މިއަދު މާލޭގައި މިނީ ބަހުގެ ޚިދުމަތް ފެށިގެން ދިއުމަކީ ވަށައިޖެހޭ އާންމު ދަތުރުފަތުރުގެ ނިޒާމު ފުރިހަމަކުރުމުގައި ލިބުނު ކުރިއެރުމެއް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މާލޭގައި ބަހުގެ ހިދުމަތް 11 އަހަރަށް ފަހު އަނެއްކާވެސް މިއަދު ވަނީ ދޭން ފަށާފައެވެ. އެ ހިދުމަތް ފެށީ، ސަރުކާރުން އެމްޓީސީސީއާ ހަވާލުކޮށްގެން ކުރިއަށް ގެންދާ ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުންނެވެ. އެމްޓީސީސީން ބުނީ، އެ ކުންފުނީގެ މިނީ ބަހުގެ ޓެސްޓު ދަތުރުތައް ދެ ހަފުތާ އަށް ކުރިއަށް ގެންދާނެ ކަމަށާއި އެ މުއްދަތުގައި ބަހުގައި ދަތުރުކުރާ މީހުންގެ އަތުން އެއްވެސް ފީއެއް ނުނަގާނެ ކަމަށެވެ.
ޓެސްޓް ދަތުރުތަކަށް ފަހު، ކުރާ ދަތުރުގެ އަގަކީ ކޮޅަކަށް 7ރ. އެވެ ނަމަވެސް، ތިން އަހަރުން ދަށުގެ ކުދިންނާއި އުމުރުން 65 އަހަރުން މަތީގެ މީހުންނާއި ހާއްސަ އެހީ އަށް ބޭނުންވާ މީހުން އަދި ސްކޫލް ކުދިން ޔުނީފޯމުގައި އަބަދުވެސް ހިލޭ ދަތުރުކުރެވޭނެއެވެ.
މިނީ ބަހުގެ ދަތުރު ފެށުމާއި ގުޅިގެން ރައީސުލްޖުމްހޫރިއްޔާ ކުރެއްވި ޓުވީޓެއްގައި ވިދާޅުވީ ރާއްޖެ ޓްރާންސްޕޯޓް ލިންކް (އާރްޓީއެލް) ގެ ދަށުން މިއަދު މާލޭގައި ފެށިގެން ދިޔަ މިނީ ބަހުގެ ޚިދުމަތަކީ ދަތުރުފަތުރުގެ ވަށާޖެހޭ ނިޒާމު ފުރިހަމަ ކުރުމަށް ލިބުނު ކުރިއެރުމެއްކަމަށެވެ.
ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން RTL ނެޓްވޯކްގެ މިނީ ބަހުގެ ޚިދުމަތް ފެށިގެން ދިޔުމަކީ، މިނިޒާމު ފުރިހަމަކުރުމުގައި ލިބުނު ކުރިއެރުމެއް. ބައިބޯ މާލޭގައި ދިރިއުޅޭ ރައްޔިތުންނަށް ލިބޭ ތަސައްލީއަކަށް މިޚިދުމަތްވެ އިތުރަށް ތަރައްޤީވެގެންދާނެ.
– ރައީސް ޞާލިހު ވިދާޅުވިއެވެ.
ވަށައިޖެހޭ އާންމު ދަތުރުފަތުރުގެ ނިޒާމެއްގެ ތެރެއިން @RTLnetwork މިނީ ބަހުގެ ޚިދުމަތް ފެށިގެން ދިޔުމަކީ، މިނިޒާމު ފުރިހަމަކުރުމުގައި ލިބުނު ކުރިއެރުމެއް. ބައިބޯ މާލޭގައި ދިރިއުޅޭ ރައްޔިތުންނަށް ލިބޭ ތަސައްލީއަކަށް މިޚިދުމަތްވެ އިތުރަށް ތަރައްޤީވެގެންދާނެ. pic.twitter.com/sObx6HEMao
— Ibrahim Mohamed Solih (@ibusolih) September 5, 2022
ކޮންމެ ދުވަހެއްގެ ފަތިހު 5:45 އިން ދަންވަރު 12:15 އަށް ތިން ރޫޓަކަށް މާލޭގައި ބަސް ދަތުރުކުރާއިރު، 40 ބަސް ހުއްޓި ވަނީ ހަދައިފައެވެ. އެ އިން ކޮންމެ ސަރަހައްދަކަށް ވެސް 10 މިނިޓާއި 15 މިނިޓާ ދެމެދު ބަސް ދަތުރުކުރާނެ ކަމަށް އެމްޓީސީސީން ބުންޏެވެ.
އާރްޓީއެލްގެ 18 މިނީ ބަސް މާލޭގައި ދަތުރުކުރާނެއެވެ. އޭގެ ތެރެއިން 8 ބަހަކީ 20 ސީޓާއެކު ފުރޮޅުލީ ގޮނޑީގައި އުޅޭ މީހުންނަށް ފަސޭހައިން އަރައިފޭބޭނެ ގޮތަށް ރޭމްޕް ހުންނަ ބަސްތަކެކެވެ. ބާކީ ބަސްތަކުގައި 22 ސީޓު ހުންނާނެއެވެ. ހުރިހާ ބަހެއްގައި ވެސް އިތުރު 10 މީހުންނަށް ކޮއްޅަށް ތިބެވޭނެހެން ހޭންޑްލް ހުރެއެވެ.
މީގެ ކުރިން، 2011 ވަނަ އަހަރު ވެސް މާލޭގައި ބަހުގެ ހިދުމަތް ވަނީ ދީފައެވެ. އޭރުގެ މާލެ ސިޓީ ކައުންސިލުން އަމިއްލަ ކުންފުންޏަކާ ހަވާލުކޮށްގެން ކުރިއަށް ގެންދިޔަ ދަތުރުތައް ވަނީ އަހަރެއް ނުވެ ހުއްޓާލައިފައެވެ.
