ރިޒާއަކީ ޤައުމަށާއި، އަދި މާލެ އަތޮޅަށް ގިނަ ގުނަ ޚިދުމަތްތަކެއް ކޮށްދެއްވި ބޭފުޅެއް ކަމުގައި ކ. އަތޮޅު ކައުންސިލްގެ ރައީސް މުހައްމަދު ނިމާލް ވިދާޅުވެއްޖެއެވެ.
ރިޟާ އަވަހާރަވީ ކެންސަރުގެ އާލާސްކަންފުޅަކަށް މެލޭޝިއާގައި ފަރުވާ ހޯއްދަވަމުން ދަނިކޮށް ރޭގެ ވަގުތެއްގައެވެ. ރިޞާ އަވަހާރަ ވުމާއި ގުޅިގެން މާލެ އަތޮޅު ކައުންސިލް ރައީސް ނިމާލް ވިދާޅުވީ މިޚަބަރު އެހީ ނުހަނު ފުން ހިތާމައާއި އެކުގައިކަމަށެވެ. އަދި މިއީ މުޅި ޤައުމަށާއި، މާލެ އަތޮޅަށާއި، ގުރައިދޫ ދާއިރާއަށް ލިބިގެންދިޔަ ބޮޑު ހިތާމައެއްކަމަށް ނިމާލް ވިދާޅުވިއެވެ.
އޭނާ ވިދާޅުވީ ރިޒާއަކީ އެމަނިކުފާނުގެ ޚިދުމަތް އިހުލާސްތެރި ކަމާއިއެކު ދެއްވި މުޅި ޤައުމު ފަޚުރުވެރިވާ ދަރިއެއްކަމަށެވެ. ވަކިން ޚާއްސަކޮށް ޕީޕީއެމްއަށް އެތައް ޚިދުމަތްތަކެއް ކޮށްދެއްވި ބޭފުޅެއްކަމަށެވެ.
އެމަނިކުފާނަކީ މާލެ އަތޮޅަށާއި، ގުރައިދޫ ދާއިރާއަށް ނުހަނު ގިނަ ގުނަ ޚިދުމަތްތަކެއް ކޮށްދެއްވި ބޭފުޅެއް. އަދި މުޅި ޤައުމަށާއި ވަކިން ޚާއްސަކޮށް ޕީޕީއެމްއަށް ނުހުނު އިޚްލާސްތެރި ބޭފުޅެއް. އަވަހާރަވި ޚަބަރު އަޑުއެހީ ވަރަށް އަސަރާއިއެކު. ގެއްލިގެން އެދިޔައީ ވަރަށް ޚިދުމަތްތެރި ބޭފުޅެއް، ވަކިވެގެން އެދިޔައީ ނުހަނު ގާތް ރަހުމަތްތެރިއެއް. އަޅުގަނޑުގެ ބަސް ހުއްޓި ވަރަށް ވަރަށް ދެރަވެއްޖެ.
– ނިމާލް ވިދާޅުވިއެވެ.
އިދިކޮޅު ޕީޕީއެމްގެ މެމްބަރެއްގެ ގޮތުގައި މަޖިލިސް ތަމްސީލުކުރައްވަމުން ގެންދެވި ރިޟާއަކީ މަޖިލީހުގައި އެންމެ ގިނަ ދުވަސްވީ އެއް މެމްބަރެވެ. ރިޟާ ވަނީ، ނިމުނު 3 ދައުރުގައިވެސް މެންބަރުކަން ކުރައްވާފައެވެ. ރިޟާ ގެންދެވީ މަޖިލީހުގެ ޖުޑިޝަރީއާއި، މިނިވަން މުވައްސަސާތަކުގެ ކޮމިޓީގެ މެންބަރުކަންވެސް ކުރައްވަމުންނެވެ.
ޤާނޫނީ ވަކީލުކަންވެސް ކުރައްވަމުން ގެންދެވި ރިޟާ ވަނީ ރައްޔިތުން މަޖިލީހުގެ މިދިޔަ ދައުރުގައި އެމަޖިލީހުން ޖޭއެސްސީއަށްް ކަނޑައެޅުއްްވި މެމްބަރުގެ ގޮތުގައި އެ ކޮމިޝަންގައިވެސްް މަސައްކަތް ކުރައްވާފައެވެ. އަދި ޖޭއެސްސީގެ ނައިބު ރައީސްގެ މަޤާމުވެސް ރިޟާވަނީ ފުރުއްވާފައެވެ.
ރިޟާ އަވަހާރަވުމާ ގުޅިގެން ރައްޔިތުންގެ މަޖިލީހުގެ ރައީސްވެސް އެއާއިލާއަށް ތަޢުޒިޔާ ފޮނުއްވާފައެވެ. ރައީސް ނަޝީދުގެ މެސެޖްގައިވަނީ ރިޟާއަކީ މަޖިލީހުގެ މެމްބަރުކަން 3 ދައުރުގައި ކުރެއްވި އަދި ރާއްޖޭގެ ސިޔާސީ ހަޔާތުގެ ނުހަނު ބޮޑު ބައިވެރިއެއް ކަމަށެވެ. އަދި ރާއްޖެ ސިޔާސީ ޕާޓީގެ ނިޒާމަށް ބަދަލުކުރުމުގެ ހިއްސާދާރެެއް ކަމަށްވެސް މަޖިލީހުގެ ރައީސްވަނީ ވިދާޅުވެފައެވެ. ރައީސް ނަޝީދުވަނީ މަރުހޫމަށް ސުވަރުގެ މިންވަރު ކުރައްވާ އާއިލާއަށް ކެތްތެރިކެން ދެއްވުން އެދި ދުއާ ކުރައްވާފައެވެ.
