ރައީސުލްޖުމްހޫރިއްޔާގެ އިސްތަށިފުޅުގައި އެއްވެސް އަސްލެއްނެތް ތުހުމަތުތަކެއް އަޅުވާނަމަ، މަޖިލިސް ރައީސްކަމުގެ މަޤާމުންނާއި، އެމްޑީޕީގެ ރައީސްގެ މަޤާމުން ރައީސް ނަޝީދު އިސްތިއުފާ ދެއްވުމަށް ރައްޔިތުންގެ މަޖިލީހުގެ ކޮމަންޑޫ ދާއިރާގެ މެމްބަރު މުހައްމަދު ރާޝިދު ވިދާޅުވެއްޖެއެވެ.
ރާޝިދު މިހެން ވިދާޅުވީ ރައީސް އިބްރާހީމް މުހައްމަދު ސޯލިހް ބަދު އަހުލާގީ އަމަލު ހިންގާ މަންޒަރު ހުންނަ ފޮޓޯތަކެއް އުޅޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ތުހުމަތު ކުރައްވާ ދެއްކެވި ވާހަކަތަކާއި ގުޅިގެންނެވެ.
ރައީސް ނަޝީދުގެ މިވާހަތަކަށް އެމްޑީޕީގެ ގިނަ މެމްބަރުން ދަނީ ރައްދު ދެއްވަމުންނެވެ. ނަޝީދުގެ ވާހަކަތަކަށް ރައްދު ދެއްވަމުން ރާޝިދު ވިދާޅުވީ އެމްޑީޕީ ފުޑާލަން ރައީސް ނަޝީދަށް ފުރުސަތު ދެވެގެން ނެތްކަމަށެވެ. ރައީސުލްޖުމްހޫރިއްޔާގެ އިސްތަށި ފުޅުގައި ބޮޑެތި އިލްޒާމުތައް އަޅުވާއިރު އެކަމުގެ ހަގީގަތް ހާމަކޮށް ދޭންޖެހޭކަމަށާއި، އެނޫން ކަމުގައިވާނަމަ މަޖިލިސް ރައީސް ކަމުގެ މަޤާމުންނާއި، އެމްޑީޕީގެ ރައީސް ކަމުގެ މަޤާމުން ރައީސް ނަޝީދު އިސްތިއުފާ ދެއްވަންޖެހޭކަމަށް ރާޝިދު ވިދާޅުވިއެވެ.
އެމްޑީޕީ ފުޑާލަން ފުރުސަތެއް ނުދެވޭނެ! ރައީސުލްޖުމްހޫރިއްޔާގެ ބޮލުގައި ނުބައި ހަޑި މުހުތާރު އިލްޒާމު އަޅުވާނަމަ ސާބިތު ހެކި ދައްކާ! ހެކި ނެތި އިލްޒާމުތައް އަޅުވާނަމަ ޕާޓީގެ ރައީސްކަމުންނާއި، މަޖިލިސްގެ ރައީސް ކަމުން އިސްތިއުފާ ދެއްވަންޖެހޭނެ! ބަލައެއް ނުގަނެވޭނެ!
– ރާޝިދު ވިދާޅުވިއެވެ.
އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕްއަށް ނަޝީދު ފޮނުއްވި މެސެޖެއްގައި ވިދާޅުވީ އެމަނިކުފާނުގެ އާއިލީ އަންހެން ކުއްޖަކާއެކު ރައީސް ސޯލިހް ބަދު އަހުލާގީ އަމަލު ހިންގަވާ މަންޒަރު ހިމެނޭ ހަތަރު ފޮޓޯއެއް ނަޝީދަށް ލިބިވަޑައިގެންފައިވާ ކަމަށެވެ. މިކަމާ ގުޅޭ ގޮތުން ރައީސްގެ ތަރުޖަމާނު މަބްރޫކް އަޒީޒް ވިދާޅުވީ އެފަދަ އެއްވެސް ކަމެއް ރައީސް ނުކުރައްވާ ކަމުގެ ޔަގީންކަން ދިވެހި ރައްޔިތުންނަށް ދެއްވަވާ ކަމަށެވެ.
ނަޝީދު މިފަދަ މެސެޖްތަަކެއް އެމްޑީޕީގެ ގައުމީ މަޖިލީހުގެ ވަޓްސް އެޕް ގްރޫޕަށް މި ފޮނުއްވާފައި މި ވަނީ، އެމަނިކުފާނުގެ ކޮއްކޯފުޅު އަދި ނާޒިމް އަބްދުލް ސައްތާރު އެއް ޖިންސުން ގުޅުން ހިންގި ކަމުގެ ތުހުމަތުގައި ހައްޔަރުކޮށްފައިވަނިކޮށެވެ.
އއ. އަތޮޅުގެ ރިސޯޓެއްގައި ހުންނަވަނިކޮށް ނާޒިމް ހައްޔަރު ކުރުމާއެކު، ނަޝީދު ޓްވީޓެއް ވެސް ކުރެއްވިއެވެ. އަދި ނާޒިމް ހައްޔަރުކުރީ ސިޔާސީ މަގުސަދެއްގައި ސަރުކާރު ކޯލިޝަންގައި ތިބި ހަރުކަށި ފިކުރުގެ ބަޔަކު ރުއްސަން ކަމަށް ވެސް ނަޝީދު އެ ޓްވީޓްގައި ލިޔުއްވާފައިވެއެވެ. ނާޒިމް ސައްތާރު މިއަދު ވަނީ އއ. ރަސްދޫ މެޖިސްޓްރޭޓް ކޯޓަށް ވެސް ހާޒިރުކޮށްފައެވެ. އަދި އެ ކޯޓުން ވަނީ ނާޒިމްގެ ބަންދަށް ހަތް ދުވަހުގެ މުއްދަތެއް ޖަހައިފައެވެ.
