މިވަގުތުވެސް އެމްޓީސީސީން 100އަށްވުރެ ގިނަ މަޝްރޫޢު ރާއްޖޭގެ އެކި ކަންކޮޅުތަކުގައި ހިންގަމުންދާކަމަށާ، މިމަޝްރޫއުތަކާއެކު ރާއްޖޭގެ އިގުތިސާދުގައި 200 މިލިޔަނެއްހައި ރުފިޔާ ހިފެހެއްޓިފައި ހުންނާނެކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓީވީގައި ވާހަކަފުޅުދައްކަވަމުން އާޒިމް ވިދާޅުވީ ރައީސް އިބްރާހީމް މުޙައްމަދު ޞާލިޙުގެ ވެރިކަމުގައި އެމްޓީސީއަކީ ވަރުގަދަ ދުނިޔޭގެ ފެންވަރުގެ ކުންފުންޏަކަށް ބަދަލުވެފައިވާކަމަށެވެ. މިކަމުގެ މިސާލު ދައްކަވަމުން އާޒިމް ވިދާޅުވީ މި ސަރުކާރު ވެރިކަމާ ޙަވާލުވުމާހަމައަށް ރާއްޖޭގެ އެކި ރަށްރަށުގައި ހިންގަން ޖެހޭ ޢުމްރާނީ ތަރައްޤީގެ މަސައްކަތްތައް ކުރަން ޙަވާލުކުރަން ޖެހިފައި އޮތީ ބޭރުގެ އެކިއެކި ކުންފުނިތަކާ ކަމަށެވެ. ޚާއްސަކޮށް ރަށްރަށުގެ ބަނދަރުތައް ހެދުމުގެ މަޝްރޫޢުތައް ހަދާނީ މުޅިންހެން ބޭރުގެ އެކިއެކި ކުންފުނިތަކުންކަން އާޒިމް ފާހަގަކުރެއްވިއެވެ. އެހެންނަމަވެސް މިއަދު އެޙާލަތު ބަދަލުވެއްޖެ ކަމަށާ، މިއަދު ރާއްޖޭގެ ރަށްރަށުގައި ހަދަމުންދާ ބަނދަރުތަކުގެ %99 ބަނދަރުގެ މަޝްރޫޢުތަކަކީ އެމްޓީސީސީން ކުރިއަށް ގެންދާ މަސައްކަތްތައްކަން އޭނާ ފާހަގަކުރެއްވިއެވެ.
އެހެންކަމުން މިއަދު އެމްޓީސީސީ މިވަނީ ވަރަށްބޮޑަށް ފުޅާވެ ކުރިއަރާފައިކަމަށާ، އެކުންފުނިން ކުރިއަށްގެންދާ ތަރައްޤީގެ މަޝްރޫޢުތަކާއެކު ކުރިން ރާއްޖެއިން ބޭރުވެގެންދިޔަ 200 މިލިޔަނެއްހައި ރުފިޔާ ރާއްޖޭގެ އިޤްތިޞާދުގެތެރޭގައި ހިފެހެއްޓޭކަމަށް އާޒިމް ވިދާޅުވިއެވެ.
