ފިރިމީހާ އަދި މަޝްހޫރު އެކްޓަރު އަޖޭ ދޭވްގަން އާއެކުގައި ކޮމެޑީ ފިލްމެއް ކުޅުމުގެ އަމިއްލަ ވިސްނުމެއް ނެތް ކަމަށް ބަތަލާ ކާޖޮލް ބުނެފިއެވެ.
"ސަަލާމް ވެންކީ" ގެ ޕްރޮމޯޝަންގެ ތެރެއިން ޕިންކް ވިލާ އަށް ދިން އިންޓަވިއުއެއްގައި ހުނަރުވެރި، ކާމިޔާބު ބަތަލާ ބުނީ ދެމަފިރިން އެކުގައި ކޮމެޑީ ފިލްމެއް ކުޅުމުގެ ވިސްނުމަކީ ދެމީހުން ކުރެ އެކަކުވެސް ގެންގުޅޭ ހިޔާލެއް ނޫން ކަމަށެވެ.
އަޖޭ އަކީ ކޮމެޑީ ފްރެންޗައިޒްއެއް ކަމަށް ވާ "ގޯލްމާލް"ގެ މެއިން އެއް ކެރެކްޓަރެވެ. މި ފިލްމަކީ އަޖޭއާ އެކު ޑައިރެކްޓަރ ރޯހިތު ޝެއްޓީ ގެނެސްދޭ ވަރަށް ކާމިޔާބު ސިލްސިލާ ފިލްމެކެވެ.
ދެތަރިން ކައިވެނީގެ ކުރިން އަދި ފަހުންވެސް ވަނީ އެކުގައި ފިލްމެއް ކުޅެފައެވެ. އެގޮތުން އަޖޭ އާއި ކާޖޮލްގެ ޖޯޑު ފެނިގެން ދިޔަ ފިލްމުތަކުގެ ތެރޭގައި "އިޝްގް"، "ހަލްޗަލް"، "ޕިޔާރު ތޯ ހޯނާ ހިތާ"، "ދިލް ކިޔާ ކަރޭ"، "ރާޖޫ ޗާޗާ" އަދި އަޖޭ ޑައިރެކްޓްކުރި "ޔޫ، މީ އޯރް ހަމް" އެވެ. އެ ދެ މީހުން އެކީގައި އެންމެ ފަހުން ކުޅުނީ އަޖޭއަށް އެންމެ މޮޅު އެކްޓަރުގެ ނެޝަނަލް އެވޯޑް ދެވަނަ ފަހަރަށް ލިބުނު 2020 ގެ "ތާނާޖީ: ދި އަންސަންގް ވޮރިއާ" އެވެ.
ކާޖޮލް ބުނީ އަޖޭއާއެކުގައި މަސައްކަތް ކުރުމަކީ އަބަދުވެސް ބޭނުން ވާކަމެއް ކަމަށާއި ފުރުސަތު ލިބިއްޖެ ނަމަ އަދިވެސް ދެމަފިރިން އެކުގައި މަސައްކަތް ކުރާނެ ކަމަށް ކާޖޮލް ވަނީ ބުނެފައެވެ. ކާޖޮލްގެ ކުރިއަށް އޮތް ފިލްމަކީ މިމަހުގެ 9 ވަނަ ދުވަހުގައި ރިލީޒް ކުރާ "ސަލާމް ވެންކީ" އެވެ.
ކޮމެންޓު ފޮނުވާ