ކުއްލިއަކަށް ރިއެކްޓް ކުރުމާއި ކަންދެއްކުމަށްވުރެ މާ މުހިންމު ސިފަތަކެއް ރައީސެއްގެ ކިބައިގާ ހުންނަންޖެހޭކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ މެމްބަރު އިކްރާމް ޙަސަން ވިދާޅުވެއްޖެއެވެ.
ކުރިއަށް އޮތް އެމްޑީޕީގެ ރިޔާސީ ޕްރައިމެރީގައި ރައީސް އިބްރާހީމް މުޙައްމަދު ޞާލިޙަށް ތާޢީދުކުރައްވައި ޓްވީޓުކުރައްވަމުން އިކްރާމް ވިދާޅުވީ ކުއްލިއަކަށް ރިއެކްޓުކުރުމާއި ދެއްކުންތެރިކަމަށްވުރެ ރައީސެއްގެ ކިބައިގާ ހުރުން މުހިންމު ސިފަތަކަކީ އަޑުއެހުމުގެ ޤާބިލްކަމާއި އެހެން މީހުންނަށް އިޙްތިރާމްކުރުންކަމަށެވެ. އަދި އެންމެން ގޮވައިގެން އުޅެން އެނގުމާއި ކެތްތެރިކަމާއި ވިސްނުންތެރިކަމާއެކު ނިންމުންތައް ނިންމުން އެނގުމަކީވެސް ރައީސެއްގެ ކިބައިގާ ހުރުން މުހިންމު ސިފަތައްކަމަށް އިކްރާމް ވިދާޅުވިއެވެ.
Kulliakah react kurevvumaa, dhekkuntheri kamahvure qaumehge raeesehge hurun maa muhimmu sifathakakee.. adu ehumuge gaabilkamaa, ehen meehunah ikhthiraam kurumaa, emmen govaigen ulhen e'ngumaa, keiitherikamaai visnuntherikamaai eku nimmunthah nimmavan e'ngun#Ibu2023#MDPkuriah
— Ikram Hassan MP (@ikramhassan) January 10, 2023
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރިއެކްޓު ނުކުރައްވާކަމަށް ވިދާޅޔުވެ، ރައީސް ނަޝީދު މަލާމާތްކުރެއްވުމާއެކު، އެމްޑީޕީގެ ޢާމްމު މެމްބަރުންނާއި ރައްޔިތުންގެ މަޖިލީހުގެ މެމްބަރުންގެ ތެރެއިން ރައީސް ޞާލިޙަށް ތާޢީދުކުރާ މެމްބަރުން އަންނަނީ ނަޝީދަށް ރައްދުދީ ރައީސް ޞާލީޙް ދިފާޢުކުރަމުންނެވެ.
މިމަހުގެ 28ވަނަ ދުވަހު ބާއްވާ އެމްޑީޕީގެ ރިޔާސީ ޕްރައިމެރީއާ ގުޅިގެން ޕްރައިމެރީގައި ވާދަކުރައްވާ ދެ ކެންޑިޑޭޓުންގެ ސަޕޯޓަރުންގެ މެދުގައި ވަނީ ވާދަވެރިކަން ބޮޑުވެފައެވެ. ޕްރައިމެރީ ކެމްޕެއިންގެ ކުރިންވެސް ރައީސް ޞާލިޙާއި ރައީސް ނަޝީދުގެ ޚިޔާލު ތަފާތުވެ ޕާޓީވަނީ ދެބައިވެފައެވެ. ދެ ރައިސުންނަށް ތާޢީދުކުރާ ޢާންމު މެމްބަރުން ދެފެކްޝަނަކަށް ބައިވެ އެއްބަޔަކު އަނެއްބަޔަކަށް ވަރަށްބޮޑަށް ފާޑުކިޔަމުން ދެއެވެ.
