ހދ.ހަނިމާދޫ އިންޓަނޭޝަން އެއަރޕޯޓް ތަރައްގީކުރުމުގެ މަޝްރޫޢުގެ މަސައްކަތް ހަވާލުކޮށްފައިވަނީ މިކަހަލަ 3 އެއާޕޯޓް ތަރައްގީ ކުރެވޭނެ ވަރުގެ ބޮޑު އަގަކަށް ކަމުގައި ކުރީގެ އެންވާރުމަންޓް މިނިސްޓަރ ތޯރިގު އިބްރާހިމް ވިދާޅުވެއްޖެއެވެ.
އިންޑިއާގެ އެގްޒިމް ބޭންކުން ރާއްޖެއަށް ދީފައިވާ 800 މިލިއަން ޑޮލަރުގެ ކްރެޑިޓް ލައިންގެ ދަށުން ހިންގަން ހަމަޖައްސާފައިވާ މި މަޝްރޫއުގެ މަސައްކަތް ސަރުކާރުން ހަވާލު ކުރަނީ އިންޑިއާގެ ޖޭއެމްސީ ޕްރޮޖެކްޓްސްއާއެވެ. މި މަޝްރޫއަށް 136.6 މިލިއަން ޑޮލަރު (2.1 ބިލިއަން ރުފިޔާ) ހޭދަވާނެއެވެ.
އެއާޕޯޓްގެ މަޝްރޫޢު ހަވާލުކޮށްފައިވާ އަގާއި ގުޅޭގޮތުން މިނިސްޓަރ ތޯރިގު ވިދާޅުވީ އެއާޕޯޓްގެ މަސައްކަތް އިންޑިއާގެ ކުންފުންޏާއި ހަވާލުކޮށްފައިވަނީ ދިވެހި ރައްޔތުންނަށް އޭގެ ބުރަ އުފުލަންޖެހޭ ގޮތަކަށް ކަމަށެވެ. ހަނިމާދޫ އެއާޕޯޓް އެއްބަސްވުމުގައި ސޮއިކޮށްފައިވާ އަގަކީ އޭގެ ތިން އެއާޕޯޓް އެޅޭނެ އަގަކަށް ކަމުގައި ތޯރިގު ވިދާޅުވިއެވެ.
ހަނިމާދު އެއާޕޯޓް ތަރައްގީ ކުރުމުގެ ޕްރޮޖެކްޓްގެ އަގު ކަމައްވާ 2.1 ބިލިއަން ރުފިޔާ އަކީ ގާތްގަނޑަކައް މިކަހަލަ 3 އެއާޕޯޓް ތަރައްގީ ކުރެވޭނެ ވަރުގެ އަގެއް. މިއީ މި ސަރުކާރުން ވަރަށް ޒިންމާދާރުކަން ކުޑަކޮއް، ދިވެހިންނައް ބުރަ އުފުލަންޖެހޭ ގޮތައް ކުރިއައް ގެންދާ ޕްރޮޖެކްޓެއް!
– ތޯރިގު ވިދާޅުވިއެވެ.
ހަނިމާދޫ އެއަރޕޯޓް ތަރައްޤީކުރުމުގެ މަޝްރޫޢުގެ ދަށުން 2.46 ކިލޯމީޓަރުގެ އައު ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ޚިދުމަތްދެވޭނެ ޖާގައިގެ ޓަރމިނަލެއް ޢިމާރާތްކުރެވޭނެއެވެ.
މިމަޝްރޫޢު ނިމުމުން ބައިނަލްއަޤްވާމީ ދަތުރުތަކުގައި ބޭނުންކުރާ އެއަރބަސް A320 އާއި ބޮއިންގ 737 މަރުކާގެ ބޯޓުތަކަށް މި އެއަރޕޯޓުން ޚިދުމަތް ދެވޭނެކަމަށް އިކޮނޮމިކް މިނިސްޓްރީން ވިދާޅުވެއެވެ. އަދި މެދުއިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި އިރުމަތީ އެފްރިކާގެ ގައުމުތަކުން ސިދާ ފްލައިޓްތައް ހަނިމާދޫ އަށް އޮޕަރޭޓްކުރުމުގެ ގާބިލުކަން ލިބިގެންދާނެއެވެ. އަދި ބައިނަލްއަޤްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައްވެސް ޤާއިމުވެގެންދާނެކަމަށް އިކޮނޮމިކް މިނިސްޓްރީން ވިދާޅުވެއެވެ.
ހަނިމާދޫ އެއަރޕޯޓަކީ ރާއްޖޭގެ އެންމެ ދުވަސްވީ އެއް ޑޮމެސްޓިކް އެއާޕޯޓަށްވާއިރު މިއެއާޕޯޓަކީ 2012ވަނަ އަހަރުން ފެށިގެން އެކި ވެރިކަންތަކުގައި ތަރައްޤީކުރާނެކަމުގެ ކުލަހުވަފެން ދެއްކި އެއާޕޯޓެކެވެ. ނަމަވެސް ޢަމަލީގޮތުން އެއާޕޯޓުގެ މަސައްކަތް ކުރެވިގެންދިޔަ ތަނެއް ފެނިފައި ނުވެއެވެ. ނަމެއްގައި އިންޓަރނޭޝަނަލްވުން ފިޔަވައި އެއާޕޯޓަށް އައި އެއްވެސް ކުރިއެރުމެއް ނެތެވެ.
