އެމްޑީޕީގެ ރައީސް މުހައްމަދު ނަޝީދާމެދު ޒާތީ އެއްވެސް މައްސަލައެއް ނެތްކަމަށާއި، އެހެންނަމަވެސް ނަޝީދަށްޓަކާ ކުރިން ވީހެން ދެން އެ ގުރުބާނީ ވެވެން ނެތްކަމުގައި އައްޑޫ ސިޓީގެ މޭޔަރު އަލީ ނިޒާރު ވިދާޅު ވެއްޖެއެވެ.
ރޭ އައްޑޫ ސިޓީގައި ބޭއްވުނު ރައީސް ސާލިހު ބައިވެރިވެވަޑައިގެންނެވި، ކެމްޕޭންގެ ބޮޑު ޖަލްސާގައި ވާހަކަ ދައްވަމުން އަލީ ނިޒާރު ވިދާޅުވީ ރާއްޖޭގެ ހުރިހާ ރައްޔިތުންގެ ތާއީދާއެކުވެސް، އަދި ބައިނަލްއަގުވާމީ ލީޑަރުންގެ ތާއީދާއެކުވެސް ރާއްޖޭގެ ވެރިކަމަށް ގެނައުމަށް ފުރުސަތު އެންމެ ބޮޑުކޮށް އޮތީ ރައީސް އިބުރާހިމް މުހައްމަދު ސާލިހު ކަމަށެވެ.
އަދި އެއީ އެއްވެސް ޝައްކެއް އޮތްކަމެއް ނޫންކަމަށާއި، އެ ހަގީގަތް ގަބޫލުކުރާންޖެހޭ ކަމަށް ވިދާޅުވަމުން ނިޒާރު ވިދާޅުވީ އެމްޑީޕީގެ ރައީސް މުހައްމަދު ނަޝީދާ ދެތެރޭގައި ޒާތީ އެއްވެސް މައްސަލައެއް ނެތްކަމުގައެވެ. އަދި ނިޒާރު ވިދާޅުވީ ނަޝީދަކީ އިހުތިރާމްކުރާ، ޕާޓީގެ ލީޑަރުކަމަށްވި ނަމަވެސް، އިތުރަކަށް ނަޝީދަށްޓަކާ އެ ގުރުބާނީ ދެން ވެވެން ނެތް ކަމުގައެވެ.
ރައީސް ނަޝީދާ ދޭތެރޭގާ އަޅުގަޑުގެ އެއްވެސް މައްސަލައެއް ނެތް. އަޅުގަޑާ އެއްވެސް މައްސަލައެއް ނެތް… އެހެން ނަމަވެސް އަޅުގަޑުމެންނަށް އެ ގުރުބާނީއެއް، އަޅުގަޑުމެންނަކަށް އިތުރަކަށް އެ ގުރުބާނީއެއް އެގޮތަކަށް ވެވޭކަށް ނެތް.
ރޭގެ ޖަލްސާގައި ވާހަކަ ދައްކަވަމުން ނިޒާރު ވިދާޅުވިއެވެ.
ނިޒާރު އިތުރަށް ވިދާޅުވީ މިހާރު ކުރާން މިއުޅޭ މަސައްކަތަކީ ޕާޓީއަށް ވެރިކަން ހޯދުމަށްޓާކާ ރާއްޖޭގެ ހުރިހާ ރައްޔިތުން ވޯޓު ދޭނެ، ނުވަތަ އެންމެ ފުރުސަތު ބޮޑު ގޮތެއް ހޯދުން ކަމަށެވެ. އަދި އެފުރުސަތު ތަނަވަސް ވެގެންދާނީ އައްޑޫ ރައްޔިތުންވެސް ހިމެނޭހެން ރާޖޭގެ ގިނަ ރައްޔިތުން ނިކުމެ މި ޕްރައިމަރީ އިބުރާހިމް މުހައްމަދު ސާލިހަށް ދެއްވުމުން ކަމުގައިވެސް އަލީ ނިޒާރު ވިދާޅުވިއެވެ.
ރޭ އައްޑޫ ސިޓީގެ ހިތަދޫގައި ބޭއްވުނު، ރައީސް ސާލިހުގެ "އެމްޑީޕީ ކުރިޔަށް" ޖަލްސާއަކީ ރައީސް ސާލިހުގެ ޕްރައިމަރީ ކެމްޕޭން ނިންމާލުމުގެ ގޮތުން އައްޑޫ ސިޓީގައި ބޭއްވުނު ޖަލްސާއެކެވެ. މި ޖަލްސާއަށް އައްޑޫ ސިޓީގެ ރައީސް ސާލިހަށް ތާއީދުކުރާ އެމްޑީޕީގެ ގިނަ އަދަދެއްގެ މެމްބަރުން ހާޒިރުވެފައި ވާއިރު، މާލޭ ސިޓީގައި ރައީސް ނަޝީދުގެ ކެމްޕޭނުންވަނީ ބޮޑު ޖަލްސާއެއް ބާއްވާފައެވެ.
މި ޖަލްސާއަށްވެސް ނަޝީދަށް ތާއީދުކުރާ އެމްޑީޕީގެ ގިނަ އަަދަދެއްގެ މެމްބަރުން ހާޒިރުވެފައި ވެއެވެ.
އެމްޑީޕީގެ ރިޔާސީ ޕްރައިމަރީގެ ވޯޓުލުން މާދަމާ ބޭއްވުމަށް ހަމަޖެހިފައިވާއިރު، ދެ ކެނޑިޑޭޓުންވެސް ދަނީ ވަރަށް ފޯރީގައި ކެމްޕެއިން ކުރައްވަމުންނެވެ. އަދި ރައީސް ޞާލިހުވެސް ރައީސް ނަޝީދުވެސް ވިދާޅުވަމުންދަނީ މިއިންތިޚާބު ބޮޑު ތަފާތަކުން ކާމިޔާބު ކުރްއްވަނެ ކަމުގައެވެ.
އެމްޑީޕީން ބުނެފައިވަނީ މި އިންތިޚާބުގައި 200އަށް ވުރެ ގިނަ ވޯޓު ފޮށި ބެހެއްޓުމަށް ނިންމާފައިވާކަމަށެވެ. އެގޮތުން މާލެ ސަރަހައްދުގައި ޖުމްލަ 49 ވޯޓު ފޮށި ބަހައްޓާއިރު، އަތޮޅުތެރޭގައި 194 ވޯޓު ފޮށި ބަހައްޓަން އެޕާޓިން ނިންމާފައިވެއެވެ.މި އިންތިޚާބުގައި ވޯޓުލުން ކުރިއަށްދާނީ މާދަމާ ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި މޮނީޓަރުންގެ މީޑިއާތަކުންވެސް ހަރަކާތްތެރި ވާނެއެވެ. މިގޮތުން ކޮންމެ ވޯޓު ފޮއްޓެއްކައިރި އެއްވަގުތެއްގައި ހަރަކާތްތެރިވެވޭނީ ކޮންމެ ޕްރިންޓް އަދި އޮންލައިން މީޑިއާ އަކުން އެއްބޭފުޅަކަށާއި އަދި ކޮންމެ ޓީވީ ސްޓޭޝަނަކުން 2 މީހަކަށް ކަމަށް އެމްޑޕީން ވަނީ ބުނެފައެވެ.
މިއިންތިޚާބުގައި ވޯޓުލާ އެމްޑީޕީގެ ވޯޓާސް ހިމެނެނީ އެޕާޓީގެ 57،257 މެމްބަރުންނެވެ.
