މިވެރިކަން ނިމުމަށްފަހު މިފެށޭ ރިޔާސީ އާދައުރުގެ ތެރޭގައި ވެރިކަމަށް ވަޑައިގަތުމަށް ކުރީގެ ރައީސް ޔާމީން ކުރައްވާ ކެމްޕެއިންގައި ރަށްރަށުގައި އަސާސީ ކަންކަމަށް ވާންޖެހޭ އެއްވެސް ވައުދެއް ނޯންނާނެކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާން މިއުވާން މުހައްމަދު ވިދާޅުވެއްޖެއެވެ.

ރައީސް އޮފީހުގައި ބޭއްވި ޕްރެސްގައި މިއުވާން ވިދާޅުވީ ޔާމީން ހއ. އިހަވަންދު އަށް ވަޑައިގެން، ދެން އަންނަަ ދައުރެއްގައި އެ ރަށުގައި އައިސްޕްލާންޓަކާއި ބަނދަރެއް ހަދާނެ ކަމަށް ވިދާޅުވެފައި ވިޔަސް އެއީ މި ސަރުކާރުން މިހާރު ނިންމާފައި އޮތް މަސައްކަތެއް ކަމަށެވެ.

މި ސަރުކާރުން ވަނީ އިހަވަންދޫ އައިސްޕްލާންޓްގެ ކެޕޭސިޓީ 25 ޓަނުން 50 ޓަނަށް އިތުރުކޮށްފައެވެ. އަދި 24 ގަޑިއިރު މަސްވެރިންނަށް އައިސް ލިބޭނެ އިންތިޒާމު ހަމަޖައްސައި ބޮޑެތި ބަދަލުތަކެއް ވަނީ ގެނެސްފައެވެ.

މާލެއަށް އެކަނި ބަރޯސާވާ މަރުކަޒީ ވެރިކަމެއް ކުރުމުގެ ބަދަލުގައި މިސަރުކާރުގެ ސިޔާސަތަކީ ލާމަރުކަޒީ ނިޒާމެއްގެ ތެރެއިން ވެރިކަން ކުރުންކަމަށް މިއުވާން ވިދާޅުވިއެވެ. މިނިޒާމުގެ ތެރެއިން ރައީސް އިބްރާހިމް މުހައްމަދު ޞާލިހުގެ އަމާޒަކީ ރާއްޖޭގެ މީހުން ދިރިއުޅޭ ހުރިހާ ރަށެއްގައި ފެނާއި، ނަރުދަމާގެ ނިޒާމާއި މިނޫންވެސް ރައްޔިތުންނަށް ބޭނުންވާ އަސާސީ ޚިދުމަތްތައް ގާއިމްކޮށް ދިނުންކަމަށެވެ.

ރަށްރަށުގެ ރައްޔިތުންނަށް ލިބެން ޖެހޭ އަސާސީ ހިދުމަތްތައް އަޅުގަނޑުމެންގެ މި ފަސް އަހަރު ނިމިގެންދާއިރު، ހުންނާނީ ގާއިމްކުރެވިފަ. އެކަންކަމަށް ދެމް ވާންޖެހޭ ވައުދެއް މިފަސް އަހަރަށްފަހު ނޯންނާނެ.

– މިއުވާން ވިދާޅުވިއެވެ.

މިސަރުކާރުން އެންމެ ބޮޑު އިސްކަމެއް ދީފައިވަނީ އެއްވެސް ތަފާތު ކުރުމެއްނެތި ހުރިހާ ރައްޔިތުންނަށް ހަމަހަމަ ގޮތެއްގައި ޚިދުމަތް ދެވޭނެ ގޮތްތަކެއް ހަމަޖެއްސުންކަމަށް މިއުވާން ވިދާޅުވިއެވެ. އަދި މިހާތަނަށް ސަރުކާރުން ވަނީ އެއްވެސް ރައްޔިތަކު ތަފާތު ނުވާނޭހެން އާބާދީގެ ކުޑަބޮޑުމިނަށް ނުބަލައި ތަރައްޤީ ގެނެސް ދެއްވާފައިވަކަމަށް މިއުވާން ވިދާޅުވިއެވެ. އަދި ކުރިއަށް އޮތް ތަނުގައިވެސް ސަރުކާރުގެ އަމާޒަކީ މި މިސްރާބަށް މަސައްކަތް ކުރުންކަމަށްވެސް މިއުވާން ވިދާޅުވިއެވެ.

ރަށްރަށުގައި ފެނާއި ނަރުދަމާ އާއި ބަނދަރު ގާއިމްކޮށް އަދި ބޭނުންވާ އަސާސީ ބޭސްފަރުވާގެ ހިދުމަތް ފޯރުކޮށްދެއްވާނެ ކަމަށް ޔާމީން ވައުދުވެވަޑައިގަންނަވަން މިހާރު ނުޖެހޭނެ ކަމަށް މިއުވާން ވިދާޅުވިއެވެ. ރައީސް އިބްރާހިމް މުހައްމަދު ސޯލިހުގެ މި ދައުރު ނިމޭއިރު ހުރިހާ ރަށެއްގައި އަސާސީ ހިދުމަތްތައް ފުރިހަމަވާނެ ކަމަށް ވިދާޅުވިއެވެ.