ޗައިނާގެ މަޝްހޫރު ފޯނު ކުންފުނި ހުއާވޭއާ ދެކޮޅަށް އެތައް ދުވަހެއް ވަންދެން އެމެރިކާ ސަރުކާރުން އަޅާފައިވާ ދަތިކުރުމުގެ ފިޔަވަޅުތަކުގެ ނަތީޖާއެއްގެ ގޮތުން، ކުންފުނީގެ ވިޔަފާރި ދަށަށް ގޮސް، ކުންފުނި ބަގުރޫޓު ވެދާނެކަމުގެ ބިރަށްޓަކާ، ހުވާވޭ ކުންފުނިން އެކުންފުނީގެ ސްމާރޓް ފޯނުގެ ވިޔަފާރި ވަރަށް ބޮޑު ތަނުން ދަށް ކޮށްފިއެވެ.
އެމެރިކާ ސަރުކާރުން އެތައް ދުވަހެއްވަންދެން ހުއާވޭ ކުންފުންޏާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކުގެ އަސަރު ކުންފުޏަށް ވަނީ ވަރަށް ނޭދެވޭ ގޮތަކަށް ކޮށްފައެވެ.
މިހަފްތާގެ އަންގާރަ ދުވަހު، ގިނަ ކުންފުނިތަކެއް އެކުލެވޭ ކޮންސޯޓިއަމްއަކުން ވަނި ހުވާވޭ ކުންފުނީގެ ޚާއްސަ ބްރޭންޑެއް ކަމުގައިވާ އޮނަރ ބްރޭންޑްގެ ފޯނު އެކޮންސޯޓިއަމްއިން ގަނެފައިވާކަން އިއުލާން ކޮށްފައެވެ. އެހެންނަމަވެސް ހުވާވޭ ކުންފުންޏާއެކީ މި ކޮންސޯޓިއަމްއިން ކޮށްފައިވާ ވިޔަފާރީގެ މުއާމަލާތަކީ ކިހާ އަދަދެއްގެ ފައިސާގެ ޑީލެއްކަން ދެފަރާތުންކުރެ އެއްވެސް ފަރާތަކުން މިހާތަނަށް ހާމަކޮށްފައެވެ.
ހުއާވޭގެ ސްމާޓް ފޯންގެ އޮނަރ ބްރޭންޑް ގަތް ފަރާތާއި ހުއާވޭ ކުންފުންޏާ ދެމެދު ވެވުނު ވިފާރީގެ މި މުޢާމަލާތުގެ ހަގީގީ މަގުސަދަކީ، އޮނާ ބްރޭންޑްގެ ސަޕްލައި ޗޭއިން ހިފެހެއްޓުމާއި އަދި މީގެ އިތުރުން މިބްރޭންޑްގެ ފޯނުތައް ގަންނަ ފަރާތްތަކާއި އަދި ވިއްކާ ފަރާތްވެސް ހިމާޔަތް ކުރުމުވެ.
އެމެރިކާ ސަރުކާރުންވަނީ ހުވާ ކުންފުނިން އެގައުމުގެ ޓެކްނޮލިޖީގެ މުހިންމު ބައެއް ވަސީލަތްތައް ބޭނުންކުރުން ހުއްޓުވާފައެވެ. މީގެތޭގައި، ބައެއް ޗިޕް ސެޓްތައް ބޭނުން ކުރުން ހުއްޓުވުމާއި، ބައެއް ސޮފްޓްވެއަރ ތަކާއި އަދި މީގެ އިތުރުން 5Gގެ ޓެލެކޮމިއުނިކޭޝަންގެ ބައެއް ސާމާނު ބޭނުންކުރުން ހުވާވޭ ކުންފުންޏަށް މަނާކުރުންވެސް ހިމެނެއެވެ.
އެމެރިކާގެ ސަރުކާރުން ބުނެފައިވަނީ، ޗައިނާގެ ހުވާވޭ ކުންފުންޏަކީ އެމެރިކާގެ ގައުމީ ސަލާމަތަށް ހުރި ނުރައްކަލެއް ކަމުގައެވެ. އެހެންނަމަވެސް، ފެށުނީއްސުރެ އެމެރިކާ ސަރުކާރުގެ މިތުހުމަތުތަކާ މިކުންފުނިން އަންނަނީ ދެކޮޅު ހަދަމުންނެވެ.
ހުއާވޭގެ އޮނަރ ބްރޭންޑްގެ ސްމާޓް ފޯނު ވިއްކާލުމަކީ، އެމެރިކާއިން އަޅާފައިވާ ދަތިކުރުމުގެ ފިޔަވަޅުތަކުން ސަލާމަތްވުމަށް އެކުންފުނިން އެޅުމަށް އެތައް ދުވަހެއް ވަންދެން މަސައްކަތްކުރަމުން އައި ފިޔަވަޅެކެވެ. މި ބްރޭންޑް ވިއްކާލުމުގެ ފުރުސަތު ލިބިގެން ދިއުމުން ހުއާވޭއަށް އެކުންފުނީގެ މިހާރު ހުރި ވަސީލަތްތައް ބޭނުންކޮށްގެން އެކުންފުނީގެ އަގުބޮޑު އެހެން ބްރޭންޑްތައް ސަލާމްތަކުރުމުގެ ފުރުސަތު ލިބިގެން ދާނެއެވެ. މިގޮތުން ކުންފުނީގައި މިހާރު ހުރި ވަސީލަތްތައް ބޭނުން ކޮށްގެން ހުއާވޭއިން ތައްޔާރުކުރަމުންދާ އެކުންފުނީގެ އެންމެ މުހިންމު ބްރޭންޑްތައް އުފެއްދުމަށް އިތުރު މުއްދަތު ލިބިގެންދާނެއެވެ.
ހުއާވޭގައި ދައުރުވަމުންދާ ގޮތަށް ހަމަޖެހިފައި އޮންނަ ސިއީއޯގެ މަގާމު އަދާ ކުރައްވަމުން ގެންދަވާ މިހާރުގެ ސީއީއޯ ވިދާޅުވި ގޮތުގައި އެމެރިކާއިން މިހާރު އަޅާފައިވާ ދަތިކުރުމުގެ ފިޔަވަޅުތަކުގެ ނަތީޖާއެއްގެ ގޮތުން ކުންފުންޏަށް މިހާރު އެންމެ މުހިންމު ވެފައިވަނީ ވިޔާފާރި ދެމެހެއްޓުމަށްޓަކާ، ކުންފުނީގައި މިހާރު ހުރި ވަސީލަތްތައް ވީހާވެސް ދިގު މުއްދަތަކަށް ބޭނުންކުރެވޭނެ ނިޒާމެއް ގާއިމް ކުރުމަށެވެ. އެހެންކަމުން އެކުންފުނީގެ އޮނަރ ބްރޭންޑް ވިއްކާލުމަށްފަހު މިހާރު ކުންފުނިން އިސްކަން މިދެނީ ކުންފުނިން ތައާރަފް ކޮށްފައިވާ އެއަށްވުރެއް އަގުހުރި ބްރޭންޑްތައް އުފެއްދުމުގައި ދެމި އޮވެވޭތޯ މައްސައްކަތް ކުރުން ކަމުގައިވެސް އޭނާ ވިދާޅުވިއެވެ.
ހުއާވޭން މައުލޫމާތު ދޭގޮތުގައި އޮނަރ ބްރޭންޑްގެ ފޯނުތައް ދެން އުފައްދަމުން ގެންދާ ކުންފުނީގައި ހުއާވޭ ކުންފުނީގެ އެއްވެސް ހިއްސާއެއް ނޯންނާނެއެވެ. އަދި އެކުންފުނީގެ މެނޭޖުމަންޓުން ނިންމާ ވިޔަފާރީގެ އެއްވެސް ނިންމުމެއްގައި ހުއާވޭ ކުންފުނީގެ އެއްވެސް ދައުރެއްވެސް ނޯންނާނެއެވެ. މީގެ މާނައަކީ އޮނަރ ބްރޭންޑްގެ މޯބައިލް ފޯނު ދެން އުފައްދާނީ މި ބްރޭންޑް ގަނެފައިވާ ކުންފުނިތަކުގެ އާގުރޫޕުން އެމީހުންގެ އަމިއްލަ ކޮމްޕޯނަންތައް ބޭނުން ކޮށްގެންނެވެ.
ގަބޫލު ކުރެވޭގޮތުގައި އެމެރިކާގެ ރައީސްކަމަށް އިންތިޚާބު ވެވަޑައިގެންފައިވާ ޖޯ ބައިޑްން ރައީސްކަމުގެ ހުވާ ކުރެއްވުމަށްފަހު، ހުއާވޭ ކުންފުންޏާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިތަކެއް ގެންނަވާފާނެއެވެ. އެހެންނަމަވެސް، މިއީވެސް އަދި އެއްވެސް ޔަގީންކަމެއް އޮތްކަމެއް ނޫންކަމުގައި މަސްރަހު ދިރާސާކުރާ ފްރާތްތަކުން ބުނެއެވެ.
