ދީނީ ޢިލްމުވެރިޔާ އަދި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް ޢަލީ ރަޙުމު ކުޑަ ގޮތަކަށް އަވަހާރަ ކޮށްލިތާ މިއަދަށް ދިހަ އަހަރު ފުރިފައިވާއިރު، މި މައްސަލައިގައި އެއްވެސް ކުރިއެރުމެއް ލިބިފައި ނުވާތީ މޯލްޑިވްސް ރީފޯމް މޫވްމަންޓް (އެމް.އާރް.އެމް) އިން ކަންބޮޑުވުން ފާޅު ކޮށްފިއެވެ.
އެމްއާރުއެމްގެ ބަޔާނުގައި ބުނެފައިވަނީ މީގެ ދިހަ އަހަރު ކުރިން، 2012 ވަނަ އަހަރުގެ އޮކްޓޯބަރ މަހުގެ 2 ވަނަ ދުވަހުގެ މެންދަމުގެ ވަގުތެއްގައި، ރަޙުމު ކުޑަ ގޮތަކަށް ޑރ. އަފްރާޝީމް އަވަހާރަ ކޮށްލާފައިވާ ޙާދިޘާއަކީ ދިވެހީންގެ ހަނދާންތަކުން ދުވަހަކުވެސް ފިލައިގެން ދާނެ ޙާދިޘާއެއް ނޫންކަމަށެވެ. އެމަނިކުފާނުގެ ހަށިކޮޅަށް ތޫނު ހަތިޔާރަކުން ހަމަލާދީ، އޮހޮރާލި އެ ލެޔަކީ، އިންސާނިއްޔަތު ކަމުގެ އެއްވެސް ކުލުނެއް ނެތް ބަޔަކު އޮހޮރާލި ލޭ ކަމާމެދު އެއްވެސް ޝައްކެއް ނެތް ކަމަށާއި އަދި އެރޭގެ އެ ބިރުވެރި ކަމަކީ، ދިވެހީންގެ ހިތްތަކުގައި އަބަދުވެސް ހަރުލާފައި ހުންނާނެ ބިރުވެރި ކަމެއް ކަމާމެދު އެއްވެސް ޝައްކެއް ނެތް ކަމަށް ވަނީ ބުނެފައެވެ.
މި ސަރުކާރު އިންތިޚާބުވީ މިފަދަ މައްސަލަތައް ބެއްލެވުމުގެ ވަޢުދާއެކުގަ. ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އުފެއްދެވި ރިޔާސީ ކޮމިޝަނުން، 2019 ވަނަ އަހަރުގެ ނޮވެމްބަރ މަހުގެ 17ވަނަ ދުވަހު އާންމުކުރި ތަހުޤީޤީ ރިޕޯޓުގައި ބުނެފައިވަނީ، ޑރ. އަފްރާޝީމް އަވަހާރަކޮށްލަން ބަޔަކު ހަވާލުކުރީ ރާއްޖޭގައި ހިންގާ ޖިހާދީ ފިކުރުގެ ޖަމާޢަތަކާ ކަމަށް.
– އެމްއާރުއެމްގެ ބަޔާނުގައި ބުނެފައިވެއެވެ.
ރިޕޯޓުގައި އިތުރަށް ބުނެފައިވަނީ، މި މައްސަލައިގައި ކުށް ސާބިތު ވެފައިވަނީ ހ. ލޮބީ ޙުސައިން ހުމާމް އަހުމަދުގެ މައްޗަށް ކަމަށާއި، އޭނާގެ މައްޗަށް އިއްވި މަރުގެ ހުކުމް ސުޕްރީމް ކޯޓުން ވެސް ވަނީ ދަމަހައްޓާފައިކަމަށެވެ. ނަމަވެސް އެ ހުކުމް މިއަދާ ހަމައަށް ވެސް ތަންފީޒު ކޮށްފައެއް ނުވާކަމަށް އެމްއާރުއެމްއިން ވަނީ ބުނެފައެވެ.
ރާއްޖޭގައި ޖިހާދީ ފިކުރުގެ ޖަމާޢަތްތައް ރާވައި ހިންގާ ގޮތް ރިޔާސީ ކޮމިޝަންގެ ރިޕޯޓުގައި ތަފްސީލު ކޮށްދީފައިވާ ކަމަށާއި، އެގޮތުން ހަރުކަށި ޖިހާދީ ފިކުރުގެ ހަރަކާތްތައް ކުރީއްސުރެ، ހިނގަމުންދާ ކަމަށް ވެސް އެ ރިޕޯޓުގައި ފާހަގަ ކޮށްފައިވާކަމަށެވެ. ނަމަވެސް، މި މައްސަލައިގެ ތަހުޤީޤު މި ހިސާބަށް ގެންދިޔުމަށްފަހު މިހާރު އެ ތަހުޤީޤު މިވަނީ ހުއްޓިފައި ކަމަށާއި، އެހެންކަމުން މިފަދަ މައްސަލަތައް ބެލުމަށް އުފައްދާފައިވާ ރިޔާސީ ކޮމިޝަންގެ ބޭނުމެއް ނެތް ކަމަށް ގިނަ ރައްޔިތުން ދެކޭކަމަށް މިބަޔާޏުގައި ބުނެފައިވެއެވ.
ޑރ. އަފްރާޝީމް ޢަލީ ފަދަ ދީނާއި ޤައުމަށް ނުހަނު އަގުހުރި އިޚްލާސްތެރި ޚިދުމަތްތަކެއް ކޮށްދެއްވި ބޭފުޅަކު އަވަހާރަ ކޮށްލުމުން، އެކަން ހިނގައި ދިޔަ ގޮތެއް އިތުރަށް ބެއްލެވުމެއް ނެތި އެމަނިކުފާނުގެ މަރުގެ ވާހަކަތަށް މެދުކަނޑާލައި، އެ ހާދިސާއަށް ދިހަ އަހަރުގެ ދިގު މުއްދަތެއް ފާއިތުވެގެން ގޮސްފައިވާ އިރުވެސް، އެ ހަމަލާ ރާވާ، އެކަމުގައި ބައިވެރިވީ މީހުންގެ ވެސް މައްސަލަ މިއަދާ ހަމައަށް ވެސް ވަނީ ނުބެލިފަ. އަދި މައްސަލައިގައި އެއްވެސް ކުރިއެރުމެއް ލިބިފައި ނުވާއިރު، މި ފާއިތުވީ ދިހަ އަހަރަކީ ޑރ. އަފްރާޝިމްއަށް އެއްވެސް އިންސާފެއް ނުލިބި ފާއިތުވީ ދިހަ އަހަރުކަން ހިތާމައާއެކު ފާހަގަ ކުރަން.
– އެމްއާރުއެމްގެ ބަޔާނުގައި ބުނެފައެވެ.
މިބަޔާނުގައި ޑރ. އަފްރާޝީމްގެ މަރުގެ ތަހުޤީޤު އަނެއްކާވެސް ފައްޓަވައިދެއްވާ، މިކަމުގައި ޝާމިލުވާ ހުރިހާ ފަރާތްތަކުން ޝަރީޢަތުގެ މައިދާނަށް ހާޒިރުކޮށް، އެ އެންމެންނަށް ޤާނޫނުގައިވާ އެންމެ މަތީ އަދަބު ވީ އެންމެ އަވަހަށް ދިނުމަށް އެމް.އާރް.އެމްގެ ފަރާތުން ކަމާބެހޭ ފަރާތްތަކަށް ގޮވާލާފައެވެ.
