ދިވެހިރާއްޖޭގެ ޤައުމީ ސަލާމަތާބެހޭ ބިލު މަޖިލީހުގެ ސުޕަ މެޖޯރިޓީ ކޮންޓްރޯލް ކުރަމުންދާ އެމްޑީޕީން ރައްޔިތުންގެ މަޖިލީހުން ބޭރުކޮށްލުމާއި ގުޅިގެން ހުރި ކަންބޮޑުވުންތައް ފާހަގަކޮށް އެމްޑީޕީގެ ރައީސް އަދި މަޖިލީހުގެ ރައީސް މުހައްމަދު ނަޝީދަށް ޕީޕީއެމްއިން ސިޓީއެއް ފޮނުވައިފިއެވެ.
ޕީޕީއެމްއިން ނަޝީދަށް ފޮނުވި ސިޓީގައި ބުނެފައިވަނީ މިބިލު ހުށަހެޅީ ރާއްޖޭގެ ޤައުމީ ސަލާމަތް ރައްކާތެރިކުރުމާއިއެކު ޤައުމުގެ ސިޔާދަތާއި މިނިވަންކަން ގެއްލޭފަދަ ކަންކަމާއި ނިރުބަވެރި ޙަމަލާތަކުން ދިވެހި ޤައުމާއި ރައްޔިތުން ސަލާމަތްކޮށް، ނޭޝަނަލް އިންޓެލިގެންސް ހަރުދަނާ ކުރުމާއެކު ކުއްލި ނުރައްކަލުގެ ޙާލަތުގައި ސަލާމަތީ ޚިދުމަތްތަކުން މަސައްކަތް ކުރެވޭނެ ހަރުދަނާ ނިޒާމެއް ޤާއިމު ކުރުމަށް އެހީތެރިވެދިނުމުގެ މަތިވެރި މަޤުޞަދުގައިކަމަށެވެ. އެބިލުގައި ދިވެހިރާއްޖޭގެ ޤައުމީ ސަލާމަތް ދިފާޢުކޮށް ރައްކާތެރި ކުރުމަށް ބޭނުންވާ ސިޔާސަތުތައް ކަނޑައަޅައި ތަންފީޒު ކުރުމާއި، ޤައުމީ ސަލާމަތާބެހޭ ކައުންސިލާއި ނޭޝަނަލް އިންޓެލިޖެންސް ކޮމިޓީ އުފެއްދުމާއި، އެފަރާތްތަކުގެ ޒިންމާތަކާއި ކުއްލި ނުރައްކަލުގެ ޙާލަތު އިޢުލާން ކުރުމާގުޅިގެން ކަންކަން ކުރާނެގޮތްތައް ހިމަނާފައިވާނެކަމަށް ޕީޕީއެމް އިން ބުނެފައިވެއެވެ.
2016 ވަނަ އަހަރު ޤައުމީ ސަލާމަތާބެހޭ ބިލު ފަރުމާކުރަން ފެށީ ދިވެހިރާއްޖޭގެ ސިޔާސީ މާހައުލާއި މަލްޓިޕާޓީ ޑިމޮކްރަސީގެ ޅަފަތުގައި ކުރެވެމުންދިޔަ ތަޖުރިބާތަކަށް ރިޢާޔަތްކޮށްގެން ކަމަށާއި، ބިލު އެކުލަވާލައިފައިވާނީ އޭރު ރާއްޖޭގެ އަސްކަރިއްޔާގައި ތިއްބެވި ޤާނޫނީ ވަކީލުންގެ އިސްނެންގެވުމާއެކު، ދުނިޔޭގެ ގިނަ ޤައުމުތަކެއްގެ ޤައުމީ ސަލާމަތާބެހޭ ޤާނޫނުތައް ދިރާސާކޮށްގެން ކަމަށް ޕީޕީއެމްއިން ބުނެފައިވއެވެ. އެ ބިލަށް ދިވެހި ފުލުންގެ ލަފާ ހޯދައިފައިވާނެ ކަމަށާއި، އޭގެ ފަހުން 2021 ވަނަ އަހަރު އެބިލު މުރާޖަޢާކޮށް ބިލަށް ބަދަލުގެނެސްފައިވާނީ ސަރުކާރުގެ މުއައްސަސާތަކަށް އިދާރީ ބޮޑެތި ބަދަލުތަކެއް ނުގެނެސް، ޤައުމީ ސަލާމަތާބެހޭ ކަންކަން ތަރުތީބު ކުރެވޭނެގޮތުގެމަތިން ކަމަށްވެސް ވަނީ ބުނެފައެވެ.
ޤައުމީ ސަލާމަތާބެހޭ ބިލު ރާއްޖޭގެ އެއްވެސް ޤާނޫނަކާ ތަޢާރަޒެއް ނުވޭ. ބިލަށް ވާހަކަ ދެއްކެވި އެއްވެސް މެންބަރަކު ބިލުގައި މައްސަލައެއް ހުރިކަމަކަށް ފާހަގަ ކުރައްވާފައެއް ނުވޭ. ޤައުމީ ސަލާމަތާބެހޭ ބިލެއް ބޭނުންވާކަން ގިނަ މެންބަރުން ފާހަގަ ކުރައްވާފައިވޭ. ބިލު ބަލައިގަނެ، ކޮމިޓީ މަރުހަލާއަށްފަހު ބިލު ފާސްކުރިނަމަ ރާއްޖޭގެ ޤައުމީ ސަލާމަތް ދިފާޢުކޮށް ރައްކާތެރިކޮށް، ލާދީނީ ފިކުރާއި ހަރުކަށި ފިކުރުގެތެރެއިން ދިވެހިންގެ މެދުގައި ބައިބައިވުން އުފެއްދުމަށް ކުރަމުންދާ މަސައްކަތް މަދު ކުރެވި، ބޭރު ޤައުމުތަކުގެ ސިޔާސީ، އިޤްތިޞާދީ، ޢަސްކަރީ ނުފޫޒުތަކުން ރައްކާތެރިވުމަށް މަގުފަހިކުރެވުނީސް. އަދި ދިވެހިރާއްޖޭގެ ނޭޝަނަލް އިންޓެލިޖެންސް މިހާރަށްވުރެ ހަރުދަނާ ކުރެވުނީސް.
– ޕީޕީއެމްގެ ސިޓީގައި ބުނެފައިވެއެވެ.
ނަމަވެސް، އެއްވެސް އަސާސެއް، މަޤުބޫލު އުޒުރެއް ނެތި، ޤައުމީ ސަލާމަތާބެހޭ ބިލު ބަލައިނުގަތުމަށް ރޫލިންގ ޕާޓީ (އެމް.ޑީ.ޕީ)ގެ އަޣުލަބިއްޔަތުން ނިންމުމަކީ މަލްޓިޕާޓީ ޑިމޮކްރަސީގެ ހަމަތަކާއި އަގުކުރާ ކަންކަމާ ނުހަނު ބީރައްޓެހި، ސަރުކާރާ ވާދަވެރި މެންބަރުންގެ އަޑު ކަނޑުވާލުމަށް ހިންގި ނާތަހުޒީބު އަމަލެއްކަމަށް މިސިޓީގައި ވަނީ ބުނެފައެވެ.
އަދި ރޫލިންގ ޕާޓީގެ ޕާލަމަންޓަރީ ގްރޫޕްގެ ލީޑަރޝިޕަށް ގެނައި ބަދަލުތަކާއެކު، މިހާރަކަށް އައިސް ރައްޔިތުން ކަންބޮޑުވާ ބޮޑެތި މައްސަލަތައް ބަލައިނުގަންނަކަން ހިތާމައާއިއެކު ފާހަގަ ކުރާކަމަށެވެ. މިކަމުގެ ސަބަބުން ސަރުކާރު ޖަވާބުދާރީ ކުރުމުގެ ޒިންމާ އަދާކުރުމަށް ހުރަސްއެޅި ސުޕަރމެޖޯރިޓީގެ ބޭނުން ނަހަމަގޮތުގައި ހިފުމަކީ ޒިންމާދާރުގޮތެއް ނޫންކަމަށް ޕީޕީއެމްއިން ވަނީ ބުނެފައެވެ.
