ވާދަވެރި ސިޔާސީ ޕާޓީތަކަށް އިންތިޚާބުތައް ބޭއްވުމުގެ ޔަގީންކަން ހޯއްދަވައި ދެއްވީ މިއަދުގެ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ކަމަށް އެމްޑީޕީގެ ޗެއާޕާސަން ފައްޔާޒު އިސްމާއިލް ވިދާޅުވެއްޖެއެވެ.
އެމްޑީޕީގެ ޗެއާޕާސަން ފައްޔާޟު މިހެން ވިދާޅުވީ މިއަދު ކުރިއަށްދާ އިދިކޮޅު ޕީޕީއެމްގެ އެތެރޭގެ އިންތިޚާބަށް މަރުހަބާ ވިދާޅުވެ ކުރެއްވި ޓުވީޓުގައެވެ. ފައްޔާޟު ވިދާޅުވީ ރައީސް ޔާމީންގެ ވެރިކަމުގައި ވާދަވެރި ސިޔާސީ ހަރަކާތްތަކަށް އޮތް ބިރުވެރިކަމާއި، އެތެރޭގެ އިންތިޚާބުތައް ބޭއްވުމަށް އެޅި ހުރަސްތައް މިއަދު މާޒީވެފައިވާކަމަށެވެ. މިއަދުގެ ރައީސުލްޖުމްހޫރިއްޔާވަނީ އެބިރުވެރިކަން ނައްތާލައި ހުރިހާ ސިޔާސީ ފަރާތްތަކަށްވެސް އަމާން މާހައުލެއް ގާއިމްކޮށް ދެއްވާފައިކަމަށެވެ.
ފުލުހުންނާއި ސިފައިން ފޮނުވައިފެން މީގެ ކުރިން އިންތިޚާބުތަކަށް ހުރަސް އެޅި ކަމުގައި ވީނަމަވެސް މިއަދުގެ ސަރުކާރުން އެކަންކަން ހުއްޓުވުމަށް ފުލުހުން ނުފިނުވާނެކަމަށް ފައްޔާޒު ވިދާޅުވިއެވެ.
ޕީޕީއެމްގެ ދާއިރާތަކުގެ އިންތިހާބަށް މަރުހަބާ ކިޔަން. ސިޔާސީ މިފަދަ ހަރަކާތްތަކަށް މިއަދުގެ ރައީސް އިބްރާހިމް މުހައްމަދު ޞާލިހު ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެއްކެއް. މީގެ 5 އަހަރު ކުރިން މަންޒަރު ކިތަންމެހާވެސް ތަފާތު. ވޯޓުފޮށި ބަލާ އޭރު އައީ ފުލުހުން.
– އެމްޑީޕީގެ ޗެއާޕާސަން ފައްޔާޒު ވިދާޅުވިއެވެ.
ޕީޕީއެމްގެ ދާއިރާތަކުގެ އިންތިހާބަށް މަރުހަބާ ކިޔަން.
ސިޔާސީ މިފަދަ ހަރަކާތްތަކަށް މިއަދުގެ ރައީސް @ibusolih ފުލުހުން ފޮނުވައިގެން ނުހުއްޓުވާކަމީ މިހާރުއޮތް ސިޔާސީ މިނިވަންކަމުގެ ހެއްކެއް. މީގެ 5 އަހަރު ކުރިން މަންޒަރު ކިތަންމެހާވެސް ތަފާތު. ވޯޓުފޮށި ބަލާ އޭރު އައީ ފުލުހުން pic.twitter.com/Pby970cyog
— Fayyaz Ismail (@faya_i) November 5, 2022
މިއަދު ކުރިއަށްދާ ޕްރޮގްރެސިވް ކޯލިޝަންގެ އިންތިޚާބު ކުރިއަށްދާ ސަރަހައްދަށް ވަޑައިގެން ރައީސް ޔާމީން ވިދާޅުވީ ޑިމޮކްރަސީގެ އުސޫލުން ކަންކަން ކުރާ ވާހަކަ ދައްކަން އެމްޑީޕީން ލަދު ގަންނަންޖެހޭކަމަށެވެ. އެމްޑީޕީން ވަނީ މުޅި ރާއްޖެ ވިއްކާލާފައި ކަމަށާއި، މިނިވަންކަމާއި ސިޔާސަދަތު ނެގެހެއްޓުމަށް އޮތް ހަމައެކަނި މަގަކީ ޕީޕީއެމްއަށް ވެރިކަން ލިބުންކަމަށް ޔާމީން ވިދާޅުވިއެވެ.
ރައީސް ޔާމީން ވިދާޅުވީ އެމްޑީޕީން ބޭއްވި އިންތިޚާބު ތަކުގައި ކަންކަން ހިނގާފައިވާ ގޮތް ރައްޔިތުންނަށް ސާފުކަމަށެވެ. އިންތިޚާބު ތަކުގައި ޓައްޕު ޓައްޕަަށް ވޯޓުލައިގެން އިންތިޚާބު ކުރި މީހުން ތިބި ޕާޓީއަކުން ޑިމޮކްރަސީގެ ވާހަކަ ނުދައްކައި، މިފަދަ އިންތިޚާބުތަކުން ނަމޫނާ ލިބިގަތުމަށް ޔާމީން ވަނީ ގޮވާލާފައެވެ.
އަޅުގަނޑުމެން ވޯޓު ކަރުދާސް، ގަޓާ މެޝިނަކު، ޓައްޕުތަކަކު ނޫނީ އުވަގަށާ މެޝިނަކު ނޫނެއްނޫންތޯ މިހުރީ. ދެން އެމްޑީޕީ ޑިމޮކްރަސީގެ ވާހަކަ ނުދެއްކިއްޔާ މާރަނގަޅު. މުޅި ރާއްޖެ ވިއްކާލާފައެއްނު މިއޮތީ. ލަދު ހަޔާތުގެ ކަންފުޅެއްވެސް ހުރިއްޔާ އެކަހަލަ ވާހަކަ ނުދައްކާ ގޭގަ މިއަދު ތިބެންވާނީ.
– ރައީސް ޔާމީން ވިދާޅުވިއެވެ.
ޕްރޮގްރެސިވް ކޯލިޝަންގެ ދާއިރާތަކުގެ އިންތިޚާބަކީ ކުރިއަށް އޮތް 2023 ވަނަ އަހަރުގެ ރިޔާސީ އިންތިޚާބު ކުރިން ބާއްވާ އެންމެ މުހިންމު އިންތިޚާބު ކަމަށް ޔާމީން ވިދާޅުވިއެވެ. މިއިންތިޚާބަކީ ރާއްޖޭގެ މިނިވަންކަން ނެގެހެއްޓުމަށް ޤައުމުގެ ޒިންމާއާއި ހަވާލުވުމަށް ބާއްވާ އިންތިޚާބަށް ތައްޔާރުވުމަށް ބާއްވާ އެންމެ މުހިންމު އިންތިޚާބު ކަމަށް ޔާމީން ވަނީ ވިދާޅުވެފައެވެ.
