ބޭންކު އޮފް މޯލްޑިވްސްއިން ދޫކުރާ ކިޔަވާ ލޯނުގެ އިންޓަރެސްޓް ރޭޓް ދަށްކުރުމަށް ނިންމާފައިވާކަން އެ ބޭންކުން ހާމަ ކޮށްފިއެވެ.
މިކަން ހާމަ ކޮށްފައިވަނީ ބޭންކުގެ 40 ވަނަ އަހަރީ ދުވަސް ފާހަގަ ކުރުމަށް ރޭ ކްރޮސްރޯޑްސް މޯލްޑިވްސްގައި ބޭއްވުނު ހަފްލާގައި ވާހަކަ ދައްކަވަމުން ބޭންކު އޮފް މޯލްޑިވްސްގެ ޗެއަރޕާސަން ޔޫޝަޢު ސަޢީދުއެވެ.
ބީއެމްއެލް ކިޔަވާ ލޯނަކީ ދަރިވަރުންނަށް މަތީ ތަޢުލީމު ހޯދުމަށް ލިބިގެންދާ ފަހި ފުރުސަތެއް. 1 ފެބްރުވަރީ އިން ފެށިގެން ކިޔަވާ ލޯނުގެ އިންޓަރެސްޓް 9 އިންސައްތައިން 5 އިންސައްތައަށް ދަށްކުރެވިގެންދާނެކަން އުފަލާއެކު ފާހަގަކޮށްލަން. މި ބަދަލާއެކު، ކުރިން ނަގާފައިވާ، ބީއެމްއެލް ކިޔަވާ ލޯނުތަކުގެ ރޭޓްވެސް، 5 އިންސައްތައް އަށް ބަދަލުވެގެންދާނެ.
ރައީސް ސާލިހުވެސް ބައިވެރިވެ ވަޑައިގެންނެވި ޖަލްސާގައި ވާހަކަ ދައްކަވަމުން ޗެއަރޕާސަން ޔޫޝަޢު ސަޢީދު ވިދާޅުވިއެވެ.
މި ޖަލްސާގައި ބޭންކުގެ ޗެއަރޕާސަންވަނީ ބޭންކުގެ އޮޕްރޭޝަންސްތައް ފެށުނު ދުވަސްވަރުގެ ހާލަތާ ގުޅޭ ގޮތުންވެސް ވާހަކަ ދައްކަވާފައެވެ.
މި ގޮތުން 1982 ވަނަ އަހަރު އެންމެ 10 މުވައްޒަފުންނާއެކު ބޭންކުގެ އޮޕަރޭޝަންތައް ފަށައި، ބޭންކިންގ ހިދުމަތްތަކަށް އާންމު ފަރުދުން ހޭލުންތެރިކުރުވައި، ބޭންކިންގ ހިދުމަތް ފޯރުކޮށްދިނުމަށް އަތޮޅުތަކަށް ކުރި ދަތުރުތަކަށް އޭނާވަނީ އަލިއަޅުއްވާ ލައްވާފައެވެ. މިވަގުތު ރާއްޖޭގެ އެންމެ ބޮޑު އަދި އެންމެ ފުޅާދާއިރާއަކަށް ބޭންކިންގ ހިދުމަތް ފޯރުކޮށްދޭ، އެންމެ ފުޅާދާއިރާއެއްގައި އިންވެސްޓްމަންޓް ކުރަމުންދާ، އަދި މާލީދާއިރާގައި އެންމެ ގިނަ ވަޒީފާގެ ފުރުސަތު ފަހިކޮށްދޭ ބޭންކުގެ ގޮތުގައި ބޭންކް އޮފް މޯލްޑިވްސް އޮތް އިރު، އޭނާ ވިދާޅުވީ ބޭންކުން މިދަތުރު ފަށާފައިވަނީ ދެމެހެއްޓެނިވި ގޮތެއްގައި އިގްތިސާދު ހިފެހެއްޓުމަށް ޕްރޮޖެކްޓްތަކަށް ފައިނޭންސްކޮށްދީގެން ކަމުގައެވެ.
ދިވެހިންގެ މެދުގައި މަގުބޫލު އަދި މާލީ ދާއިރާގައި އެހިދުމަތްތަކަކަށް އާންމުން މިހާރު އަހުލުވެރިވެފައިވާ ގިނަ ހިދުމަތްތަކަކީ ބޭންކުން ފުރަތަމަ ތައާރަފްކުރި ހިދުމަތްތަކެއް. އޭޓީއެމް އިން ފެށިގެން ކާޑުގެ ހިދުމަތްތަކާއި، އިންޓަރނެޓް ބޭންކިންގ، ޕީއޯއެސް މެޝިން އަދި ނަގުދު ފައިސާއާ ނުލާ ދެވޭ ހިދުމަތްތައް ހިމެނޭ.
ބެންކުގެ ޗެއަރޕާސަން ޔޫޝަޢު ސަޢީދު ވިދާޅުވިއެވެ.
އޭނާ ވިދާޅުވި ގޮތުގައި، ބޭންކުގެ ވިއުގަ ފުޅާކޮށް، ބޭންކު އޮފް މޯލްޑިވްސްއަކީ މިހާރު ކޮންމެ ދިވެހި ރައްޔިތެއްގެވެސް އާންމު ދިރިއުޅުމާވެސް ގުޅި ލާމެހިފައިވާ މުވައްސަސާއެއް ކަމުގައެވެ. އެހެންކަމުން ބޭންކަށް އަމާޒުވާ ފާޑުކިޔުންތައްވެސް އިތުރުވާކަން ފާހަގަ ކުރައްވަމުން، ކަސްޓަމަރުން ބޭނުންވާފަދަ ހިދުމަތްތައް، އިތުރު ފުރިހަމަކަމާއެކު ކުރިޔަށް އޮތްތާނގައި ކެނޑިނޭޅި ދިނުމަށް ބޭންކުން މަސައްކަތް ކުރަމުންދާނެކަމުގެ ޔަގީންކަން އޭނާ ދެއްވިއެވެ.
އޭނާ ވިދާޅުވީ ބޭންކުގެ އަމާޒަކީ ޑިޖިޓަލް ހިދުމަތްތަކަށް އިސްކަންދީ އެންމެހާ ކަސްޓަމަރުން އިހުތިޔާރުކުރާ ބޭންކުގެ ގޮތުގައި ދެމި އޮތުން ކަމުގައެވެ.
މުޅި ރާއްޖެ ހިމެނޭ ބޭންކިންގ ވިއުގަޔަކާއެކު، ބޭންކު އޮފް މޯލްޑިވްސްއިން ދަނީ 20 އަތޮޅުގައި 35 ބްރާންޗުގެ ޚިދުމަތާއި، 82 ސެލްފްސަރވިސް ބޭންކިންގ ސެންޓަރުގެ ޚިދުމަތާއި، 140 އޭޓީއެމްގެ ޚިދުމަތާއި، 200 އަށް ވުރެ ގިނަ ކޭޝް އޭޖެންޓުންގެ އިތުރުން އެންމެ ޒަމާނީ އޮންލައިން ބޭންކިންގ ޚިދުމަތް ފޯރު ކޮށްދެމުންނެވެ.
ކޮމެންޓު ފޮނުވާ