ސަރުކާރުގެ މުއައްސަސާތައް ފެއިލްވެއްޖެކަމަށް ވިދާޅުވެ ކުޅުދުއްފުށީ އުތުރު ދާއިރާގެ މެންބަރު ޔާސިރު ޢަބްދުއްލަޠީފް ކަންބޮޑުވުން ފާޅުކޮށްފިއެވެ.
ޔާސިރު މިފަދައިން ވިދާޅުވީ، ކުޅުދުއްފުށީ އެއަރޕޯޓްގައި އޯގަސްޓްމަހުގެ ނިޔަލަށް ރަންވޭގައި ލައިޓްޖަހައި ރޭގަނޑު ފްލައިޓްތައް ބޭއްވޭނެކަމަށް ވިދާޅުވީ ވަޢުދުފުޅާއި ގުޅޭގޮތުންނެވެ. އެ ވައުދު ފުއްދިފައި ނުވާކަމަށް ކުޅުދުއްފުށީގެ ބައެއް ފަރާތްތަކުން ބުނަމުން ދިއުމާއި ގުޅިގެން ޔާސިރު ފޭސްބުކްގައި ޕޯސްޓްކުރި ލިޔުމުގައި ވިދާޅުވީ، ކުޅުދުއްފުށީގައި އެއާޕޯޓެއް އެޅުމަކީ ރައީސް ޔާމިންގެ ވެރިކަމުގެ ފުރަތަމަ ދެ އަހަރުގެ ވައުދެއް ކަމުގައިވީ ނަމަވެސް، އެއަޕޯޓް ފުލީ އޮޕަރޭޝަނަލް ކުރުމަކީ މި ސަރުކާރުގެ ވެސް ވައުދެއްކަމަށެވެ.
މި އެއާޕޯޓަކީ އެ ސަރަހައްދުގެ ރައްޔިތުންނަށް ނުހަނު ބޭނުންތެރި، މުހިންމު އެއާޕޯޓެއް ކަމުގައި ވާތީ، އެއާޕޯޓަކީ ލައިޓް ޖެހި، ރެސްޓޯރަންޓުގެ ހިދުމަތް ދެވޭ، ޑިމާންޑާއި އެއްވަރަށް ފްލައިޓް ބޭއްވޭ، ރެފަރ ކުރެވޭ ބަލި މީހުން ބޭއްވުމަށް ބޭނުންވާ ކޮޓަރިހުންނަ އެއާޕޯޓަކަށް ހެދުމަށާއި، އަދިވެސް އިތުރަށް ބޭނުންވާ ކަންކަން ފުރިހަމަ ކުރުމަށް، ގިނަ އިދާރާތަކާއެކު ބައްދަލުކުރެވި ހައްލު ހޯދުމަށް މަސައްކަތް ކުރެވިފައި ވާނެކަމަށް ޔާސިރު ވިދާޅުވިއެވެ.
ހާއްސަ ގޮތެއްގައި އެއާޕޯޓުގެ ލައިޓިން ފުރިހަމަ ކުރުމާއި ބްރޭކް ވޯޓަރ އަލުން ޖެހުމަށް، ރައީސް އޮފީހުން ފެށިގެން ސަރުކާރުގެ ކަމާ ގުޅުންހު މުއައްސަސާތަކާ ތަފާތު އެކި ފަހަރު މަތިން ބައްދަލު ކުރެވިފައި ވާނެކަމަށާއި، ފެނިގެން ގޮސްފައިވަނީ ގުޅުންހުރި މަސައްކަތްތައް އެކި މުއައްސަސާ ތަކުން ކުރާއިރު މުއައްސަސާތައް މެދުގައި ގުޅުން ކުޑަ މިންވަރާއި މުއައްސަސާތައް މެދުގައި އޮތް ބްލޭމް ޕާސްކުރުންކަމަށެވެ. އަދި ހާއްސަކޮށް މުއައްސަސާ ތަކުން ކަންކަމުގައި ދޭ މުއްދަތު ދިިމާނުވާކަން ޔާސިރު ފާޙަގަކުރެއްވިއެވެ.
މި އެއާޕޯޓަކީ މި ސަރަހައްދުގެ ސިއްހީ މައި ހަބު ކުޅުދުއްފުށީ ރީޖަނަލް ހޮސްޕިޓަލާ ނުހަނު ބޮޑަށް ގުޅިލާމެހިފައިވާ އެއާޕޯޓެއް ކަމުގައި ވިޔަސް، މި އަހަރުގެ މި ފާއިތުވެދިޔަ 8 މަސް ދުވަހުގެ ތެރޭގައި މާލެއަށް ރެފަރ ކޮށްފައިވާ 115 ކޭސްގެ ތެރެއިން ކުޅުދުއްފުށީ އެއާޕޯޓުން ރެފަރ ކުރެވިފައިވަނީ އެންމެ 22 އިންސައްތަ ނުވަތަ 26 ކޭސް ކަން ފާހަގަ ކޮށްލަން. އަދި މީގެ ތެރެއިން ވެސް ކުޅުދުއްފުށީ މަގުން ޝެޑިއުލް ފްލައިޓެއްގައި ގެންދެވިފައިވަނީ އެންމެ 2 އިންސައްތަ ނުވަތަ 3 ކޭސްކަން ފާހަގަ ކޮށްލަން.
– ޔާސިރު ވިދާޅުވިއެވެ.
2021 ވަނަ އަހަރަށް ބަލާއިރު ކުޅުދުއްފުށީ ރީޖަނަލް ހޮސްޕިޓަލުން މާލެއަށް 170 ބަލި މީހުން ރެފަކުރެވިފައިވާއިރު، ކުޅުދުއްފުށީ އެއާޕޯޓުން ގެންވެފައިވަނީ 49 މީހުން ނުވަތަ 29 އިންސައްތަކަން ތަފާސް ހިސާބު ހިއްސާކުރައްވަމުން ޔާސިރު ފާހަގަކުރެއްވިއެވެ.
މި ބަލިމީހުންގެ ތެރޭގައި ގިނައީ ސްޓްރޯކް، ހާޓްއެޓޭކް އަދި ފުއްޕާމޭގެ ބަލިތައް ފަދަ ހާލު ބޮޑު ބަލިމީހުން ކަމުގައި ވާއިރު މާލެއަށް ފަސްގަނޑުގައި އެއާޕޯޓެއް އޮވެ 71 އިންސައްތަ ގަދަ ކަނޑު ކަޑައްތު ކުރަން ޖެހުމަކީ ބަލި މީހާއަށްވެސް އަދި އާއިލާތަކަށް ވެސް ނުހަނު ހިތްދަތި ކަމާ ކުރިމަތިލާންޖެހޭ ކަމެއް ކަން ވަނީ ފާހަގަ ކުރެވިފައި. މިމަސައްކަތުގައި ސަރުކާރުގެ މުއައްސަސާަތަކުން ފެއިލް ވެފައިވާކަން ހިތާމަޔާ އެކު ފާހަގަ ކުރަން. އަދި ރައީސުލް ޖުމްހޫރިއްޔާގެ ވައުދުތައް ފުއްދުމުގައި މުއައްސަސާތަކުން މިހާރަށްވުރެ ބޮޑަަށް ގުޅިގެން މަސައްކަތް ކުރަންޖެހޭ ކަމުގައި ދެކެން.
– ޔާސިރު ވިދާޅުވިއެވެ.
ކުޅުދުއްފުށީ އޮންލައިންގައި ބުނެފައިވާގޮތުގައި އެންމެ ފުރަތަމަ ކުޅުދުއްފުށީ އެއާޕޯޓް ރަންވޭގައި ލައިޓް ހަރުކުރުމަށް ބަޔަކާ ހަވާލުކުރީ ކޮވިޑްގެ ކުރިންނެވެ. އެކަމަކު ކޮވިޑާ ގުޅިގެން އެ ޕްރޮޖެކްޓަށް މަޑުޖައްސާލުމަށްފަހު އަނެއްކާވެސް އެ މަޝްރޫއު ބަޔަކާ ހަވާލުކުރީ މިދިޔަ އަހަރު އޮކްޓޯބަރުމަހު، ރައީސް ސޯލިހް ކުޅުދުއްފުއްޓަށް ވަޑައިގެންނެވި ދަތުރާ ގުޅުވައެވެ.
އެ މަސައްކަތް ނުކުރެވި ގިނަ އަހަރުތަކެއް ފާއިތުވެދާތީ، ރައްޔިތުން ބައްދަލުވުމެއްގައި އާންމު ފަރާތްތަކުން ކުރިމަތިކުރި ސުވާލަކަށް ޖަވާބު ދެއްވަމުން މެމްބަރު ޔާސިރު ވިދާޅުވެފައިވަނީ، މިއަހަރުގެ އޯގަސްޓްމަހުގެ ނިޔަލަށް އެއާޕޯޓް ރަންވޭގައި ލައިޓްހަރުކޮށް ނިންމާލެވޭނެކަމަށް އުންމީދުކުރައްވާ ކަމަށް އެ އޮންލައިންގައި ބުނެފައިވެއެވެ.
