އިތުބާރު ކުރެވޭ މަގާމެއްގައި ހުރެ ކުޑަ ދެ ކުދިންނަށް ޖިންސީ ގޯނާ ކުރި މައްސަލައެއްގައި މީހަކު 15 އަހަރަށް ޖަލަށްލާން ހުކުމްކޮށްފިއެވެ.
ދެ ކުއްޖަކާއި ބެހިގެން ޖަލަށް ލާން ހުކުމް ކޮށްފައިވަނީ މާލެ / ވ.ހުވަފެން، ޢަލީ ޝަފީޤު ކިޔާ މީހެއްގެ މައްޗަށެވެ. އޭނާގެ މައްޗަށް ދައުލަތުން ދައުވާކޮށްފައި ވަނީ ކުޑަކުއްޖަކު އިތުބާރުކުރަންޖެހޭ މަޤާމެއްގައި ހުރި މީހަކު އެކުއްޖާއާއެކު ޖިންސީ ޢަމަލު ހިންގުމުގެ ކުށުގެ ދަޢުވާއެވެ. މި ދައުވާއަށް އޭނާ ވަނީ އިންކާރުކޮށްފައެވެ.
އޭނާ 15 އަހަރަށް ޖަލަށްލާން މިދިޔަ ބުރާސްފަތި ދުވަހު ހުކުމްކޮށްފައި ވަނީ 2018 ވަނަ އަހަރުން ފެށިގެން ކުޑަ ދެ ކުދިންނަށް ޖިންސީ ގޯނާކޮށްގެންނެވެ. އެ ކުދިންނަށް ޖިންސީ ގޯނާކޮށްފައިވަނީ އޭނާއާއެކު އެ ކުދިން އެއްކޮޓަރިއެއްގައި ދިރިއުޅެމުން ދިޔަ ދުވަސްކޮޅެއްގައެވެ.
އެ ކުދިންނަށް ޖިންސީ ގޯނާ ކުރި ކަމަށް އޭނާ ޝަރީއަތުގެ މަޖިލީހުގައި ވަނީ އިންކާރުކޮށްފައެވެ. ނަމަވެސް މައްސަލަ ސާބިތު ކުރުމަށް ދައުލަތުން ހުށަހަޅާފައިވާ ހެއްކާއި ގަރީނާއަށް ބިނާކޮށް އިތުބާރުކުރެވޭ މަގާމެއްގައި ހުރެ ކުޑަކުއްޖަކާއެކު ޖިންސީ އަމަލު ހިންގުމުގެ ކުށް އޭނާގެ މައްޗަށް ޝައްކެއް ނެތް މިންވަރަށް ސާބިތުވާކަމަށް ޝަރީއަތުން ވަނީ ކަނޑައަޅާފައެވެ.
މި ދައުވާ ސާބިތުވުމުން ކުށުގެ ޢުޤޫބާތެއްގެ ގޮތުން ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްސަ އުސޫލުތަކަކަށް ޢަމަލުކުރުމުގެ ޤާނޫނު ގެ 9 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ށ) ގެ ދަށުން ޝަފީގު 15 އަހަރު ދުވަހުގެ މުއްދަތަށް ޖަލަށްލުމަށް ކްރިމިނަލް ކޯޓުގެ ގާޒީ، އާދަމް މުހައްމަދު ވަނީ ހުކުމްކޮށްފައެވެ.
