަށައިފިއެވެ.

ކަމާއި ގުޅުންހުރި މުވައްސަސާތަކުން ހާމަ ކޮށްފައިވާ ގޮތުގައި، އެއަރޕޯޓުގެ ކޮންޓްރެކްޓަރކަމަށްވާ، އެމްޓީސީސީގެ އަމާޒަކީ އަންނަ މާރޗްމަހުގެ 15 ވަނަ ދުވަހުގެ ކުރިން އެއްޕޯޓުގެ އެންމެ ފަހުގެ މަސައްކަތްތައް ނިންމާލުން ކަމުގައެވެ. މިގޮތުން އެމްޓީސީސީން، އެއަރޕޯޓުގެ އެންމެ ފަހުގެ މަސައްކަތްތައް ބާރު ސްޕީދުގައި ކުރިޔަށް ގެންދާއިރު، އެއަރޕޯޓު ނިމުމުގެ ކުރިން ކުރިޔަށް ގެންދާންޖެހޭ އިންސްޕެކްޝަންގެ މަސައްކަތްތައްވެސް ކަމާއި ގުޅުންހުރި އިދާރާތަކުން މިހާރުވަނީ ފަށާފައެވެ.

މިއެއަރޕޯޓުގެ އެންމެ ފަހުގެ މަސައްކަތް ކުރިޔަށް ދާގޮތުގެ މައުލޫމާތު ނޫސްވެރިންނާ ހިއްސާ ކުރައްވަމުން، އެމްޓީސީސީގެ ސީއީއޯ އާދަމް އާޒިމް ވިދާޅުވެފައިވާ ގޮތުގައި، މި ޕްރޮޖެކްޓުގައި ހިމެނޭ އުމްރާނީ ތަރައްގީއާއި ގުޅުންހުރި ހުރިހާ މަސައްކަތްތަކެއް މިހާރު ވަނީ ނިމިފައެވެ. އަދި އޭނާ ވިދާޅުވީ، އެއަރޕޯޓަށް ބޭނުންވާ ފަޔަރ ލޮރީ އެރަށަށް ގެންދިއުމުގެ ދަތުރު މިހާރު ފެށިފައިވާކަމުގައެވެ.

ފަރެސްމާތޮޑާ އެއަރޕޯޓްގެ ޢަމަލީ މަސައްކަތް ފަށާފައިވަނީ 2021ވަނަ އަހަރުގެ ޖެނުއަރީ މަހުއެވެ. މި އެއަރޕޯޓް ތަރައްޤީކުރަނީ ކައިރީގައި ހުރި ކުދި ރަށްތަކެއް ހިއްކައިގެންނެވެ. އެއީ 19.9 ހެކްޓަރުގެ ބިމުގެ ސަރަޙައްދެކެވެ. ބިން ހިއްކުމުގެ މަސައްކަތް 2019ވަނަ އަހަރު ނިންމި ނަމަވެސް، ދިގު މުއްދަތެއްވަންދެން އެއަރޕޯޓްގެ ޢަމަލީ މަސައްކަތް އޮތީ ނުފެށިއެވެ. އެއަރޕޯޓްގެ ޢަމަލީ މަސައްކަތް ކުރުމަށް އެމްޓީސީސީއާ ހަވާލުކުރީ 2021 ވަނަ އަހަރުގެ ނޮވެމްބަރުމަހުއެވެ.

އެމްޓީސީސީން ޢަމާޒު ހިފާފައިވަނީ އެއަރޕޯޓްގެ ޢަމަލީ މަސައްކަތްތައް މުޅިން ނިންމާ، ޖުލައި މަސް ތެރޭގައި ސަރުކާރާއި އެއަރޕޯޓް ހަވާލުކުރުމަށެވެ. އެއަރޕޯޓް ތަރައްޤީކުރަނީ އެތެރޭގެ އުދުހުންތަކަށް ޚާއްސަކޮށްގެންނެވެ. ރަންވޭއަކީ 1200 މީޓަރުގެ ދިގު ރަންވޭއެކެވެ. ފަރެސްމާތޮޑާ އެއަރޕޯޓްގެ ޓަރމިނަލްވެސް ތަރައްޤީކުރަނީ ތަފާތު ސްޓްރަކްޗަރއަކަށެވެ. މިއީ ޕްރީ ފެބްރިކޭޓެޑް އިމާރާތަކެވެ.

މި ޕްރޮޖެކްޓަކީ ސަރުކާރުން 144.8 މިލިއަން ޚަރަދުކޮށްގެން ކުރިއަށްގެންދާ މަޝްރޫޢެކެވެ.