ނޭޕާލްގެ ޔެޓި އެއަރލައިންސްގެ ބޯޓެއް ވެއްޓި 32 މީހުން މަރުވެއްޖެއެވެ. ޔެޓި އެއަރލައިންސްގެ ތަރުޖަމާން ބައެއް މީޑިއާތަކަށް މައުލޫމާތު ދެމުން ވިދާޅުވެފައިވަނީ މި ބޯޓު ވެއްޓިފައިވަނީ ނޭޕާލްގެ މެެދުތެރޭގެ ޕޮޚާރާ ކިޔާ ސަރަހައްދަކަށް ކަމުގައެވެ.

ޔެޓި އެއަރލައިންގެ ތަރުޖަމާން ސުދަރުޝާން ބަޓުއާލާ މީޑިއާތަކަށް މައުލޫމާތު ދީފައިވާ ގޮތުގައިATR-72 މަރުކާގެ މި ބޯޓު ވެއްޓުނުއިރު ބޯޓުން 4 ކުރޫންނާއި 68 ޕަސެންޖަރުން ހިމެނޭގޮތުން ޖުމްލަ 72 މީހަކު ދަތުރު ކުރަމުންދިޔަ ކަމުގައެވެ.

ނެޕާލުގެ ފުލުހުންގެ ތަރުޖަމާން ބައެއް މީޑިއާތަކަށް މައުލޫމާތު ދީފައިވާ ގޮތުގައި މަރުވި މީހުންގެ އަދަދު 44 އަށް އަރާފައިވާ ކަމުގައެވެ. އަދި ދިރިހުރި އެއްވެސް މީހަކު މިހާތަނަށް ފެނިފައި ނުވާކަމަށްވެސް އޭނާ ވިދާޅުވެފައި ވެއެވެ.

ނޭޕާލްގެ ލޯކަލް ޓީވީތަކުންވަނީ މި ބޯޓު ވެއްޓުނު ސަރަހައްދުން ކަޅު ބޯ ދުން އަރަމުން ދަނިކޮށް ދައްކާފައެވެ.

"ރެސްކިއު ޓީމްތަކުން ބޯޓު ވެއްޓުނު ސަރަހައްދަށް ގޮސް، އަލިފާންގަޑު ނިއްވުމުގެ މަސައްކަތް ދަނީ ކުރަމުން. ހުރިހާ އޭޖެންސީތަކުންވެސް އެންމެ ފުރަތަމަ މަސައްކަތް ކުރަމުންދަނީ އަލިފާން ނިއްވާ ފަސެންޖަރުން ސަލާމަތް ކުރުމަށް." ލޯކަލް އޮފިޝަލެއް ކަމުގައިވާ ގުރުޑުއްޓާ ދަކާލް މީޑިއާތަކަށް މައުލޫމާތު ދެމުން ވިދާޅުވެފައި ވެއެވެ.

ނޭޕާލުގެ އޭވިއޭޝަން އޮތޯރިޓީން ނެރެފައިވާ ބަޔާނެއްގައި ބުނެފައިވަނީ ހެނދުނު 10:50 ގައި، ސެޓީ ޖޯޖް އެއަރޕޯޓާއި މިބޯޓާއި ގުޅިފައިވާ ކަމުގައެވެ. "އެހާތަނުން ވެއްޓުނީ." ބަޔާނުގައި ބުނެފައި ވެއެވެ.

"ބޯޓުގެ އެއްބައި ވަނީ ވާދީގެ އަނެއް ފަޅީގައި." އެސަރަހައްދުގައި ދިރިއުޅޭ މީހެއް ކަމުގައިވާ އަރުން ޓަމުން ރޮއިޓާސްއަށް މައުލޫމާތު ދެމުން ބުނެފައި ވެއެވެ. އޭނާ ކިޔައިދީފައި ވާގޮތުގައި ބޯޓު ވެއްޓުނުތާ ކުޑަ ވަގުތުކޮޅެއްގެ ތެރޭގައި އޭނާއަށްވަނީ އެސަރަހައްދަށް ދެވިގައެވެ.

"ބޯޓުގެ އަނެއްބައި ވެއްޓިފައިވަނީ "ޖޯޖް އޮފް ދަ ސެޓި" ކޯރުގެ އަނެއް ފަރާތަށް."

ބޯޓު ވެއްޓުނު ސަރަހަދުގައި ދިރިއުޅޭ ބައެއް ފަރާތްތަކުން ބައެއް މީޑިއާތަކަށް މައުލޫމާތު ދީފައިވާ ގޮތުގައި ބޯޓު ވެއްޓުނުއިރި މޫސުންވެސް ރަގަޅު އަދި ޖައްވުވެސް އޮތީ ސާފުކޮށް ކަމުގައެވެ.

މިހާދިސާއަކީ 2018ވަނަ އަހަރުގެ މާރޗްމަހަށްފަހު ނޭޕާލްގައި ހިނގި މިފަދަ އެންމެ ހިތާމަވެރި ހާދިސާއެވެ. އެފަހަރު ޔޫއެސް-ބަނގަލާ ޑޭޝް 8 ބްރޭންޑުގެ ބޯޓެއް ބަންގްލާދޭޝްގެ ޑާކާއިން ފުރައިގެން އައިސް ކަޓްމަންޑޫއަށް ޖައްސަން އުޅެނިކޮށެވެ. އެހާދިސާގައި ބޯޓުން ދަތުރުކުރި 71 މީހުންގެ ތެރެއިން 51 މީހަކު މަރުވެފައި ވެއެވެ.

މިއަަހަރުގެ މޭމަހު ނޭޕާލުގެ ޓާރާ އެއަރގެ ބޯޓެއްވަނީ ޑާކާއިން އުދުއްސާލިތާ 20 މިނިޓްތެރޭ އަލުން ޖައްސަން އުޅެނިކޮށް ވެއްޓިފައެވެ.

2000 ވަނަ އަހަރަށްފަހު ނޭޕާލުގައި މަތިންދާ ބޯޓު އަދި ހެލިކޮޕްޓަރުތައް ވެއްޓުމުގެ ހާދިސާތަކުގައި 309 މީހަކު މަރުވެފައިވެއެވެ.

ދުނިޔޭގައިވާ އެންމެ އުސް 14 ފަރުބަދައިގެ ތެރެއިން 8 ފަރުބަދައެއް ހުންނަނީ ނޭޕާލުގައެވެ. އަދި މި ސަރަހައްދުތަކަކީ ކުރިން އެނގުމަކާ ނުލާ ކުއްލި ކުއްލިއަށް މޫސުމަށް ބޮޑެތި ބަދަލުތައް އަންނަ ސަރަހައްދުތަކެކެވެ.