ވަކި މީހެއްގެ ވަކި މަގުސަދެއް ހާސިލްކުރުމަށްޓަކާ، އެމްޑީޕީ އުފެއްދުމުގައި އިސްކޮށް ހަރަކާތްތެރި ވެފައިވާ ފަރާތްތަކަށް ހިތުހުރިހާ އެއްޗެއް ގޮވުމަކީ ޕާޓީއަށް ފައިދާހުރި ގޮތެއް ނޫންކަމުގައި ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ އެމްޑީޕީގެ ރިޔާސީ ޕްރައިމަރީގެ ކެމްޕޭންގައި، މިއަދު ހަވީރު ގއ. ވިލިގިއްޔަށް ވަޑައިގެން އެރަށުގެ އެމްޑީޕީއަށް ތާއީދުކުރާ ފަރާތްތަކާ މުޚާތަބުކޮށް ވާހަކަ ދައްކަވަމުން ރައީސް ސާލިހު ވިދާޅުވީ އެމްޑީޕީ ވުޖޫދުވީ އެތައް ބައެއްގެ ބުރަ މަސައްކަތުން ކަމަށާއި، އެއީ އެންމެ މީހެއްގެ އެކަނި މަސައްކަތެއް ނޫން ކަމުގައެވެ.
ރައީސް ވިދާޅުވީ އެމްޑީޕީ އުފެއްދުމަށް ވަރަށް އިސްކޮށް މަސައްކަތް ކުރި ފަރާތްތަކާ ދިމާލަށް އެކުރި މަސައްކަތަކުގެ އަގު ވަޒަން ނުކޮށް، ހިތުރުހުރި އެއްޗެއް އެހެން ގޮވުމަކީ އެއްޗެހި ގޮވަމުންދާ ބަޔަކަށްވެސް އަދި އެމްޑީޕީއަކަށްވެސް އޮތް ރަގަޅެއް ނޫންކަމުގައެވެ.
މިއަދު ވަކި މީހެއްގެ ވަކި މަގުސަދެއް ހާސިލް ކުރުމަށްޓަކާ މި ޕާޓީއަށްޓަކާ ގުރުބާންވީ މީހުންނާ ދިމާލަށް ބޭނުންހާ އެއްޗެއް ބޭނުން ގޮތަކަށް ކިޔުމަކީ މިޕާޓީއަށް ފައިދާހުރި ގޮތެއް ނޫން. އިންތިޚާބެއްގައި ވާދަކޮށް ކާމިޔާބު ކުރުމަށްޓަކާ މަސައްކަތް ކުރަން ޖެހޭނެ. އެހެންނަމަވެސް… މިތިއްބެވި ބޭފުޅުންނާ ދިމާލަށް އެކުރި މަސައްކަތްތަކުގެ އަގު ވަޒަން ނުކޮށް ހިތުހުރި އެއްޗެއް އެހެން ގޮވުމަކީ، އެއީކީ އެ ބޭފުޅުންނަކަށްވެސް އަދި މި ޕާޓީއަކަށްވެސް އޮތް ރަގަޅެއް ނޫން.
ކުރިޔަށްދާ ރިޔާސީ ޕްރައިމަރީގެ ކެމްޕޭންގައި ނަޝީދުއާއި އަދި ނަޝީދުއަށް ތާއީދުކުރާ ފަރާތްތަކަށް ނިސްބަތްކޮށް ރައީސް ސާލިހު ވިދާޅުވިއެވެ.
ވިލިގިލީގައި މިއަދު ހަވީރު އޮތް ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކްފާނު ކުރިޔަށް ވަޑައިގަންނަވާނީ އެމްޑީޕީގެ ހުރިހާ ބޭފުޅުންނާއެކު ކަމަށެވެ. ރައީސް ސާލިހު ވިދާޅުވީ އެމްޑީޕީއަކީ މިއަދު ރާއްޖޭގަ އޮތް އެންމެ ތާއީދު ބޮޑު ޕާޓީއަށް ވެގެންދިޔައީ ވަރަށް ގިނަ ބައެއްގެ މަސައްކަތުން ކަމަށާ އެއިން އެއްވެސް ފަރާތަކާ ދިމާލަށް އެއްޗެއް ބުނެވިގެން ނުވާނެ ކަމުގައެވެ.
ރައީސް ސާލިހު ވިދާޅުވީ ޑިމޮކްރަސީއެއްގައި އެންމެ ބޮޑު އިސްކަމެއް ދޭން ޖެހޭނީ މައިނޯރިޓީގެ ހައްގުތައް ހިމާޔަތް ކުރުމަށް ކަމަށާއި، އެހެންކަމުން ވެރިކަން ކުރާންޖެހޭނީ އެންމެން ގުޅިގެން ކަމުގައެވެ.
ކޮމެންޓު ފޮނުވާ