މާލެ ސަރަޙައްދަށް ކުރިމަތިވެފައި އޮތް ބޯހިޔާވަހިކަމުގެ މައްސަލައަށް ހައްލު ގެނައުމަށް، ގޯތިދޭން އަމާޒުކޮށްގެން ހިއްކަން ޢިއުލާންކޮށްފައިވާ ގިރާފަޅުގެ މަޝްރޫޢަށް އިންވެސްޓަރުން ހޯދަން ހުޅުވާލައިފިއެވެ.
ގިރާވަރުފަޅު ހިއްކައި އެތަން ސިޓީއެއްގެ ފެންވަރަށް ތަރައްޤީކުރާނެކަމަށް ސަރުކާރުންވަނީ ވިދާޅުވެފައެވެ. މިހާރު ހުޅުވާލާފައިވަނީ އެތަނުގެ ބިން ހިއްކުމާއި އެހެނިހެން މަޝްރޫޢުތަކަށް ބޭނުންވާ ފައިސާ ހޯދުމަށެވެ. ގިރާވަރު ފަޅަކީ މީހުން ދިރިއުޅޭ ސިޓީއެއްގެގޮތުގައި ތަރައްގީ ކުރަން ސަރުކާރުން ނިންމަވާފައިވާ ނިންމެވުން ތަންފީޒުކުރަން ރައީސުލްޖުމްހޫރިއްޔާ ވަނީ ގަރާރެއްވެސް ނެރުއްވާފައެވެ. މިދިޔަ ބުރަސްފަތިދުވަހު ނެރިއްވި މި ޤާރާރުގައިވާގޮތުން މިމަޝްރޫއަށް އެންމެ ދަށްވެގެން ޚަރަދުކުރެވޭނީ ފަސް މިލިއަން ޑޮލަރެވެ.
މާލޭގެ ރަށްވެހިންނަށް ގޯތި ދިނުމަށް ނިންމާފައިވާ ނިންމުމަށް އަމަލީ ސިފަ ގެނައުމުގެ ގޮތުން، ގިރާވަރު ފަޅުން ގޯތި ދޫކުރުމަށް ނިންމާފައިވާކަން ރައީސް އިބުރާހިމް މުހައްމަދު ސާލިހު ހާމަ ކުރެއްވީ މިއަހަރުގެ ރިޔާސީ ބަޔާނުގައެވެ.
މިގޮތުން މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލަ ހައްލު ކުރުމުގެ ގޮތުން، ގިރާވަރު ފަޅު ހިއްކައި އެބިމުން މަދުވެގެން 2،000 ގޯތި މާލޭގެ ރަށްވެހިންނަށް ދޫކުރައްވާނެކަމަށްވެސް ރައިސް ސާލިހު ވިދާޅުވިއެވެ. ރައިސް ސާލިހު ވިދާޅުވި ގޮތުގައި ގިރާވަރު ފަޅަކީ ތިލަމާލެ ބުރިޖް އެދާގޮތަށް ގޮސް ގުޅާލެވޭނެ ތަނެވެ.
ރައީސް ސާލިހު ވިދާޅުވީ، އެމަނިކްފާނުގެ ރިޔާސީ ދައުރު ނިންމަވާނީ، އެންމެ ބޭނުން ޖެހިފައިވާ މާލޭގެ ރައްޔިތުންނަށް އިން ވަކިކޮށް، ރޯނުދަމާ، ބިން ކަނޑާ ގޯތީގެ ފަތް ދިނުމަށް ފަހުގައި ކަމަށެވެ.
