އިރާނުގައި ކުރިޔަށް ދިޔަ މުޒާހިރާތައް ހުއްޓުވުމަށް އެގައުމުން ބާރުގެ ބޭނުން ކޮށްފައިވާތީ ޔޫރަޕިއަން އިއްތިހާދުން، އިރާނުގެ 29 މީހަކާއި ތިން މުވައްސަސާއަކާ ދެކޮޅަށް ދަތިކުރުމުގެ ފިޔަވަޅު އަޅައިފިއެވެ.
މިގޮތުން އީޔޫއިން ދަތިކުރުމުގެ ފިޔަވަޅު އަޅާފައިވާ މުވައްސަސާތަކާއި މީހުންގެ ތެރޭގައި އެގައުމުގެ އިންޓީރިއަރ މިނިސްޓަރާއި، އިސްލާމިކް ރިވޮލިއުޝަނަރީ ގާރޑްސް ކޯޕްސް (IRGC)ގެ އިސްވެރިޔާގެ އިތުރުން އިރާނުގެ ސްޓޭޓް ޓީވީ، ޕްރެސް ޓީވީ ހިމެނެއެވެ.
މި ދަތިކުރުމުގެ ފިޔަވަޅުތަކަކީ އެގައުމުގެ ފުލުހުންގެ ބެލުމުގެ ދަށުގައި ހުއްޓާ ނިޔާވި މާޝާ އަމިނިގެ މަރާއި ދެކޮޅަށް މުޒާހިރާ ކުރި މީހުންނާއި ދެކޮޅަށް އެކަށީގެން ނުވާ ބާރުގެ ބޭނުން ކޮށްފައިވާތީ ޔޫރަޕިއަން އިއްތިހާދުން އެޅި ފިޔަވަޅުތަކެކެވެ.
"ސުލްހަވެރިކަމާއެކު މުޒާހިރާ ކުރަމުންދިޔަ ފަރާތްތަކާ ދެކޮޅަށް ހިންގާފައިވާ އަނިޔާވެރި އަމަލުތައް އީޔޫއިން ބަލައެއް ނުގަންނަން، އަދި ކުށްވެރި ކުރަން. އަހަރެމެން މިތިބީ އިރާނުގެ ރައްޔިތުންނާއެކު، އަދި ސުލްހަވެރިކަމާއެކު އެއްވެ، ޚިޔާލު ފާޅުކުރުމުގެ ހައްގު ހޯދުމަށް އެމީހުން ކުރަމުންދާ މަސައްތަކަށް އަހަރެމެން ތާއީދު ކުރަން. މިއަދު އަހަރެމެން ފިޔަވަޅު މިއަޅަނީ ސުލްހަވެރިކަމާއެކު މުޒާހިރާ ކުރަމުން ދިޔަ ފަރާތްތަކުގެ އަޑު ކަނޑުވާލުމަށް މަސައްކަތްކުރާ ފަރާތްތަކާ ދެކޮޅަށް،" އިޔޫގެ ފޮރިން ޕޮލިސީ ޗީފް ޖޯސެފް ބޮރެލް ވިދާޅުވެފައި ވެއެވެ.
އީޔޫއިން ދަތިކުރުމުގެ ފިޔަވަޅު އަޅާފައިވާ ފަރާތްތަކުގެ ތެރޭގައި މާޝާ އާމިނި ހައްޔަރު ކުރި ސްކުއަޑްގެ ޓީމުގައި ހިމެނޭ 4 މެމްބަރުންވެސް ހިމެނެއެވެ. އޭގެ ތެރޭގައި އީރާނިއަން ލޯ އެންފޯރސްމަންޓް ފޯސެސް (LEF) އާއި އިސްލާމިކް ރިވޮލިއުޝަނަރީ ގާރޑްސް ކޯޕްސް (IRGC)ގެ ޕްރޮވިޝަންލް ހެޑުންނާއި، ބުރިގޭޑިއަ ޖެނެރަލް ކިޔޫމާރސް ހައިދަރީއާއި އީރާން އާރމީގެ ގްރައުންޑް ފޯރސް ގެ ކޮމާންޑަރު ހިމެނެއެވެ.
އޭގެ އިތުރުން އިރާންގެ ސައިބަރ ޕޮލިސްގެ އިސްވެރިޔާ މުހައްމަދު ނާސިރު މާޖިދުވެސް، އޮންލައިކޮށް އިރާނުގެ ސަރުކާރަށް ފާޑުކިޔާ ފަރާތްތަކާއި ދެކޮޅަށް ހިންގާފައިވާ އަމަލުތަކާއި ގުޅިގެން، މި ލިސްޓުގައި އީޔޫއިން ހިމަނާފައި ވެއެވެ.
އީޔޫއިން އަޅާފައިވާ ދަތިކުރުމުގެ ފިޔަވަޅުތަކުގެ ތެރޭގައި މިފަރާތްތަކުގެ އެސެޓްތައް ފްރީޒް ކުރުމާއި، ދަތުރުފަތުރު ކުރުން މަނާ ކުރުމާއި، އީޔޫގެ ގައުމުތަކުގެ ރަށްވެހިންނަށް ވުން މަނާކުރުމާއި، އަދި ކުންފުނިތަކުން މިއިން އެއްވެސް މީހަކާ އަދި މުވައްސަސާއަކާއެކީ ފައިސާގެ މުއާމަލާތެއް ކުރުން މަނާކުރުންވެސް ހިމެނެއެވެ.
