މިހާރު ކުރިޔަށްދާ އެމްޑީޕީގެ ރިޔާސީ ކެމްޕޭންގައި، އެމްޑީޕީގެ "އެމްޑީޕީ ކުރިއަށް" ކެމްޕޭންގެ ފަރާތުން މާލޭގައި، ރައީސް ސާލިހު ބައިވެރިވެ ވަޑައިގަންނަވާ ބޮޑު ޖަލްސާއެއް ބޭއްވުމަށް ނިންމައިފިއެވެ.
"އެމްޑީޕީ ކުރިއަށް" ކެމްޕޭންގެ ފަރާތުން ހާމަ ކޮށްފައިވާ ގޮތުގައި، މި ޖަލްސާ ބޭއްވުމަށް ހަމަޖެހިފައިވަނީ އަންނަ ހުކުރު ދުވަހުގެ ރޭ 8:30 ގައި އާޓިފިޝަލް ބީޗް ސަރަހައްދުގައެވެ.
ރައީސް ސާލިހު ބައިވެރިވެ ވަޑައިގަންނަވާ ބޮޑު ޖަލްސާއެއް މާލޭގައި ބޭއްވުމަށް ހަމަޖެހިފައި ވާއިރު، ޕްރައިމަރީގައި ވާދަކުރައްވާ އެމްޑީޕީގެ ރައީސް މުހައްމަދު ނަޝީދުވެސް ވަނީ މާލޭގައި ބޮޑު ޖަލްސާއެއް ބާއްވާފައެވެ. ރާޅުގަޑު ސަރަހައްދުގައި ބޭއްވުނު މި ޖަލްސާއެއް އެމްޑީޕީގެ ގިނަ އަދަދެއްގެ މެމްބަރުން ވަނީ ހާޒިރު ވެފައެވެ.
މިހާރު ކުރިޔަށްދާ ކެމްޕޭންގައި ރޭ ރައީސް ސާލިހުވަނީ މާލޭގެ ދާއިރާތަކުގެ ކެމްޕޭން ޓީމުތަކާއި ބައްދަލު ކުރައްވާފައެވެ. އަދި އެއަށްފަހު މިއަދުވަނީ ހއ. އަތޮޅު، ހދ. އަތޮޅު، އަދި ށ. އަތޮޅުގެ ގިނަ ރަށްތަކަކަށް ވަޑައިގެންނެވުމަށް ދަތުރުފުޅު ފައްޓަވާފައެވެ.
ރައީސްގެ މި ދަތުރުފުޅުގައި ހދ. ހަނިމާދޫ އިންޓަނޭޝަނަލް އެއާޕޯޓް ތަރައްގީ ކުރުމުގެ މަޝްރޫއުގެ މަސައްކަތް ފައްޓަވާ ދެއްވާ ގޮތަށް ވަނީ ހަމަޖެހިފައެވެ.
މައުލޫމާތު ލިބިފައިވާ ގޮތުގައި މި މަޝްރޫޢު ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ މާދަމާއެވެ. އަދި މި ރަސްމިއްޔާތުގައި އިންޑިއާގެ ފޮރިން ސެކެޓްރީ ޖައިޝަންކަރު ބައިވެރިވެވަޑައިގަތުމަށް ހަމަޖެހިފައިވާކަމަށްވެސް ވަނީ މައުލޫމާތު ލިބިފައެވެ.
ރައީސް ސާލިހުވަނީ ވަނީ ކެމްޕޭން ދަތުރުތަކުގައި ރ، ނ، ޅ އަދި ބ. އަތޮޅަށް ވަޑައިގެންފައެވެ.
ޕްރައިމަރީ ކެމްޕޭންގައި ނަޝީދުވަނީ ކ.އަތޮޅަށާއި ޅ.އަތޮޅަށް ކުރައްވާ ދަތުރުފުޅެއް މިއަދު ފައްޓަވާފައެވެ.
