މިއަދު ކުރިއަށްދިޔަ ށ.މާއުނގޫދޫ ކައުންސިލް މެންބަރު އިންތިޚާބު ކުރުމަށް ބޭއްވި ބައި-އިލެކްޝަނާއި ރ.ރަސްމާދޫ، ތ.ގުރައިދޫ، އަދި ލ.ދަނބިދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަން އެމްޑީޕީގެ އިތުރުން ޕީޕީއެމްއިން ވާދަކުރި ކެނޑިޑޭޓުން ކާމިޔާބު ކޮށްފިއެވެ.
މި އިންތިޚާބުތަކުގެ ތެރެއިން، ރ. ރަސްމާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑި ޕީޕީއެމުން ވާދަކުރި ޞާބިރާ މުޙައްމަދު ކާމިޔާބު ކުރިއިރު، ތ.ގުރައިދޫގެ އ.ތ.މ.ކ ގެ ގޮނޑިވެސް ކާމިޔާބުކޮށްފައިވަނީ ޕީޕީއެމްއިން ވާދަކުރި ޝަރުމާއެވެ.
ހަމަ އެއާއެކު، މިއަދު ބޭއްވުނު ށ.މާއުނގޫދޫ ކައުންސިލް ބައި އިލެކްޝަނުގެ ގޮނޑި އެމްޑީޕީގެ ކެންޑިޑޭޓް ފާޠިމަތު ޝިމާނާ ކާމިޔާބު ކުރިއިރު، ލ.ދަނބިދޫ އ.ތ.މ ކޮމެޓީގެ ބައި އިލެކްޝަނުގެ ގޮނޑި ކާމިޔާބު ކޮށްފައިވަނީ އެމްޑީޕީގެ ކެންޑިޑޭޓް އައިޝަތު ޒިޔާދާއެވެ.
މި އިންތިޚާބުތަކުގެ ތެރެއިން، ތ. ގުރައިދޫ ޑަބްލިއުޑީސީއަށާއި އަދި ލ. ދަނބިދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ބައި-އިލެކްޝަންގައި އެމްއެންޕީގެ ފަރާތުން ވާދަކޮށްފައި ވެއެވެ.
މިއިންތިޚާބުތަކުގެ ނަތީޖާ އަދި އިލެކްޝަންސް ކޮމިޝަނުން އިއުލާން ކޮށްފައެއް ނުވެއެވެ.
