ކުރިޔަށް އޮތް ރިޔާސީ ޕްރައިމަރީއަށްފަހު، ރައީސް ސާލިހުގެ ފަހަތްޕުޅަށްވެސް އަދި އެކީގަވެސް ނަޝީދު ހުންނަވާންޖެހޭފަދަ ހާލަތެއް ނާންނާނެ ކަމުގައި، އެޑީޕީގެ ނަޝީދު ފެކްޝަންނަށް ނިސްބަތްވާ އިސް މެމްބަރެއް ކަމުގައިވާ، ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވެއްޖެއެވެ.
ނަޝީދުގެ "ފިކުރެއްގެ ދިރުން" ކެމްޕޭންގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި، ޕްރައިމަރީން ބަލިވެއްޖެ ނަމަ ރައީސް ސާލިހުގެ ފަހަތްޕުޅަށް ނަޝީދު ވަޑައިގަންނަވާނެތޯ ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުން ހަސަން ލަތީފު ވިދާޅުވީ ރައީސް ސާލިހުއަކީ ކޯލިޝަންގެ ޗޮއިސް ކަމަށާއި އެމްޑީޕީގެ ޗޮއިސްއަކީ ނަޝީދު ކަމުގައެވެ.
ރައީސް ނަޝީދަކީ އެމްޑީޕީގެ މެމްބަރުން ބޭނުންވާ ކެނޑިޑޭޓު މި އިންތިޚާބުގަ. އެހެންވީމަ ރައީސް ސާލިހު މިއިންތިޚާބު ކާމިޔާބެއް ނުކުރައްވާ. އެހެންވީމަ އެހާލަތެއް ނުއެއް އާދޭ. ރައީސް ސާލިހުގެ ފަހަތްޕުޅުގަ ނުވަތަ އެކުގަ ރައީސް ނަޝީދު ހުންނަވަންޖެހޭ ހާލަތެއް ނާދޭ. ރައީސް ނަޝީދު މާ ރީއްޗަށްވެސް މި އިންތިޚާބު ކާމިޔާބު ކުރައްވާނެ.
ހަސަން ލަތީފު ވިދާޅުވިއެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ހަސަން ލަތީފު ވިދާޅުވީ ކުރިޔަށް އޮތް އެޕާޓީގެ ރިޔާސީ ޕްރައިމަރީ ބޭއްވުމަށް ނަޝީދު ބޭނުންވީ އަންނަ ފެބްރުއަރީމަހު ކަމަށެވެ. އޭނާ ވިދާޅުވީ އެހެންނަމަވެސް އެއީވެސް ޕާޓީގެ ދަފްތަރާ ގުޅޭގޮތުން ހުރި ކަންބޮޑުވުންތަކަށް ހައްލެއް ގެނެސްގެން ކަމުގައެވެ. އޭނާ ވިދާޅުވީ އެމްޑީޕީގެ ރިޔާސީ ޕްރައިމަރީ ބާއްވަން ވަގުތު އަދި އެބައޮތް ކަމުގައެވެ.
ދާދިފަހުން ރައީސް ސާލިހު ބޭއްވެވި ނޫސްވެރިންގެ ބައްދަލުވުމުގައި ޕްރައިމަރީން ބަލިއްވެއްޖެނަމަ ނަޝީދަށް ތާއީދު ކުރައްވާނެތޯ ނޫސްވެރިޔަކު ކުރެއްވި ސުވާލަކަށް ޖަވާބު ދެއްވަމުން ރައީސް ސާލިހު ވިދާޅުވީ ބޮޑު ތަނުން ޕްރައިމަރީ ކާމިޔާބު ކުރައްވާނެ ކަމަށާއި، އަބަދުވެސް ދެމި ހުންނަވާނީ އެމްޑީޕީއާއެކު ކުރިޔަށް ދިއުމުގައި ކަމުގައެވެ.
