ސަރުކާރުން 2021 ވަނަ އަހަރަށް ލަފާކޮށް ހުށަހެޅި ބަޖެޓަކީ ދަރަނި ބަޖެޓެއްގެ ގޮތުގައި ސިފަކޮށް، ޗައިނާއިން ނަގާފާއިވާ ދަރަންޏަކީ ރާއްޖެއާއި އެހެން ގައުމުތަކާ ފިތުނަވެރި ކުރުވުމަށް ސިޔާސީ ފަރާތްތަކުން ބޭނުން ކުރާ ވަސީލަތަކަށް ނުހެދުމަށް މޯލްޑިވްސް ޓްރޭޑް ޔޫނިއަން އިން ގޮވާލައިފިއެވެ.
ޓްރޭޑް ޔޫނިއަންއިން މިއަދު ކުރި ޓުވީޓެއްގައި ބުނެފައިވަނީ، ދައުލަތުގެ ދަރަނި އިންތިހާއަށް މަތިވެގެން ދިއުމަކީ އެޔޫނިއަންވެސް ކަންބޮޑުވާ މައްސަލައެއް ކަމުގައެވެ. އަދި ދައުލަތުގެ ދަރަނި އިންތިހާއަށް އުފުލިގެން ދިއުމުގެ ޒިންމާ ހުރިހާ ސަރުކާރަކުންވެސް އުފުލަންޖެހޭ ކަމަށްވެސް މިޓުވީޓުގައި އެޔޫނިއަން އިން ފާހަގަ ކޮށްފައިވެއެވެ.
ޓްރޭޑް ޔޫނިއަން އިން އިތުރަށް ބުނެފައިވަނީ، ދައުލަތުގެ ދަރަނި އިންތިހާއަށް އުފުލި އެކަމުގެ ކަންބޮޑުވުން އޮތް ކަމުގައިވި ނަމަވެސް، މިދަޑިވަޅަކީ ބޭރުގެ ގައުމުތަކުން ރާއްޖެއަށް ލިބެން އޮތް އެހީތެރިކަމުގެ މަގުތައް ބަންދުކުރަންވީ ވަގުތު ނޫންކަމަށާއި މިއީ ރާއްޖޭގެ މާލީ ނިޒާމާއި ދޭރެތޭ އިތުބާރު އުފައްދާ، ކުރިމަތިވެފައިވާ ގޮންޖެހުންތަކުން އަރައިގަތުމަށް ވިސްނުންތެރިކަމާއެކު ކުރިޔަށް ދާންވީ ވަގުތުކަމުގައެވެ.
ޓްރޭޑް ޔޫނިއަންއިން ފާހަގަ ކޮށްފައިވާ ގޮތުގައި ޗައިނާފަދަ ދުނިޔޭގެ ބޮޑެތި އިގްތިސާދުތަކާ ރައްޖެއިން ކޮށްފައިވާ މާލީ މުއާމަލާތުތަކުގެ ސިޔާސީ މަންފާ ހާސިލްކުރުމަށް ސިޔާސީ ބައެއް ފަރާތްތަކުން މަސައްކަތް ކުރަމުން ދެއެވެ. މީގެ ސަބަބުން ދުނިޔޭގެ ބޮޑެތި އިގްތިސާދުތަކާ އެކީ ރާއްޖެއިން ކުރާ ވިޔަފާރީގެ އަދި މާލީ މުއާމަލާތްތަކުގެ އިތުބާރު ގެއްލިގެން ހިގައިދާނެއެވެ. އަދި ރާއްޖެ ފަދަ ކުޑަކުޑަ އިގްތިސާދެއް އޮތް ގައުމަކުން ދުނިޔޭ ބޮޑެތި އިގްތިސާދުތަކާ ފިތުނަވެރި ނުވުމަށްވެސް ޓްރޭޑް ޔޫނިއަން އިން ގޮވާލާފައި ވެއެވެ.
2021 vana aharah lafaa kuraa dhaulathuge budget akee dharani budgetehge gothuga sifa koh, dharannakee dhuniyeyge ehen gaumuthakaa raajje aa fithnaveri kuruvaa vaseelathakah hedhumakee raajjeyge iqthisaadhah faidhaa huri visnumakah nuvaane..1/4
— Maldives Trade Union (@MTradeUnion) November 23, 2020
މިއަހަރަށް ލަފާ ކުރާ ދައުލަތުގެ ބަޖެޓް މިމަހު ރައްޔިތުންގެ މަޖިލީހަށް ހުށަހެޅުމާއެކު، ރައްޔިތުންގެ މަޖިލީހުގެ އެމްޑީޕީއަށް ނިސްބަތްވާ ގިނަ މެމްބަރުން ވަނީ މިއީ ދަރަނި ބަޖެޓެއްގެ ގޮތުގައި ސިފަކޮށްފައެވެ. އަދި ބަޖެޓަކީ ހަމައެކަނި ޗައިނާއަށް ދަރާފައިވާ ދަރަނި ދެއްކުމަށް ތައްޔާރު ކޮށްފައިވާ ބަޖެޓެއްގެ ގޮތުގައިވެސް ފާހަގަކޮށް އެމްޑީޕީއަށް ނިސްބަތްވާ ގިނަ މެމްބަރުންވަނީ ސަރުކާރަށް ވަރަށް ބޮޑަށް ފާޑު ކިޔާފައެވެ.
ހަމަ އެއާއެކު، މަޖިލިސް ރައީސް މުހައްމަދު ނަޝީދު ވަނީ، ވޯޓު ދެއްވޭ ހާލަތުގައި އިންނެވިނަމަ މި ބަޖެޓަށް ވޯޓު ނުދެއްވާނެކަމަށްވެސް ވިދާޅުވެފައެވެ. އަދި ނަޝީދުވަނީ ޗައިނާއިން ނަގާފައިވާ ދަރަނިތައް އަލުން މުރާޖައާކުރުމަށް ގޮވާލާ، ޗައިނާއަށް ވަރަށް ބޮޑަށް ފާޑު ވިދާޅުވެފައެވެ.
މަޖިލީހުގެ ރިޔާސަތަށް އިސްވުމަށްފަހު ނަޝީދު ފާހަގަކުރެވިގެން ގޮސްފައިވަނީ، ފާޅުގައި ޗައިނާއަށް ފާޑުވިދާޅުވެ، އިންޑިއާ ދިފާއުކުރައްވާ ބޭފުޅެއްގެ ގޮތުގައެވެ. ބައެއް ފަރާތްތަކުން ތުހުމަތު ކުރާގޮތުގައި، ނަޝީދު މަސައްކަތް ކުރައްވަނީ، ޗައިނާއާއި ރާއްޖެއާ ފިތުނަވެރި ކުރުވާ، އިންޑިއާގެ ރުހުން ހޯދައިގެން ސިޔާސީ މަންފާތަކެއް ހާސިލް ކުރުމަށެވެ.
ކޮމެންޓު ފޮނުވާ