ރައްޔިތުންގެ މަޖިލިހުގެ ހުސްވެފައިވާ ސާރޖެންޓް އެޓް އާރމްސްގެ މަގާމަށް ކުރިމަތިލުމަށް ހުޅުވާލައިފިއެވެ. މިމަގާމަށް ޝަރުތު ހަމަވަނީ އުމުރުން 25 އަހަރުން މަތީގެ މީހުންނަށެވެ. މަގާމުގެ މުސާރައެއް ކަމުގައި ހަމަޖައްސާފައިވަނީ 32،000 ރުފިޔާއެވެ.
ސާޖެންޓް އެޓް އާރމްސްގެ މަގާމަކީ، ރައްޔިތުންގެ މަޖިލިހުގެ އަމީން އާންމުގެ މަގާމައި ޖެހިގެން ދެވަނައަށް އެންމެ އިސް މަގާމެވެ. މިމަގާމަށް ޝަރުތު ހަމަވާ ފަރާތްތަކުން، ވަނަވަރާއި އަދި އައިޑީ ކާޑުގެ ކޮޕީ މިމަހުގެ 28 ވަނަ ދުވަހުގެ 12:00ގެ ކުރިން މަޖިލިހުގެ އިދާރާއަށް ހުށަހެޅުމަށް މަޖިލިހުގެ އިދާރާއިން ކުރި އިއުލާނުގައި ބުނެފައި ވެއެވެ.
މަޖިލިހުގެ ސާޖެންޓް އެޓް އާރމްސްގެ މަގާމު އުފައްދާފައިވަނީ 2013ވަނަ އަހަރުއެވެ. އެ މަގާމް އުފެއްދީއްސުރެ އެ މަގާމް އަދާ ކޮށްފައިވަނީ ދާދިފަހުން މަގާމުން ވަކި ކޮށްފައިވާ މުހައްމަދު ހަލީމްއެވެ. އޭގެ ކުރިން އޭނާއަކީ މޯލްޑިވްސް ނޭޝަނަލް ޑިފެންސް ފޯސްގައި ދިގުމުއްދަތަކަށް ހިދުމަތް ކުރެއްވި ބޭފުޅެކެވެ.
ސަސްޕެންޑްކޮށްފައި ހުންނަވާތާ ދޮޅު އަހަރެއްހާ ދުވަސް ފަހުން އޭނާ މަގާމުން ވަކި ކޮށްފައިވަނީ ފާއިތުވި އޮގަސްޓުމަހުގެ 24 ވަނަ ދުވަހުއެވެ.
ޙަލީމް މަޤާމުން ވަކިކުރުމަށް މަޖިލީހުގައި ނެގި ވޯޓުގައި އޭނާ މަޤާމުން ވަކިކުރެއްވުމަށް 25 މެންބަރަކު ވޯޓު ދެއްވިއެވެ. އަދި ވަކިކޮޅަށް ވޯޓު ދޭން ނުފެންނަކަމަށް އެއް މެންބަރަކު ހުންނެވިއެވެ. ވަކިކުރަން ނުފެންނަކަމަށް އެއްވެސް މެންބަރަކު ވޯޓު ދެއްވާފައެއް ނުވެއެވެ.
މިދިޔަ އަހަރުގެ ޖެނުއަރީ މަހު ހަލީމް ސަސްޕެންޑްުކުރީ މަޖިލީހުން ބަލަމުންދާ މައްސަލައަކާއި ގުޅިގެންނެވެ. ނަމަވެސް އެ މައްސަލައާއި ގުޅޭ އިތުރު ތަފްސީލެއް މަޖިލީހުން މިހާތަނަށް ހާމަކޮށްފައެއް ނުވެއެވެ.
