ރައްޔިތުންގެ މަޖިލީހުގެ ރައީސްގެ މަޤާމު ހިތްޕުޅަށް ހެޔޮވަރު ގޮތަށް ބޭނުން ނުކުރެވޭނެކަމަށް ވިދާޅުވެ، ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމްގެ ރައްދެއް މަޖިލިސް ރައީސް މުހައްމަދު ނަޝީދަށް ދެއްވައިފިއެވެ.

ޝިޔާމް މިފަދައިން ވިދާޅުވީ ސްރީލަންކާގެ ރައީސް ގޮޔަބަޔާ ރާޖަޕަކްސް ފިއްލަވައިގެން ދިވެހިރާއްޖެއަށް ވަޑައިގަންނަވާފައިވާއިރު، އެކަމަށް މަގު ފަހިކޮށް ދެއްވީ މަޖިލިސް ރައީސް މުހައްމަދު ނަޝީދުކަމަށް ބައިނަލް އަގުވާމީ އަދި ލޯކަލް މީޑިއާތަކުންވެސް ރިޕޯޓް ކޮށްފައިވާތީ ކަންބޮޑުވުން ފާޅުކޮށް ކުރެއްވި ޓުވީޓެއްގައެވެ.

ޝިޔާމް ވިދާޅުވީ މަޖިލިސް ރައީސްގެ މަޤާމަކީ މުހައްމަދު ނަޝީދު ހިތުހުރި ގޮތަކަށް ބޭނުން ކުރަން އޮތް މަޤާމެއް ނޫންކަމަށެވެ. މަޖިލީހުގެ ރައީސް ބޭނުންވި ނަމަވެސް ކުރެއްވޭނެ ކަންކަމާއި ނުކުރެއްވޭނެ ކަންކަން ހުންނާނެ ކަމަށާއި، ހުދޫދުން ބޭރުން ކަންކަން ކުރުމުގެ ބާރު މަޖިލިސް ރައީސަށް ލިބިގެން ނުވާކަމަށެވެ. އަދި މިއަދު ލަންކާގެ ރައްޔިތުންގެ ނިންމުމާއި ދެކޮޅަށް ދިވެހި ސަރުކާރުން ދީފައިވާ އެއްބާރުލުމުގެ ޒިންމާ ރައީސް ޞާލިހު ނަގަންޖެހޭނެކަމަށް ޝިޔާމް ވިދާޅުވިއެވެ.

މަޖިލިސް ރައީސްގެ މަޤާމު ހިތްޕުޅަށް ހެޔޮވަރު ގޮތަށް ބޭނުން ނުކުރައްވާ، މުހައްމަދު ނަޝީދު. ސްރީ ލަންކާ ރައްޔިތުންގެ ނިންމުމަށް އިޚުތިރާމް ކުރައްވާ. މަޖިލިސް ރައީސް ބޭނުންފުޅު ވިޔަސް، ނުކުރެއްވޭނެ ކަންކަން ހުންނަވާނެ. ސްރީލަންކާ ރައްޔިތުންގެ ވިންދާއި ދެކޮޅަށް ރާއްޖެއިން ކުރާ ކަންކަމުގެ ފުރިހަމަ ޒިންމާ ރައީސް އިބްރާހިމް މުހައްމަދު ޞާލިހު ނަންގަވަންޖެހޭ.

– ޝިޔާމް ވިދާޅުވިއެވެ.

ލަންކާގެ ރައީސް ގޮޓާބަޔަ ރާއްޖެ ވަޑައިގަތް މައްސަލައިގައި ދިވެހި ސަރުކާރު އަދި އޮތީ ހިމޭނުންނެވެ. އެކަމަކު ސީއެންއެން އިން ބުނާގޮތުން ގޮޓާބަޔަ ދަތުރުކުރެއްވި ލަންކާގެ އަސްކަރީ މަތިންދާބޯޓު ވެލާނާ އިންޓަނޭޝަނަލް އެއާޕޯޓަށް ޖައްސަން ފުރަތަމަ ހުއްދަ ނުދިނަސް އެ ކަން އެހެން ގޮތަކަށް ބަދަލުވެ، ރާއްޖެ އިން ގޮޓާބަޔަ އަށް މަރުހަބާ ކިޔާފައި ވަނީ ރައްޔިތުންގެ މަޖިލިހުގެ ރައީސް މުހައްމަދު ނަޝީދު އެ ކަމުގެ ތެރެއަށް ވަދެވަޑައިގަތުމުންނެވެ. ނަޝީދު އެ މައްސަލައިގައި އަދި ހުންނެވީ ހިމޭނުންނެވެ.

ނަމަވެސް ދެ ގައުމުގެ އާންމުން ތިބީ ރަތަށް އަރައިފައެވެ. ބައެއް މީހުން ދެ ގައުމުގެ ޒަމާންވީ ގުޅުމަށް ރުހުން އޮތަސް ގޮޓާބަޔަ ފަދަ ކޮރަޕްޝަންގެ ތުހުމަތު ކުރެވޭ އަދި ފުރުން މަނާކުރުމުގެ އަމުރަކަށް ސުޕްރީމް ކޯޓުގައި އެދިފައިވާ ބޭފުޅަކު ރާއްޖެ އެތެރެވުމުގެ ހުއްދަ ދިނުމަކީ ވަރަށް ގޯހުން ދިޔަ ކަމެއް ކަމަށް ގިނަ ބަޔަކު ދަނީ ބުނަމުންނެވެ.