މަޝްހޫރު ރެޕާ ކާންޔޭ ވެސްޓްގެ ހަޔާތަށް އަނެއްކާ ވެސް އާ ބައިވެރިއަކު އަތުވެއްޖެއެވެ.
މީގެ ދެ އަހަރެއްހާ ދުވަސް ކުރިން މަޝްހޫރު ސެލެބްރިޓީ ކިމް ކާޑޭޝިއަން ވަރިކުރި ފަހުން މިއީ އޭނާގެ ހަޔާތާއި ގުޅޭ 4 ވަނަ މީހާއެވެ.
ކިމް އާއި ކާންޔޭ ވަކިވުމަށް ފަހުގައި ވެސް ތަފާތު ޖެއްސުންތައް ކާންޔޭ ކިމް އަށް ކުރިއެވެ. ފަހުން ކާންޔޭ ވަނީ އިރީނާ ޝައިކް، ޗޭނީ ޖޯންސް އާއި ޖޫލިއާ ފޮކްސް އާއި ވެސް ރައްޓެހި ވެފައެވެ.
ކިމް އާއި އޮތް ގުޅުން ނިމުނު ފަހުން ކާންޔޭގެ ހަޔާތަށް އައި 4 ވަނަ ބައިވެރިއަކީ ދެކުނު އެފްރިކާގެ މޮޑެލް ކެންޑިސް ސްވޭންޕޯއެލްއާއެވެ.
45 އަހަރުގެ ރެޕާ އާއި އުމުރުން 33 އަހަރުގެ ސުޕަމޮޑެލްއާއެކު ނަގާފައިވާ ސެލްފީއެއްވެސް އިންސްޓަގްރާމް ސްޓޯރީގައި ކާންޔޭ ވަނީ ޕޯސްޓްކޮށްފައެވެ. ސެލްފީގައި ފެންނަނީ ބްލަރޑް އައުޓް ބިއްލޫރިއެއްގެ ފަހަތުގައި އެ ދެމީހުން އެކުގައި ޕޯޒް ކުރާތަނެވެ.
އަދި ނިއުޔޯކް ފެޝަން ވީކްގައި މި ދެމީހުން އެކުގައި އުޅުތަން ގިނަ ބަޔަކަށް ވަނީ ފެނިފައެވެ. ކޭންޑިސް ވަނީ ކާންޔޭގެ އައު ވައިޒީ އެސްއެޗްޑީޒެޑް ކެމްޕޭނުން ވެސް ފެނިގެން ގޮސްފައެވެ.
އަދި ހަމަ އެއާއެކުގައި އާންމުން އެންމެ ހައިރާން ކޮށްލި އަދި ޝައުގުވެރި ކޮށްލި އެއް ކަމަކީ ކޭންޑިސް ކިމްގެ ސްކިމްސް ކެމްޕޭނުގައި ވެސް ބައިވެރިވުމެވެ. މި ކެމްޕޭން "ދަ ކާޑޭޝިއަން" ސީޒަން 2 ގައި ދައްކަން ވެސް ވަނީ ހަމަޖެހިފައެވެ.
ކާންޔޭ ގާތުން ވަރިވުމަށް ކިމް މީގެ އަހަރެއް ކުރިން ކޯޓަށް ހުށަހެޅި މައްސަލަ ނިންމާލާފައި ވަނީ މިދިޔަ މާރިޗު މަހުއެވެ. ވަރީގެ މައްސަލަ ނިމުނަސް، އެމީހުންގެ މުދަލާއި ދަރިންގެ ކަސްޓަޑީގެ މައްސަލަ އަދި އޮތީ ކޯޓުގައެވެ. އެ ދެމީހުންގެ 4 ކުދިން ތިބެއެވެ.
