ރައީސް އިބުރާހިމް މުހައްމަދު ސާލިހު ބަދުއަޚްލާގީ އަމަލު ހިންގަނިކޮށް ނަގާފައިވާ ފޮޓޯތަކެއް ރައްޔިތުންގެ މަޖިލިހުގެ ރައީސް މުހައްމަދު ނަޝީދަށް ލިބުނުކަމަށް ބުނާ މައްސަލަ ބެލުމަށް ޕްރޮސެކިއުޓަރ ޖެނެރަލްގެ އޮފީހަށާއި ފުލުހުންގެ މުވައްސަސާއަށާއި އަދި ސުޕްރީމް ކޯޓަށް ހުށަހަޅައިފިއެވެ.
މި މައްސަލަ ބެލުމަށް މުވައްސަސާތަކަށް ހުށަހަޅާފައިވަނީ ކުރީގެ ރައީސް ޔާމިންގެ ސަރުކާރުގައި ހޯމް މިނިސްޓްރީގެ ޑެޕިއުޓީ މިނިސްޓަރުކަން ކޮށްފައިވާ އަހުމަދު ސަލީމް (މާޒް ސަލީމް)އެވެ.
މި މައްސަލަ މުވައްސަސާތަކަށް ހުށަހަޅުއްވަމުން މާޒް ސަލީމް ފޮނުވާފައިވާ ސިޓީގައި ވިދާޅުވެފައިފަނީ، ނަޝީދު ވިދާޅުވާފަދަ ފޮޓޯތަކެއް އެއްވެސް މީހެއްގެ އަތުގައި ހުރުމަކީ ކުށެއްކަމަށާއި، މަޖިލިސް ރައީސް ރައީސަށް ކޮށްފައިވާ ތުހުމަތުތަކުގެ ސަަބަބުން ރައީސުލްޖުމްހޫރިއްޔާގެ ސިފަތަކަށް އުނިކަންވެސް އަންނަ ކަމުގައެވެ.
ސަލީމްގެ ސިޓީގައި އެދިފައިވަނީ ނަޝީދު ވިދާޅުވާފަދަ ފޮޓޯތަކެއް އޭނާގެ އަތުގައި ހުރިތޯ ނުވަތަ ނޫންތޯ ޔަގީން ކޮށްދިނުމަށެވެ. އަދި ނަޝީދު މިމައްސަލާގައި ދޮގު ހައްދަވާފައިވާނަމަ، އެއީ ހައްދު ކަނޑައެޅިފައިވާ ގާނޫނީ ކުށެއްކަމުގައެވެ. އަދި މީގެ އިތުރުން ރައީސުލްޖުމްހޫރިއްޔާ ބްލެކްމެއިލް ކުރުމަކީ ކުށެއް ކަމަށާއި އެމައްސަލަވެސް ބަލައިދިނުމަށް ސަލީމްގެ ސިޓީގައި އެދިފައި ވެއެވެ.
ނަޝީދުގެ ކޮއްކޮ ނާޒިމް ސައްތާރު އެއްޖިންސުން ގުޅުން ހިންގި މައްސަލާގައި އޭނާ ހައްޔަރު ކުރުމާއެކު ނަޝީދުވަނީ ރައީސް ސާލިހު ބަދުއަޚްލާގީ އަމަލު ހިންގާ ފޮޓޯތަކެއް އޭނާގެ އަތުގައި ހުރިކަމަށް ވިދާޅުވެފައެވެ.
އެހެންނަމަވެސް ފަހުން ނަޝީދު ވިދާޅުވެފައިވަނީ ފޭރޭ މީހަކު، އިންގިރޭސިވިލާތުގައި އޭނާގެ ފޯނު ޖަހައިގަނެގެން ގެންގޮސްފައި ވާކަމަށެވެ.
