ފިޒާއިން އުފެއްދި ކޯވިޑް ވެކްސިން ބޭނުން ކުރުމުގެ އެމްޖެންސީ ހުއްދައަށް މިއަދު ހުށަހަޅަނީ

އެމެރިކާގައި ވެކްސިން އުފެއްދުމަށް މަޝްހޫރު ކުންފުނި ފިޒާއާއި އެކުންފުނީގެ ޕާޓްނާޝިޕް ކުންފުނި ބައޯއެންޓެކް، ގުޅިގެން އުފެއްދި  ކޯވިޑް19 ވެކްސިންގެ އެމަޖެންސީ ހުއްދައަށް މިއަދު އެމެރިކާގެ ފުޑް އެންޑް ޑަރަގް އެޑްމިނިސްޓްރޭޝަން (އެފްޑީއޭ)އަށް ހުށަހަޅާނެކަމަށް މި ދެކުންފުނިން ބުނެފިއެވެ.

އެމެރިކާގައި މި ވެކްސިން ބޭނުންކުރުމުގެ ހުއްދަ ދިނުމާއި ނުދިނުން އޮތީ ހަމަ އެކަނި ފުޑް އެންޑް ޑަރަގް އެޑްމިނިސްޓްރޭޝަންގެ އަތްމަތީގައެވެ.

މި އޭޖެންސީއިން މިވެކްސިން އާންމުކޮށް ބޭނުން ކުރުމުގެ ހުއްދަ ދޫކުރުމަށް ނަގާނީ ކިހާ ދުވަހެއްކަމެއް އަދި ނޭގެއެވެ. އެހެންނަމަވެސް، އެމެރިކާގެ ސަރުކާރުން އުންމީދު ކުރަނީ، އެންމެ ލަސްވެގެންވެސް އަންނަ ޑިސެމްބަރ މަހުގެ ފުރަތަމަ 2 ހަފްތާ ތެރޭގައި ފުޑް އެންޑް ޑަރަގް އެޑްމިނިސްޓްރޭޝަނަށް މިވެކްސިން އާންމުކޮށް ބޭނުން ކުރުމުގެ އެމަޖެންސީ ހުއްދަ ދޫކުރެވޭނެ ކަމަށެއެވެ.

ފިޒާއިން އުފައްދާފައިވާ މިވެކްސިންގެ އެންމެ ފަހުގެ ތަހުލީލުތަކުން ދައްކާގޮތުގައި، މި ވެކްސިން ޖަހާ، އުމުރުން 65 އަހަރުން މަތީގެ %94 މީހުން މިވެކްސިންގެ ސަބަބުން ބަލިން ރައްކާތެރި ކޮށްދެއެވެ. މިވެކްސިންގެ އަސްލު ހަގީގަތް ދެނެގަތުމަށްޓަކާ ދުނިޔޭގެ އެކި ގައުމުތަކުން 41،000 މީހުންނަށް މިވެކްސިން ދެވިފައި ވެއެވެ. މީގެތެއިން ދެބައިކޮށްފަ އެއްބައި މީހުންނަށް އަސްލު ވެކްސިން ދީފައިވާއިރު، އަނެއްބައި މީހުންނަށް އަޖުމަބެލުމުގެ ގޮތުން ދީފައި ވަނީ މީގެ އަސްނޫން ވެކްސިނެކެވެ.

އިގިރޭސި ވިލާތުން މިހާރުވެސް ވަނީ މިވެކްސިންގެ 40 މިލިއަން ޑޯޒަށް އޯޑަރު ދީފައެވެ. މީގެތެއިން 10 މިލިއަން ޑޯޒު މިއަހަރު ނިމުމުގެ ކުރިން ލިބިގެންދާނެ ކަމުގެ ޔަގީންކަން މިހާރު އެގައުމަށް ވަނީ ލިބިފައެވެ.

އެމެރިކާގެ ރަސްމީ އިދާރާތަކުން ރިޕޯޓަރުންނަށް މައުލޫމާތު ދީފައިވާ ގޮތުގައި، ރެގިއުލޭޓަރީ އޮތޯރިޓީތަކުން ހުއްދަ ދޭތާ 24 ގަޑިއިރު ތެރޭގައި އެމެރިކާގެ ރައްޔިތުންނާއި ހަމައަށް ވެކްސިން ފޯރުކޮށް ދިނުމާއި އަދި ރައްޔިތުންނަށް ވެކްސިން ދޭން ފެށުމަށް ވާންޖެހޭ ހުރިހާ ތައްޔާރީތަކެއް މިހާރުވަނީ އެގައުމުގެ ސަރުކާރުން ކޮށް ނިންމާފައެވެ. އަދި، ބުނެފައިވަނީ ކޯވިޑް19 ވެކްސިން އަކީ އާދަޔާ ޚިލާފަށް ގަދަ ފިނީގައި ރައްކާ ކޮށްފައި ބަހައްޓަން ޖެހޭ ވެކްސިނަކަށް ވިނަމަވެސް، ވެކްސިން އާންމު ރައްޔިތުނާ ހަމައަށް ފޯރުކޮށްދިނުމުގައި އެއްވެސް ދައްޗެއް ކުރިމަތި ވެގެން ނުދާނެއެވެ.

އޮފިޝަލުން މައުލޫމާތު ދޭގޮތުގައި، އެމެރިކާގެ ފިޒާ ކުންފުންޏާ އަދި މޮޑާނާ ކުންފުނިން އުފައްދާ ވެސިންގެ 40 މިލިއަން ޑޯޒް މިއަހަރު ނިމުމުގެ ކުރިން އާންމުންނަށް ފޯރުކޮށް ދެވޭވަރަށް ތައްޔާރު ކުރެވޭނެއެވެ. މިއިން ކޮންމެ ވެކްސިނެއްގެ ވެސް ދެ ޑޯޒް ކޮންމެ މީހަކުވެސް ޖަހަން ޖެހޭނެއެވެ. އަދި ކޮންމެ ޑޯޒެއްވެސް ޖަހަން ޖެހޭނީ 4 ހަފްތާގެ ދުރުމިނެއްގައެވެ. ޑިސެމްބަރަށް ފަހު، މިދެކުންފުނިން ކޮންމެ މަހަކުވެސް މިއިން ކޮންމެ ވެކްސިނެއްގެވެސް 40 މިލިއަން ޑޯޒު އެމެރިކާގެ ރައްޔިތުންނަށް ފޯރުކޮށްދޭ ވަރަށް ތައްޔާރު ކުރަމުންދާނެއެވެ.

ޚަބަރު ލިބިފައިވާ ގޮތުގައި ފިޒާ ކުންފުނިން ތައްޔާރުކުރާ ވެކްސިން ބޭނުންކުރުމުގެ އެމަޖެންސީ ހުއްދަ ލިބޭތާ 7 ނުވަތަ 10 ދުވަސް ތެރޭގައި މޮޑާނާ ކުންފުނިން ތައްޔާރުކުރާ ވެކްސިން ބޭނުންކުރުމުގެ ހުއްދަ އެކުންފުންޏަށް ދޫކުރެވިގެން ދާނެއެވެ.