ހަތް ރަށެއްގައި ސިއްޙީ މަރުކަޒު ޢިމާރާތްކުރުމަށް ބިޑަށް ހުޅުވާލައިފިއެވެ.
ފިނޭންސް މިނިސްޓްރީން ކޮށްފައިވާ އިއުލާނެއްގައި ސިއްޙީ މަރުކަޒު ޢިމާރާތްކުރުމަށް ބިޑަށް ހުޅުވާލާފައިވަނީ ށ. ގޮއިދޫ، ށ. ކަނޑިތީމު، ހއ. މޮޅަދޫ، ށ. މާއުނގޫދޫ، ނ. ކުޑަފަރީ، ނ. ފޮއްދޫ އަދި މ. ނާލާފުށި ޞިއްޙީ މަރުކަޒު އިމާރާތުގެ މަސައްކަތްކުރުމަށެވެ.
މިމަސައްކަތްތަކަށް ބިޑު ހުށަހެޅުމުގެ ފުރުޞަތު މިކަމަށް ޝަރުޠުހަމަވާ ފަރާތްތަކަށް ހުޅުވާލާކަމަށް ފިނޭންސް މިނިސްޓްރީން ކޮށްފައިވާ އިޢުލާނެއްގައިވެއެވެ.
ކޮންމެ ބީލަމެއްގައި 500 ރުފިޔާގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަންޖެހެއެވެ. ފައިސާ ބަލައިގަންނާނީ މިމަހުގެ 22އިން އަންނަ ޖެނުއަރީ މަހުގެ 17 އަށް ބަންދު ނޫން ކޮންމެ ދުވަހެއްގެ 8:00 އިން 14:00 އަށް ފިނޭންސްގެ އޮންލައިން ޕޭމަންޓް ޕޯޓަލް – ބަނޑޭރި ޕޭ މެދުވެރި ކޮށެވެ. އަދި ފައިސާ ދެއްކުމަށްފަހު، ބީލަންތަށް ރަޖިސްޓްރީވުމަށް އެދޭ ފަރާތުގެ ނަމާއި އެޑްރެސް، ގުޅޭނެ ނަންބަރާއި އީ-މެއިލް އެޑްރެސް އަދި ފައިސާ ދެއްކި ރަސީދުގެ ކޮޕީ ފޮނުވަން އެ އިއުލާނުގައިވެއެވެ.
ބިޑުތައް ހުޅުވުން އޮންނާނީ 22 ޖަނަވަރީ 2023 ވާ އާދިއްތަ ދުވަހުގެ 11:00ގައި މިމިނިސްޓްރީގެ ނެޝަނަލް ޓެންޑަރގެ ޖަލްސާކުރާ މާލަމުގައިކަމަށް ފިނޭންސް މިނިސްޓްރީން ބުންޏެވެ.
